عبدالرحمن بامەرنی
دگەل ھاتنا شەپولا ئەنترنێتێ بڤێ بەرفرەھیێ و ڤان ھەمی ئەبلیكەیشنان، تورێن كومەلایەتی و ھەر ئێك برێكا خوە و ب ئامیرێ خوە یێ تایبەت دچیتە دناڤدا، خەلك ھند یێ بخوەڤە مژویل كری، ئێدی سەرەدان یێن كێم بووین و چوونا ب گوندیڤە وەك جاران نەمایە، خرڤەبوون ل مالەكێ ناھێتە دیتنێ و ھەر كەسێ تو لدەف بروینی دێ گازندان كەت و بێژیت مرۆڤاھی یا كێم بووی و ئەنترنێتێ خەلك یێن ژ ئێك دویركرین و خوە جەژن و بەھی ژی یێن بووینە نامێن موبایلێ و سەدان گوتن و بەھانەیێن دی، لێ ئایا راستە ئەنترنێتێ ئەڤ پەیوەندیێن ھەنێ كێم كرینە؟ رەنگە ئەگەر ڤێ پرسیارێ ب ھەلبژاردەیا (بەلێ و نەخێر) بێخینە بەردەستێ خەلكی، سێكا خەلكی دێ درێكەفتی بین، كو بەلێ ئەنترنێتێ پەیوەندیێن كومەلایەتی یێن كێم كرین و ژخوە ئەگەر تو گوھێ خوەبدەیە وان كەسان ئەڤێن دبێژێن بەلێ، دێ بۆ تە دەھان نموونان ئینن كو دلوڤانی نەمایە و دێ بێژن، سەرەدان نەماینە، جەژن وەكی بەرێ نەماینە و ئەو ددروستن و ئەگەر بێژین بەرۆڤاژی ئەنترنێتێ پەیوەندیێن كومەلایەتی یێن موكمتر ژی لێكرین، د ھەمان دەمدا ئەڤ تەخە ژی یا دروستە. لڤێرە تشتەك دمینیت، دناڤبەرا ڤان ھەردوو دروستیاندا، ئەو چ تشتە ھەردوو جوین ل سەر خالەكێ درێكەفتی نەبن؟ پێنەڤێت ئەڤە دێ بۆ ئاستێ بكارئینانێ و خوە گونجاندنێ دگەل ڤان ئامیران مینیت و ئەگەر ل سەر ھەر ئێكێ ژڤان جوداتر راوەستین، ئەڤێن دبێژن ئەنترنێتێ مرۆڤاھی و دلوڤانی یا كێمكری، پرانیا وان كەسان دێ ژ وێ تەخێ بن، یێن نەشیایین خوە دگەل ئەنرتنێتێ بگونجینن، چ تەمەن ئەگەر بیت، چ نەبوونا ئەنترنێتێ ئەگەر بیت، چ نەبوونا ئامیرێ پێشكەفتی و گونجای ئەگەر بیت و چ ژی كەسەك بیت خەریبیێن جاران بكەت، بیرھاتنێن وی، ئەوا بۆ وی ھاتیە گوتنێ و د بەرامبەردا ئەڤێن دشێن خوە دگەل ئەنترنێتێ بگونجینین، دێ بینی مژولاھیێن وان یێن بووینە گەلەك، دچنە دناڤ بەرنامێن نویدا، ئەز بەحسا وان بكەم ئەڤێن مفایی ژ ئەنترنێتێ وەردگرن، دشێن خوە پێش بێخن، زانیاریێن خوە زێدە بكەن، بزانن چ ل دەردوورێن وان رویددەت، برێكا ئەنترنێتێ جیھانێ ببینن و ئەڤە ژبلی پەیوەندیێن ھەڤالینیێ، ئاخفتن و دانوستاندن دگەل كەسێن دی و یان كو ھشیاربوونەك لدەف وان دروست دبیت، ئەو ھشیاربوونا ھەنێ وی ژ ژینگەھا وی یا بەرتەنگ دەربازی ژینگەھەكا مەزنتر لێدكەت.
دا بزڤرینە تەخا ئێكێ ئەڤێن گازندێ ژ ئەنترنێتێ دكەن، ئەگەر بەحسا یێن مەزن بكەین و نەشێن ڤیان ئامیران بكاربینن، رەنگە رۆژانە یان چەند رۆژان زارۆكێن وی ل كیڤە بن دێ پەیوەندیێ پێكەن و ھەر تشتێ وان دڤێت و چ دەمێ وان دڤێت دشێن پرسیارا سەح و سییا ژ ئێك بكەن، ئەڤە ژبلی دروستكرنا خارنێ، كرینا تشتان، گوھورینا ناڤ مالێ، ژ وەلاتەكی بۆ وەلاتەكی، بلاڤبوونا بلەزا ئاگەھیان و یا من دڤێت لڤیرە بێژم، ئەز چ ژ ھەردوو ئالیان ب سەر یێدی نا ئێخم، لێ ھەر ئێكێ باشی و خرابیێن خوە ھەنە و رەنگە ھەر ئێك لدویڤ شیانێن خوە و لدویڤ زانینا خوە تێكەلی ڤان بەرنامان دبیت و یا ئەز دزانم، ئەگەر ئەم ژڤێ قوناغێ دەرباز ببین، قوناغا بھێت چ مەزن بیت چ بچیك بیت و خوە دگەل ئەنترنێتێ نە گونجینیت، ئەو دێ كەسەكێ دویر جڤاكی بیت.
ـــــــــــــــــــــــــــــ
رۆژناما ئه‌ڤرۆ 3690- 2025/ 12/02
ليست هناك تعليقات:
إرسال تعليق