یا باش ئەوە ژ عەرەفاتێن جەژنێ دەست پێبكەین، دڤان دوو روژان دا، شلق ب بازاری دكەفتن و ئەو دوو سێ هەڤالێن دكاندار ل نیڤا بازاری هوسا بەحسێ كارێن خوە دكرن، ئەڤە دوو هەیڤە مە كرییا دكانێ نە دەرئێخستی و شنی بیرا خەلكی لڤان دوو روژان هات كو جەژنە، هەر چەندە كەیفەك كەتبو سەر دەڤ و لێڤێن وان، لێ ئەو بخوە وەسا نەبو، ژ دەهـ بازاران، ئێكی تشتەك دكری و ئەگەر ژ پێدڤیاتیێن خوە تشتەك كری با، پسیارا عەسلی و ماركێ نەدكر و یێ بهایێ وی ژ هەمیان ئەرزانتر بازارێ وێ دكر. قەیرانا پانزینێ یا ژ نشكەكێ ڤە، نە بتنێ لدەف من بەلكو لدەف دەهان كەسێن وەك من پسیار دروست دكرن، بوچی پانزین ل پانزینخانێن حكومی بو ئەزمە و ل پانزینخانێن ئەهلی هەیە؟ پێنەڤێت من بەرسڤەك چێكری ڤێهەبو، لێ نزانم ئەو بەرسڤ دێ بدلێ چەندان بیت و دێ گلیزانكێن چەندێن دی ڤەكەت و من هوسا دگوت: خودانێن پانزینخانێن ئەهلی ژی خودان زارونە و وان ژی دڤێت جەژنێ بكەن، بخو هیڤی و رەجا ژ هندەكان خاستن، پانزین ژ پانزینخانێن حكومی هاتە برین و سیكا وان ڤەبو و تێهنشكا میزەخێن وان شكەست و ئەو ژی شییان شەكروك و چكلێتان بو جەژنێ بكرن!! بەری ژ شەكروك و چكلێتان دەربازی بابەتەكێ دی بین،
ئەو دكانا هەر سال ئەز شرینیێن جەژنێ و چەرەزاتان ژێ دكرم، راستە جهێ مروڤان ددكانێ ڤە نەدكر، بازارێ وی یێ گەرم بو و بدلێ وی بو، لێ ژ وان تشتێن من ژدكانا وی كرین بەرامبەری جەژنێن بەری ڤێ، من نیڤا وان تشتان راكرن و من گوتێ: ئەز دبێژم ئەڤە بەسن، بەریك زێدەتر تەحەمولێ ناكەت؟ گوتە من: ماموستا دلێ خوە نەهێلە ئەڤە حالێ هەمیانە و هەكە ژ شەرمێ نەبا، خەلكی ئەڤە ژی نەدكرین!. ژ خوە ئەڤ جیرانێن دهاتنە جەژنا من، ئاخفتنا ل سەر لێڤێن پترییا وان ئەڤ تامە ژێ دهات، هەر چەندە دلێ كەسێ یێ جەژنا نینە ژی و مودێلا جەژنا نەمایە، بەلێ پا جیرانیە و هندەكان دگوت "سننە تە و دڤێت جەژنا ئێك دوو پیروز بكەین". ژخوە بابەتێ ئەڤ سالە سەرنجا من راكێشای، بابەتێ سەربرینێ و قوربانان بو، هەر كەسێ نە شارەزا، دێ هزركەت (نەفیرعام) یا رابوی، ئەو بخوە بابەت دكەتە دناڤبەرا (چەكوچ و سندانی) دا و هەر ئێكی وەك خوە بابەت كومێنت دكرن، لێ نڤیسینا نڤیسەرەكی ل سەر فەیس بوكی، تشتەكێ گەلەك جوان بو و هوسا دگوت "ل سەر دەمێ (ئیبراهیم پێغەمبەر)ی، قوربانیدان ژ رێتنا خوونا مروڤان بو گیانەوەران هاتە گوهورین و پسیارا وی، ئایا مە چەند سەدان سالێن دی دڤێن تا ژ رێتنا خوونا گیانەوەران بو تشتەكێ دی بهێتە رێتن؟!". هەر چەندە ئەڤێن من رێزكرین مستەكا تشتان بو ژ دەریایەكا تشتێن دی، لێ دڤێت ژبیرنەكەین، دڤێت رێ و رەسمێن جەژنێ دپاراستی بمینن، ژبەر ڤان خالان: ئێك: جەژنا قوربانێ، دەربرینێ ژ پیروزیێن رێ و رەسمەكێ ئاینی دكەن، كو ئەم هەمی پەیرەو دكەین. دوو: جەژن كەیفەكێ دناڤ خێزانێ و زاروییان دا پەیدا دكەت و تشتێن نوی ل بەر خوە دكەن. سێ: هندەك مالێن مروڤێن خوە و ژوان ژی گەلەك نزیك، چ خال یان خالەت یان مەت و مام و پسمامان، ئەگەر جەژن نەبان، مروڤی نیڤا مالێن وان ژی نە دیتن، ژ دەولەت سەرێ موبایلان..
تێبینی:
دروژناما وار ژمارە 1417 دا بلاڤ بویە
%20copy.jpg)
ليست هناك تعليقات:
إرسال تعليق