رەونەقا پەیڤان

دەمەک بو ھزرەکێ سەرێ من ئالوز دکر و من نە دزانی ژ کیرێ نڤیسینا خوە دەست پێبکەم، براستی ئەز ل پەیڤەکێ دگەریام! تشتێ پتر ئەز کێشایمە ڤێ نڤیسنێ ژی ھەر پەیڤ بو، روژانە ب ھزاران پەیڤ دھێنە بەر گوھێن ھەر ئێک ژ مە، بەلێ ئایا چەند پەیڤ ژ وان ب مفانە، چەند ژی دگەل بای دچن. ھەر دەم گوتنا ناڤدارەکێ چینی دھێتە بیرا من، نزانم ل کیرێ ب بەرچاڤێن من کەفتبو، دبێژیت: (ھەلگرتنا ھزران ئەرکێ پەیڤانە، دەما ھزر ژی ھاتنە وەرگرتن، پەیڤ ژبیر دچن). ژ وان پەیڤێن روژانە دھێنە بەر گوھێن مە، ھند ژێ تژی رامانن، فەلسەفەیا ژیانێ ل سەر دھێتە ئاڤاکرن، ھند پێ حەژێکرنێ دکەن، ب شەڤان نانڤن و تەماشای ستێران دکەن، موبایلێن وان ھەردەم یێ لبەر گوھێن وان،

خەم و خوشیێن ژیانێ بو وان نە گرنگن، کارەسات، رویدان، ئەرزانی و گرانی بو وان نە جھێ پویتە پێدانێ نە، بتنێ یێ ل ھیڤییا پەیڤەکێ! پەیڤەک بتنێ یە دشێت تامێ بدەتە ژیانا وان، پەیڤەکە گەلەگ گرنگییا خوە یا ھەی، ئەو پەیڤ داھێنانێ دروست دکەت، مروڤان دگەھینتە ئێک ، بەردەوامیێ ددەتە ژیانێ، مروڤ ل سەر ھاتینە کوشتن و مروڤ بو گیانێ خوە ژ دەست ددەن، ئەو پەیڤ دەبرینە ژ بو حەژێکرنێ، ئەڤ پەیڤا ژ دەڤێ کور و کچان دەردکەڤیت چەندا نازکە، پەیڤەکا چەند بچویکە و دناخێ خوە دا گرانییا وێ ژ گرانترین چییا مەزنترە، ژ بھایێ درو ئەلماسان ب قیمەت ترە! پەیڤەکە گەلەک کەس یێن ژێکڤەکرین، خەلک یێ ژبەر دەربەدەر بوین، سەرا پەیڤەکێ گەلەکان نیڤەکا تەمەنێ خوە ل پشت شقشێن زیندانێ برینە سەر، مروڤ یێن ژ بو ھاتینە کوشتن، گوند یێن ھاتینە خرابکرن، بتنێ ژبەرکو نە ڤیایە وێ پەیڤێ بێژیت، حەز نەکریە ئەو پەیڤ ژبن ئەزمانێ وی دەرکەڤیت. ھەڤکێشەییا ژیانێ یا ھوسانە، وەکی تەڤنێ تەڤن پیرکێ گەلەک یێ ئالوزە، ژیان یا ل سەر دروست بوی و پەیڤ مە دکەنە مروڤ و مە دکەنە ساتورە ژی، پەیڤ مە دکەنە بەھەرمەند و سەروک و پەیڤ مە دکەنە کەسێن ھاڤی و نەساخ ژی، کی دزانیت روژێ چەند پەیڤێن بێ رامان ژ دەڤێ خەلکی دەردکەڤن! کی دشێت وان پەیڤان ب ھژمێریت یێن روژانە خەلک ژبەر دئێشیت و مروڤی دلگران دکەن، پەیڤێن ھندەکان دبنە نەخشێ سەرە دەرا و پەرتوک و بابەت پێ دھێنە رەشکرن، دبنە شیرەت و زارو ل سەر پەروەردە بن و ب زمان و چاڤ دکەڤن، پەیڤێن ھندەکان ژی پیساتی نە و خەلک ژێ درەڤن، ئھا ئەڤەنە پەیڤ، دشێن گەلەک ئارمانجان بھنگێڤن، پەیڤێن باش ھەنە و یێن خراب، مروڤێن باش ھەنە و یێن خراب، ل دوماھییا ڤێ نڤیسینێ ژی، ھەر مروڤن پەیڤان چێدکەن و پەیڤان پیس دکەن، مروڤ ب پەیڤێ دھێتە ناڤکرن، ب پەیڤان دھێتە دامەزراندن، ب پەیڤان دگەھیتە خوشتڤیێن خوە، دیسان ب پەیڤان خەلک خواترێ ژ مروڤی دخوازن و ھەر ب پەیڤان ژی مروڤی بو ئاخێ بجھـ دھێلن.