زەنگا تەلەفۆنێ‌

تەلەفون بۆ هات و تەلەفون دا بەر گوهێن خوە.

ـ ئەلو؟

ـ ئەلو 2

ـ چ دەنگوباسێن راگەهاندنا ئەنجامێن تاقیكرنان، نینن؟!

ـ نە، یێن دبێژن دەمژمێر شەشی ئێڤاری دێ‌ ل مالپەرێن ئەنترنێتێ‌ هێنە بلاڤكرن.

   جارا دویێ یە ژ خەونێن خوە د ڤەقەتیێت، ڤێجارێ زەنگا تەلەفونێ بوو و جارا دی قیژیێن برایێ وێ یێ ساڤا. بریاردا ژ ئودێ دەرکەڤیت. ژ ئودێ دەرکەفت. دەیکا وێ گوتێ: کیڤە کەزی زەرا من؟ لێ زڤراند: دێ چمە د بەلەکونێدا؛ پیچەک بێھنا من یا تەنگە.

 ل جاددێ چەند کچێن زارۆک یاری دکرن، ھەر ئێکێ بیکەک لبەر سینگا بوو. زارۆکەکێ ژوان بەرێخوەدا بنک وێڤە و گوتە ھەڤالێن خوە: "ئەوا ھە بیکا منە د بەلەکونێدا، پرچا وێ وەک بیکا من یا زەرە". ھەڤالێن وێ پێ کرنە کەنی و گوتنێ: "ھەکە راستە بیکا تە بیت، دێ نوکە ھێت یاریکان دگەل تەکەت؟".

 ژ بەلەکونێ بەرەڤ دەرگەھێ شقێڤە چوو و شمک دا سەر پێن خوە و بەرەڤ جاددێ و زارۆکان برێکەفت. ل جاددێ بتنێ چەند گەنجان دگەل ئێک سوحبەت دکرن، ئێکی ژوان گوت: "ما من نە گوتە ھەوە، ئھا ئەڤە ھەڤالا من یا پرچ زەر ھات، دێ نوکە ھێت دەستێ من گریت و دێ وە ھێلینە بتنێ!"، دەما گەھشتیە دەف وان، دەستێ وی گرت و گوتێ: "دا بکەینە غار، ژ ڤارا ھەمیان دویرکەڤین..".

 دەنگێ دەیکا وێ نەھێلا بچیتە ژڤانێ، دەستێ وی بەردا و ل دەنگێ دەیکا خوە زڤری، دەیکا وێ گوتێ: "چاڤێ تە ل برایێ تە بیت، ئەز دێ چمە ڤێ مارکێتێ و سەر پێ زڤرم"، ھێشتا دەیکا وێ عەبا ل سەرێ خوە نە دانای، دیت عەبایێ ل سەر سەرێ وێ و ب دەرەجاندا ژووردا د چیتە خارێ.

 مارکێت ل سەرێ جاددێ یە. پارێن خوە کرنە د دەستێ دکانداریدا، لھیڤیێ ما، ھیڤییا وێ درێژ بوو و دکاندارێ ب بکرێن خوەڤە مژویل، ئەو ژبیر کر. سەرەک ل مارکێتێ و رەفاتکێن وێدا، ئەو تشت نەدیتن یێ دەیکا وێ دڤیان بکریت، ژ دکانداری پسیار کر؟! ھێشتا چ بەرسڤ نەداینێ برایێ وێ یاری ژێ دڤییان و دەھمەنێن وێ رادکێشان.

 روینشتە دەف برایێ خوە و گلیزانکێن وی ڤەکرن، بۆ تیقەلیقا کەنیا برایێ وێ و کەنییا وێ بکەتنا وێ ھات، ئەگەر ھەڤالا وێ دەستێ وێ نەگرتبا، دا کەڤیتە ناڤ وێ جووکا پیس، ئەڤا ل بەر رەخێ جاددێدا دچیتە خارێ، ھەر باش بۆ چاڤێن وان کوران ڤێنەکەفتین. ھەڤالا وێ گوتێ: "کەنیا خوە داعویرە تا گەنجێن ھەنێ ژمە دەرباز دبن، تە ھەتکا مەبر!". لدوور خوە زڤری، برایێ وێ یێ بچووک ل وان دران نەمایە، لێگەرییا، نەزانی چوو دکیش قولاچکێ را و ژ نشکەکێڤە دیت ل سەر کورسیکێ روونشتی یە و نارگیلە یا ددەستیدا، لدەف وی چەند گەنجێن دینە و ھەمییان بەرێن کورسیکێن خوە یێن داینە ئێک و سەرێن خوە یێن بنک ئێکڤە برین.

خوزی من زانیبا ھین چ دبێژنە ئێک، ھەڤالا وێ لێ ڤەگێراند و گوتێ: "خەما نەخوە جانا من، ئھا دێ بۆ تە بێژین، ھەما تو بخوە بخوینە، دێ زانی بوچی سەرێن مە نزیکی ئێک بوون". موبایل کرە د دەستاندا و ل نامان نێری، پەیڤا حەژێکرن و خوشتڤییا من و تە ناھێلم و بێی تە نەشێم بژیم. دەستێن خوە ژناڤ دەستێن وی ئینانە دەرێ، ئەگەر تو ڤان ھەمی پەیڤان دبێژیە من، ئەز دترسم بەری من تە گوتبنە گەلەک کچێن دی ژی؟ تو بۆ وێ ھزرێ ژ من دکەی، تو ئەو رۆژی یا لمن د ھەلێت و ژیانێ بمن د پەخشیت، تو ئەو ھەیڤی یا شەفەقێ د دەتە شەڤێن منێن تاری، گوھێ خو بدە لێدانێن دلێ من دا راستیێ بزانی، ھەر دەما دھێیە دەف من ھەمی تشت لدەف من ئالوز دبن، ھەناسەیێن من نزم و بلند دبن، ھەمی تشت تێک دچن. گوتێ: "کومبیوتەرێ تە یێ تێک چوویی و دڤێت بھێتە فورماتکرن، تو دشێی دەمژێرەکا دی بھێی وەرگری، دێ بۆ تە بەرھەڤکەم و بەری بچی ژی ژمارا تەلەفونا خوە بدە من، ھەر گاڤا ژ فورماتکرنێ تەمام بوو، دێ پەیوەندیێ بتە کەم". ھێشتا میلێن دەمژمێرا دەست نیشانکری ل سەر ئێک سیار نەبووین، ژوور تاری بوو و ئەلەکتریک ھاتە برین، ھەر باشە کومبیوتەرێ وێ (دیستکوپ)نە، ھەکە نەدشییا ل ئەنجامێن تاقیکرنان بنێریت، ئەنترێت وەکی رێڤەچوونا کیسەلەیە و بارێ وێ یێ گران بووی، شوفێر راوەستا و گوت: "ئەز ترومبێلێ ژڤێرە زێدەتر ناھاژووم، ڤێرە خوش جھە و بلا سەیرانا قوتابیان ئەڤ سالە لڤێرە بیت، ئەو جھێ وە بۆ من دەست نیشانکری گەلەک یێ دویرە و رێک یا نەخوشە". ما چ تشتێ خوش مایە، دلێن ھەمیان نە دخوشن، ھەمی د دو دلن و دلێن وان ل سەر سەدێ خوە دقوتن، بەرھەمێ سالەکێیە و ھەر ئێکێ دڤێت بزانیت رێژا نمرێن وێ چەند ژ سەدێیە و ھەر کچەکێ خەونەک یا ھەی، ھەر کچەکێ کولیژەک دڤێت و ھەر کولیژەکێ ژی نمرا خوە یا تایبەت ھەیە.

دەنگێ قوتانا دەرگەھی بیرا وێ ل ھاتنەڤەییا دەیکا وێ ئیناڤە، دەیکا وێ قاقا یێن بۆ برایێ وێ یێ بچیک ئیناین و کەیفا وی گەلەک ھات، نمرێن خیشکا وی لدویڤ خەونێن وێ نە، ئەو کولیژا وێ دڤێت دێ شێت قەست کەتێ.

 دەستێ خوە دا تەلەفونێ و ھێشتا زەنگا ئێکێ، گوتێ: "ئەلو، مزگینییا من لتە رێژا نمرێن تە 83 و پوینت سێ یە، ئەڤ کولیژا تە خەون پێڤە دیتین دێ شێی لێ خوینی". نمرێن من نە لدویڤ خەونێن من بوون، ئەز نەشێم دگەل خوشتڤیێ خوە ل ھەمان کولیژە بخوینم، نمرێن وی ژ یێن من زێدەتربوون، یێن من ژی نە د خرابن.

 دەیکا وێ گوتێ: "ما دەم نمرێن تە نە د خرابن و وەک تەڤیاین وەسا ھاتن، ئەز دێ جوانترین دیاری بۆ کچا خوە یا جوان کرم". جوانییا من و کەیفا من تو و برایێن منن و ھین بۆ من دیاری نە، دەستێ وێ کرە دناڤ دەستێ خوە دا و برە بەر دەڤێ خوە و ماچی کر.

ئەڤە ئێکەم کورە وێ ماچی دکەت، پەیوەندیێن خوە زێدەتر لێکرن و چەند زەنگا تەلەفونێ لێدابا، دزانی مزگینییا ماچەکا نوییە و چەند حەز ژوی دکر، ھند حەز ژ تەلەفونا خوە دکر، دەما ژێ ھاتیە داخوازکرن، ل سەرکەفتنا وێ ل ئەزموونان چ بۆ بکەنە دیاری، گوت: بتنێ موبایلێ ژمن قەدەغە نەكەن.

ــــــــــــــــــــ

د روژناما وار ژمارە 1410 دا بلاڤ بوویە.