بحث هذه المدونة الإلكترونية

pertook

pertook

2011/11/04

چیروکا من و (دوو دەرھەم)ی


تشتێ ژ ھەمیا پتر دژیانا خوە دا من حەژێکری و من گەلەک خەون پێڤە دیتین، (دوو دەرھەم)ەکێ پێکڤە بو، دەما من قەستا مال دکر، من برێکێ ڤە دیتبو! باش لبیرا منە کوژیەکێ وی بتنێ دیار دکر و یێدی دناڤ تەقنێ دا بەرزە ببو، من خوە دسەر را گاڤ دا بو و بەری چاڤێ من ژێ خافل ببیت، ئەز پاش پاشکی زڤریم و بێی لدوور خوە سەحبکەم، من دەستێ خوە دایێ و دناڤ پەحنکا دەستێ خوە دا پەرخاند و من حشک را حەشاندە دبەریکا خو دا،
ئەز لھەوە ناڤەشێرم تا ئەز گەھشتیمە مال، من ٦ جاران ژ بەریکا خو ئینا بو دەر و من دئینا پێش چاڤێن خو و من دناڤ دەستێ خوە دا دگڤاشت و جارەکا دی من دزڤراندە دبەریکا خوە دا ڤە. ڤی دوودەرھەمێ پێکڤە، گەلەک خەون دسەرێ من دا دروست دکرن و ئەگەر بەھرەمەندیەک ئەڤرو لدەف من ھەبیت، نیڤەک ل سەر خاترا  وی یە، ئەگەر ئەز یێ شاش نەبم بو ماوێ پێنج روژان بو، ئەو دوو دەرھەم ژ دەستێ من دچوو دبەریکا من دا و دھاتە ددەستێ من دا ڤە، جارنا من تەبەل یێن پێ دکرین، تایرە بو ترومبێلکا تێلەی، کوک، کێک، شەکروک، دناڤ بچیکان ژی دا من گەلەک یاری یێن کرین، من تەبەل جوت جوت دکرین، دەقێ ژ ھەمیا لاوتر یێ من بو، من (کورکانێ) سەرا پاران یا پێکری و من ھەردوو بەریکێن خو ژ (دەھـ فلس و پێنج فلسان) تژی کربون، بوی دوو دەرھەمی ھەمی ببونە ھەڤالێن من و ھەر کەسەکی حەزدکر ئەز پتر دگەل بم و پتر ھەڤالێ وی بم. چیروکا من نە یا سەیرە، ژبەرکو ئەوی دوو دەرھەمی چاڤێن من لبەر دنیایێ ڤەکرن، تا نوکە ژی ئەز ھزرێن وی دوو دەرھەمی دکەم، ھەر چنەبیت دەما ئەز قەستا بازاری دکەم، ئەو دوو دەرھەم دھێتە بیرا من، ئەز ھزر دکەم ئەڤ کەسێن ل بازاری ھەمی ئەون یێن ل بچویکاتیێ خەون ب دوودەرھەمێ من ڤە دیتین، سەدا سەد ئەز دزانم ئەو دوودەرھەمە نوکە یێ دبەریکا ئێکی ژ وانان دا، ھەر چنەبیت ئەوی دوو دەرھەمی پێنج روژان خوە دبەریکا من دا گرتبو، بەس ھین بێژن ئەڤێ نوکە دبەریکێ دا، ئەڤە چەند سالە وی دبەریکا خوە را حەشاندی و روناھی لێ کریە ھزرەت، ئەوی چەند درەو و حیلە و قەھر سەرا دوودەرھەمێ من خارینە، ئەوی چەند ھەڤال بخو پێ دروست کرینە و تا نوکە چەند ھەڤال پێ ژ دەست داینە! دەما ئەز ڤان ھزران دکەم، ئەز زوی ژ بازاری دەردکەڤم و چیروکا دوو دەرھەمی و خوشی و نەخوشیێن وی دھێلمە دناڤ وێ حەشامەتا مروڤان دا و شوکور ئەز ژ جیھانا خەونان رزگار بویم.

إرسال تعليق