دھوكا بێ خودان!!

 عبدالرحمن بامەرنی

دڤێ بگرەوبكێشا ل پەرلەمانێ عیراقێ دڤان چەند رۆژێن بوریدا و تایبەتی دھی درووستبووی، ھند بێ ئومێدی بمنڤە دیاربوو، كو خوە د شەرێ ناڤخویی ژیدا، ئەز ھند ماندی نەكریمە. ئەز بەحسا پاشەكەفتێ موچەی ناكەم، ژبەركو ئەمێن موچەخور و ھەمی فەرمانبەرێن حكومەتا ھەرێما كوردستانێ بووینە قوربانیێن سیاسەتەكا نەھەڤسەنگ و كورتییا وێ ژی، پاشەكەفت د سەرێمەدا شكەست و ئەو خەونێن مە بزڤراندنا وێڤە ددیتن، ھەمی ب بەرئاڤێدا چوون. تشتێ ئەز بێ ئومێد كریم ژی، ئەز بەحسا (دھوكێ) بكەم، كو بگرە و بكێشا ل سەر برگەیێن بودجەی دھاتەكرنێ، ئێك ژ پارێزگەھێن ھەرێمێ ھەست ب (مەغدوریەتێ)دكر، كو جوداكاری ددابەشكرنا داھاتیدا دھێتەكرنێ و وان دخاست، بودجێ وان ئێكسەر ژ عیراقێ بۆ بھێتە رەوانەكرنێ! ددەمەكیدا پارێزگەھا ھەرە (مەغدورا) ل ھەرێما كوردستانێ، پارێزگەھا دھوكێیە و د چ ھەڤكێشەییان ژیدا ناھێتە بەحسكرنێ.
بەرییا چەند سالان بوو و ھەلكەفت سەرھلدانا باژێرێ دھوكێ بوو، كو دكەڤیتە 14/3 و ھەمان رۆژێ ئەز و سێ ھەڤالێن دی یێن میدیاكار، مێھڤانی كەنالێ كوردستان 24 یێ عەسمانی بووین و ھەمان تشت من گوت، كو پارێزگەھێن سلێمانیێ و ھەولێرێ ل سەر حسابا دھوكێ یێ بەرفرەھـ دبن و پرۆژە یێ لێ دھێنە دروستكرنێ و ئەڤە نە ب گوتنا من، بەلكو ب گوتن و دیدەڤانییا دەھان جاران ل سەر كەنالێن تیڤییان ئەڤ بابەتە ھاتیە بەحسكرن، كو بودجا زوونا كەسك بۆ سلێمانیێ دچیت و یێ زوونا زەر زێدەترییا وێ بۆ ھەولێرێ و ژ دھوكێ دھێتە خارن!
ئەوا من دڤێت بێژم، ئەگەر دڤێ نەدادپەروەریێدا سلێمانیێ ل بەرخوەدا بیت و پرسیارا مافێ خوە ژ بودجەی كربیت، بۆ ئاڤەدانكرنا وێ پارێزگەھێ كو ئەڤە ژی دەرئەنجامێ ڤێ نەداپەروەریێ یە و ھەكو ب عەرەبی دبێژن(تحصيل حاصل)، ئەرێ ئەم وەك خەلكێ دھوكێ و كارگێرییا پارێزگەھا دھوكێ، چاوان پرسیارا مافێ خوە بكەین؟!!

---------------------

https://rwangauraxna.com/ba/detail.aspx?IDNews=7327

https://www.facebook.com/photo/?fbid=10218693447247662&set=g.209899095715001