2015/12/18

بێهنشك*

عبدالرحمن بامەرنی
چاڤێن وی هەمی تشتێن د هۆلێڤە كۆنترول دكرن و هزرێن وی بژالە ببوون، ئەڤ سمینارا هەر وەكو بۆ گەلەك كەسێن وەك وی د هۆلێڤە چ پلە و پۆستێن حزبی د دەستیدا نە و ل سەر خاترا سمینارا سەیدایی ئامادە بووین، نە مزگینییا ژیارەكا خوەش بوون و نەژی ئایندێ‌ زارۆكێن وی گەش دكرن! بۆ چەندین جاران پێن خوە ل سەر ئێك د قولپاندن و ب روونشتنێڤە بێزار ببوو و چاڤێن وی وەكی راداری هۆل كونترول دكر. تشتێ‌ ئەو ژ خەیالێ‌ ڤەگەراندییە ناڤ هۆلێڤە، رۆناهییا بلاجوكتۆرێن كامیرەیێن میدیاكاران بوو و نەشییا كۆنترولێ‌ ل سەر خوە بكەت و دەنگێ‌ بێهنشكا وی سمینار ژ بیرا هەمییان بر و چاڤێن وی نقیان و پرچك ژ دەڤی پەشییان. دەما چاڤێن وی ژ سەر ئێك رابووین و ب سەر خوەڤە هاتی، چەندێن‌ دهۆلێڤە د روونشتی و ئەڤێن ل پشت كامیرا و خوە سەیدایێ‌ سمینار ژی پێشكێش دكر، ل وی زڤرین. ب تنێ‌ ئەڤێ‌ ل بەر سینگا وی نەبیت، دەستێ‌ وی ب سەرێ‌ ویڤە بوو و دناڤ تلێن دەستێ‌ ویدا، كلینسەكێ سپی دكر و ئەو چپك پاقژ دكرن.
پرانیا ئامادە بوویێن دهۆلێڤە وەك ئەڤێ‌ ل بەر سینگا وی، پرچا سەرێ‌ وان چ تێرا نەمایە یان ب نیڤی بوویە و هندەكان ب تنێ‌ چەند داڤەكێن مییان د سەریرا زیق دكەن، ئەو ژی یێن ب (قەترێ‌) رەشكرین و نە ئێخستینە بەر مەقەسا سەرتراشی، دا هندەكێ‌ ژ وێ‌ حۆچاتیێ‌ ڤەشێرن. سەر حۆچی هەر وەكو خەلك ڤان كەسان پێناسە دكەن، رەوشەنبیر، ئاقلمەند، سیاسیزان و كار بەدەستن و پرانیا جاران خەلك رێزێ‌ ل وان دگریت و خو ل دیوانان ژی خەلك جهی بۆ ڤالا دكەت و دبیتە سەیدا سەیدایا وان دگەل. سەرێ‌ خوە ب نك ویڤە بر و دەستێ‌ خوە ل ملێ‌ ویدا و داخوازا لیبَورینێ‌ ژێكر، گۆتێ‌: "چنینە ئاسایی یە ژبیر بكە"، ئەڤ چەند پەیڤە ژ دەڤێ‌ وی پەشین بێی ل دوور خوە ژی بزڤریت.
 هەر چەندە ئەو گوتن بەس بوون، كو بێهنشكا وی تشتەكێ‌ نورمال بوو، لێ‌ بێهنا وی نەهات، ژبەركو ئەوی سەروچاڤێن وی نەدیتن و هزركر، نە ڤیانەك د راستا ویدا یا هەلگرتی و حەز نەكریە ل سەروچاڤێن وی بزڤریت.

 سمینار بەرەڤ دووماهیێ‌ هات و دەرێ‌ هۆلێ‌ ڤەبوو و هندا دەست خۆشی ل پێشكێشكەرێ‌ سمینارێ‌ دكرن و هندا قەستا دەرڤەی هولێ‌ دكرن، لێ‌ ئەو د گێژەڤانكەكا دیدا بوو و دڤێت داخوازا لێبورینێ‌ بكەت، لێبورینەكا ژ هەژی وێ‌ رەفتارا وییا نە جوان و یا ژ نشكەكێڤە ل دەم و جهێن نە گونجای. ل بەر زڤری و خوە بۆ دا ناسكرن، هەر چەندە وی سەروچاڤێن وی نەدیتبوون و دڤییا ژێ‌ بزانیت كا وی چ ژێ‌ دڤێت، بەلێ‌ وی ب گومانا وی زانی و ئێكسەر گوتێ‌: ئەز خودانێ‌ بێهنشكێ‌ مە و ئەز داخوازا لێبورینێ‌ دكەم، هەر چەندە تشتەكێ‌ نە ب دەستێ‌ من بوو؟! لێ‌ وەك جارا دی لێ‌ ڤەگەراند و گوتێ‌: ئاسایی یە و من یا ژبیركری. هەر بێهنا وی نەهات و ڤییا ڤێ‌ بێهەتكیێ‌ ب لێبورینەكا ژ هەژیتر، هەژی سەرێ‌ وی یێ‌ حۆچ بیت، ڤێجارێ‌ ژی قەستا بەرسینگا وی كر، كو ئەو یێ‌ مژوولی ئاخفتنێ‌ بوو دگەل دوو كەسێن دی و سەرێن وان هەردوویان ژی وەك یێ‌ وی د حۆچ بوون، گۆتێ‌: ببۆرن بۆ برینا دان و ستاندنا هەوە و ئاخفتنا خو ئاراستەی وی ب تنێ‌ كر و گۆتێ‌: ئەز هەست دكەم كرێتییا من دهۆلێڤە، تو گەلەك یێ‌ بێزاركری و نزانم چاوان لێبووریینا خوە بۆ تە دەرببرم؟ هەر چەندە ئەڤ رەفتارە ئەگەر بۆ جارا ئێكێ‌ با دا تشتەكێ‌ ئاسایی بیت، لێ‌ بێهنا وی هاتە سەرێ‌ دفنا وی و گۆتێ‌: ژ دوورێن من دوور كەڤە و ئەز جارەكا دی تە ل پێش چاڤێن خوە نەبینم!. لێ حەیتاندنا وی یا ڤێجارێ‌، ژ قامێ‌ زێدەتر بوو و هەست ب شەرمەكا مەزنتر كر، ل دوور خوە زڤری، كا چاڤێ‌ چەند كەسان ل وی بوو دەما هاتیە پاشڤە برن.
 ئەو دووماهی جار بوو قەستا ڤێ‌ هۆلێ‌ بكەت، نە ب تنێ‌ ئەڤە ژی، بریار دا، هەر كەسێ‌ سەرێ‌ وی حۆچ بیت، خوە ژێ‌ دویر بكەت و چ دی قەستا سمیناران و جهێن ژڤی رەنگی نەكەت. دەما هەست ب مەزنبوونا تەمەنێ‌ خوە كری و دیتی پرچا وی یا دوەریێت و دێ‌ سەرێ‌ وی بەرەف حۆچبوونێڤە چیت، بەرەف پیشانگەها فروتنا ترومبێلا ڤەچوو و پارێن بەرامبەری ترومبێلا خوە وەرگرتین، ل چاندنا پرچەكا نوی مەزاختن، ب تنێ‌ دا ژ كابووسا حۆچاتیێ‌ نزیك نەبیت.

* د كوڤارا پەیڤ ژمارە 71 دا بلاڤ بوویە.
*پشتی ئەڤ كورتە چیرۆكا بناڤێ‌ بێهنشك هاتیە بلاڤكرن، ئەز هاتمە ئاگەهداركرن، كو چیرۆك نڤیسێ‌ روسی (ئەنتون تشیكوف) ژی چیرۆكەك بناڤێ‌ (مرنا فەرمانبەری) هەیە و پشتی من ئەو چیرۆك خواندی، من دیت نزیكیەك دناڤبەرا هەردو چیرۆكاندا هەیە، لێ‌ ئەو نزیكییا هەنێ‌، داخوازا لێبورینێ‌ یە بۆ چەندین جاران ژبەر ئەو بێهنشكا ژ دەڤی دەركەفتی. هەر چەندە ئەز ل باوەرم، ئەگەر هەمان بیروكەیا دەركەفتنا "بێهنشكێ‌" ببیتە بابەت بۆ نڤیسینا چیرۆكێ‌ ژلایێ‌ چەندین چیرۆك نڤیسانڤە، رەنگە نزیكیەك دهەمی چیرۆكاندا پەیدا ببیت، ژبەركو دەركەفتنا "بێهنشكێ‌" هیچ دەم و جهێن دەست نیشانكری نینن و دەرڤەی كونتروللا هەر مرۆڤەكینە، بوویە ئەگەر نزیكیەك هەبیت ژی، رامان ژێ‌ ئەو نینە كو هزرا چیرۆكێ‌ ژ چیرۆكا ناڤبری هاتبیتە وەرگرتنێ‌.

ليست هناك تعليقات: