ده‌م هات
ئه‌ز و شیعر و شێتاتى
روژیێن خوه بشكێنین و ل تاڤه هه‌یڤه‌كا دى
بگه‌رین
با، ڤان جوره په‌یڤان رامالیت و
ل بلنداهیه‌كا دى
خه‌ون و نڤێژێن حاجى ره‌شكان
بهێنه قه‌زاكرن!
مه نه‌دیت دوكێله‌ك ژ شعره‌كا مه بلند بوى
یان دناڤ پێكه‌نینه‌كێ دا به‌رزه‌بویم و
د خریقێن چویم
هێژ سیڤاندوك، یێ یاریا ب په‌نجه‌را مه دكه‌ن
هێژ خدرویێ
ل جاده‌یێن دهوكێ به‌رزه‌یه و
نیڤه‌ك له‌شێ وى رویس دكه‌ت
هێژ شه‌ڤ وه‌ك هه‌ر شه‌ڤه و
با، هه‌میان بێده‌نگ دكه‌ت
زارو دنڤن
گول بێهنێن خوه دنخێڤن
چنارێن بلند سیبه‌رێ ناده‌ن
ئه‌و باخچه‌یێ هه‌ر ژ كون سپێدێ و تا ئێڤارى
لێ حه‌شامه‌ت
ئه‌و جاده‌یێن پیاسه لێ دهاتنه كرن
ئه‌و تاڤه روژا، هه‌میا رادكه‌ته پیا و
مایه ڤه بێ پێژن
دكه‌ڤمه دنیڤا لاپه‌ران دا و
شه‌رى دگه‌ل بێ بێده‌نگیێ دكه‌م
ئه‌ز و شه‌ڤ
دناڤ باخچه‌یێن بێ به‌لگ و
دناڤ گولێن بێ ره‌نگ دا
من ده‌ست ژ نڤیسینێ به‌ردا و
دێ دتابلویه‌كى دا كاركه‌م!
دتابلوى دا
پایزێن بێ به‌لگ كه‌مه رویساتى
هه‌میا ژ نێزیك بینم
عه‌ورا و هه‌كو بارانێ ژ خوه دا دقوتن
یان بلبلا هه‌كو پروڤا دكه‌ن و
یێ ژ هه‌میا ده‌نگ تویژ تر
ناڤێ وى بو كبارێ دنڤیسن
چه‌ند جوانه گهورینا نامان دگه‌ل ته
یان ژڤانێ ئێكێ
ل ناڤ هه‌لزا گوندێ لێ ژ دایك بویم
هه‌كو ته ترانێن خوه ب شویماتیا من دكرن
تو د بویه ئاقارێ شه‌رمێ و دناڤ خوه دا به‌رزه دكرم..
هه‌ر ژ ئاقارێ شه‌رمێ
دێ نڤیسینێن خوه د تابلوى دا ره‌نگ كه‌م
تابلوى كه‌مه موزه‌خانه و
ته تێدا كه‌مه په‌یكه‌ر
ناهێلم خدرو
جاره‌كا دى ب بیته پێترانكێ هه‌ڤركیێ
یان چه‌ند حاجى ره‌شكه‌ك نكلێ خوه د مه‌ى
ب هه‌لینیت
جوته‌كێ سنه‌تا قه‌زا بكه‌ت
ئه‌ز ره‌نگێ ره‌ش دتابلوى دا بكار نائینم..
چ سه‌مفونیه‌كا بێده‌نگه و
چ یا ب شه‌رم!
دچیته دخه‌ونا ئه‌وێن بیر دكه‌ن
موسیقاژه‌ن، یێ بێ چاره‌نڤیسه و
ل سه‌ر ده‌پێن شانوێ
سه‌مفونیا وى نه‌هاته نمایشكرن
هێژ چه‌پله بو نه‌هاتینه لێدان!
ده‌مه‌كه و من پیاسێن ئێڤاریان ژبیركرین
من گوت: به‌رپه‌رێن پیاسان نه ڤه‌كه‌ن؟
پیاسێن پایزان دكورتن
به‌لگێن وه‌ریاى زوى خرڤه نابن
تو چ ژ خو كوشتنا به‌لاتینكان دزانى
ته، ستران بو بێده‌نگیێ نه گوتینه
هێژ تو یێ دوه‌رزێ وه‌ریانا به‌لگان دا
بێده‌نگیا د دویف ته را دخشیێت
ته نه لبیره
ده‌نگ ژ بێده‌نگیێ نا هێت!!
ژ دویر
ژ دویر دیمه‌نێ وه‌ریانا به‌لگان جوانه
هێژ تابلویێ بێ پێناسه یه
هێژ سه‌رخورانا ره‌نگا یه
هێژ ئه‌زێ دگه‌رم
ل ده‌مه‌كێ دى، زه‌مه‌نه‌كێ دى و ئێڤاریه‌كا دى
هێژ سه‌مفونیا بێده‌نگه و شانو نه هاتیه نمایشكرن
وه‌رزێ وه‌ریانا به‌لگانه و
من، ژ دویر دیمه‌نێ وه‌ریانا به‌لگان
پێ خوشه
پایز ب وه‌ریانا به‌لگان بێ نڤێژ نابن..
تێبینى:
نه پایز وه‌ریانا به‌لگان دهێلیت و نه ئه‌ز ده‌ست ژ نڤیسینا شیعران به‌ر دده‌م.. ئیمزا هوزانڤان
ليست هناك تعليقات:
إرسال تعليق