عبدالرحمن بامەرنی
ئێك ژ بابەتێن گەرمێن لڤێ دووماھیێ سوشیال میدیا بخوەڤە مژویل كری، بابەتێ دروستكرنا خوارنا ناڤ تازیانە. نە بتنێ سوشیال میدیا، بەلكو بنەمال، گوند و تا عەشیرەتێ ژی ل گەلەك جھان كرینە بریار، كو نابیت خوارن ل مالا خودانێ تازیێ بھێتە دروستكرن. ھەر كەسێ دیڤچوونا بابەتی ژی كربیت و تایبەت سوشیال دەرگەھێ دانوستاندنێ ل بەر دیتنێن جودا ڤەدكەت، ھەمیان دەستخۆشی ل ڤان پێنگاڤان كرن، ژبەركو بارگرانیەكە دكەڤیتە سەر مالا تازیێ و دگەل خەمێن تازیێ و ژ دەستدانا خوشتیڤەكی، بارگرانییا مەزاختیێ خوارنا تازیێ ژی دھێتە سەر و ھەر وەكو من گوتی سوشیال دەرگەھێ دانوستاندنێ لبەر ھەمیان ڤەدكەت، دناڤ ھندەك كومێنتاندا ھاتبوو، ئەرێ ما چاوا بەھیچنەك ژ دویر بھێت و ئەز بێ خوران بزڤرینم؟
د كومێنتەكا دیدا ئاماژە ب سندوقا بنەمالێ ددان، كو مە سندوقا بەخشینێ یا ھەی و بنەمال یان گوند ھەمی تێدا بەشدارە و بارگرانی ناكەڤیتە سەر خودانێ تازیێ و ئەڤە و چەندین دیتن و كومێنتێن دی، كو رەنگە ھەر ئێكی بارەكا مافی دگەلدا ھەبیت، لێ ئەگەر ژلایەكێ دیڤە ل بابەتی بنێرین، بۆچی بابەتێ خوارنا ناڤ تازیێ خەلك دلگرانكریە و سوشیال میدیا لێ ھاتیە دەنگ؟ دێ بینین رەفتارێن ھندەكان و زێدەرەوییا ھندەكان ل سەر ھندەك بابەتان، بوینە ئەگەر كو چاڤلێكرنێن نە دجھێ خوەدا بھێنە گورێ و ئەگەر ھندەكێ ل سەر خورانا تازیان راوەستین و ئەو چ ئەگەر بوون كو ئەڤ بریارێن ھەنێ یان ئەڤ مشتومرێن ھەنێ ل سەر خورانێن تازیێ دروست ببن، ئەڤێن ل خوارێ نە: ئێك: لڤێ دووماھیێ دابونەریتەكی سەرھلدا، ئەو ژی برنا بەھیچنان بۆ خورانگەھان و بابەتێ خورانگەھێ ب بابەتێ (كەیس ماقیلی، خوە شەرمكرن، خوە كێمنەدیتن و ما ئەز ژكێ كێمترم)ڤە ھاتە گرێدان. دوو: د كوردەواریێدا دەما تازی بۆ ئێكی دروستدبوو، مالا مری خوارن چێنەدكرن، بەلكو دەروجیرانان خوران بۆ مالێ دئینان و ئەڤێن دی ھەرئێكی قەستا مالا خوەدكرن، بتنێ ئەگەر كەسەك ژدویر ھاتبا، ئەو ژی نە خوارنگەھـ ھەبوون و رێورێبار نەبوون. نوكە ھەمی تشت بەرۆڤاژییە و ژبەرفرەھبوونا باژێری، كەس تازیێ ل مالێ نادانیت بەلكو ھولێن تایبەت یێن ھەین، پرانییا جاران ژی ئەو ھول ل تاخێن دینە ژمالا خودانێ تازیێ، لڤێرە پرسیار، تو بەھیچنی و خوە ھەكە چەندێ نزیكی خودانێ تازیێ ژی بیت، دەما دبیتە وەختێ شیڤێ، قەستا مالا خوە بكە خورنا خوە بخو و پاشی ھەرە مالا تازیێ! بۆ ئەڤێن ژدویر دھێن، یان درەنگ ب تازیێ دزانن، ئەرێ دێ بوچی وەختێ خورانێ قەستا مالا خودانێ تازیێ كەیی؟ خالا دی ژی كو بدیتنا من گەلەك یا بێ رامانە، دەما دبیتە رۆژا دوویێ ژ تازیێ و پشتی نڤێژا (مەغرەب)، دێ كۆمەكا مەزنا مرۆڤان بدویڤ مالا تازیێ كەڤن بۆ شیڤ خارنێ، پرسیار بكە؟ دێ بێژن مانێ رۆژا دووماھیێ یە و ھەر وەكو خودانێ تازیێ ژی یێ وەغەركری و چ جارەكا دی نابینتەڤە و دگەل ئەڤێن من گوتین ھەمیان و گەلەك ژێ من نەگوتین، بۆ ھندەكا یا بوویە بابەتێ (داوەت نەبی)، ئێ بەھییە دێ خورانەكا خۆش خوین! ئێ بەھییە و خودانێ مالێ یێ زەنگینە، دێ مەبەتە خورانگەھێ! خودێ بێژی خوارند دمالا وانڤە نینە، یان قەستا مالا خوە بكە و ئەگەر نەشێی قەستا مالا خوە ژی بكەی، درێكێدا دوو لەفێن فەلافلا بخوە و پاشی ھەرە مالا بەھیێ و بۆ ئەڤێن داوەت نەبیێ نەزانن ژی، دێ وێ ژی بێژم. رۆژێن تایبەت ھەبوون داوەت نەبی دگێران، ل سەر بانەكی خوران رێزدكر و ھەر ئێكی كەفچكێ خوە دھەلگرت و دچوون خوران دخوار، ژبەركو خورانەكا بەلاش و بھزرا وی ژ یا مالێ خۆشتربوو.ــــــــــــــــــــــــــــــ
• رۆژناما ئه‌ڤرۆ 3681- 2025/ 30/01
ليست هناك تعليقات:
إرسال تعليق