چایچیێ كۆنجیسم

  عبدالرحمن بامەرنب

چایخانەكا ل سیكێ ھەی ئەز جھێ وێ نابێژم، چەند ئەم لێ دروینین، ھەڤالێ من دێ بیرا وی ئینیت كو چایا وی یا بێ شەكرە و ئەز یا كێم شەكر ڤەدخووم و چایێن مە ھەردووكان وەكی ئێك دئینیت، ھەڤالێ من ژی پیچەكێ یێ بێھن تەنگە و گوتێ برا ما دێ ھەر جار چایا من وەكی یا ڤی ئینی، مەبەستا وی ئەز بووم؟ چایچی ژی ھندی یێ سوحبەت خۆش و ترانەكەر بوو، روینشتە دەف مە و گوتە ھەڤالێ خوە یێ چایچی كا بۆ من ژی چایەكێ ل سەر حسابا ڤان ھەردو جامێرا تێكە. گوتە ھەڤالێ من تو یێ نوی و من چایا ھەڤالێ تەیا ژبەركری، مەبەستا وی ئەز بووم و گوت دا بۆ ھەوە سوحبەتەكێ بكەم، كەسەكی قەستا جیرانێ خوەكر و گوتێ، ئەگەر تە قەد وەریسكەك ھەبا دا من كەرێ خوە پێڤەگرێدابا تا سپێدێ؟ جیرانێ وی گوتێ من چ قەد وەریس نینن، لێ ئەز دێ شیرەتەكێ لتە كەم، ھەرە ئەكتەریەكێ ل سەر كەرێ خوە بكە و وەسا خوە نیشانبدە، كو تو یێ ھەڤسارێ دئێخیە سەر ستویێ كەری و سەرێ ھەڤسارێ ب تشتەكی ڤە گرێدە. وی كەسی ژی ئەڤە كر و دیت كەر لجھێ خوە ما و پشت راست چوو نڤست، سپێدێ ھات دا كەرێ خوە بەتە ناڤ رەزێ، دیت كەر ژجھێ خوە نەلڤی، ھندی ھاتێ، ھەر ما دجھدا، ئینا چوو دەف جیرانێ خوەڤە و گوتێ ئەڤە تە چ ب سەرێ كەرێ من ئینایە، ژجھێ خوە نالڤیت؟ جیرانێ وی مانێ تە یێ گرێدای و ھەر ل بەر چاڤێن وی ھەروەكو تو ھەڤسارێ وی ڤەدكەی، وی ژی وەكر و شنی كەر ژ جھێ خوە چوو. ھەڤالێ من گوتێ ئێ مەبەستا تە بڤێ چیرۆكێ چبوو؟ گوتێ ڤێجارێ بلا چایا من و ھەڤالێ تە ل سەر حسابا تە بیت، جارەكا دی دێ بیرا من بخوە ل چایا تە یا تەحل ھێت! كەنیا مە چایخانە تژی كر، ھەڤالێ من گوت ئەڤێ ژ تەحێلا من گرت و ئێكێ ل تەنشتا مە گوھداریا مەدكر، گوت نە مامكۆ ئەڤێ ل تەحێلا مە ھەمیان گرت.