كار و ڤەدیتنا كاری.. بەرنامێ (كار و رێنجبەری) وەك نمونە

 عبدالرحمن بامەرنی

ئێك ژ بەرنامەیێن گرێدان ب ڤەدیتنا كاریڤە ھەین، بەرنامێ (كار و رێنجبەری)یە ژ پێشكێشكرنا رێژین ئەحمەد و دھەر خەلەكەكێدا، ئەڤ كچە قەستا پیشەیەكێ جودادكەت و وێ رۆژێ تا ئێڤارێ لدەف خودان پیشەیەكی دەست بكاردبیت و رۆژانا خوە وەردگریت. دەستخوشیێ ل وی كەسی دكەم یێ ھزرا بەرنامەی دارشتی و دەستخوشیێ لڤێ كچێ ژی دكەم كو یا دبێژیت چ كارەك ب زەحمەت نینە، بتنێ لێگەریان و خوە ماندیكرن بۆ دڤێت و ھەمی كاران دكەت یێن گەلەك ژخوە نەگرن وی كاری بكەن. ئەرێ كچەك ل بەرچاڤێن ھزاران كەسان بچیت بۆ نمونە كارێ پاقژكرنا ئاڤرێژان بكەت و كورەك نەشێت ڤێ بكەت! ئەكید دڤێت كور ژی و كچ ژی ھزرێن خوە بۆ كاری و ئەڤا بناڤێ (شەرمەیە) ژ سەرێ خوە بینە دەرێ.

ئەگەر نمونەكێ بینم، بەرییا چەند سالان بوو، خزمەكێ مە گازندە ژ نەبوونا كاری دكرن و دوو سێ كورێن وی دبێ كاری بوون و بەحسا گرانیا بازاری و جەژنێ دكر، كو بھەلكەفتا جەژنێ مە ئێكدوو دیتبوو، من گوتێ راستی شول یێ ھەی و كورێن تە لكاری ناگەرن، دڤێت مرۆڤ ل كاری بگەریێن و كار ل مرۆڤی ناگەریێت، گوت چاوان؟ من گوتێ بەری چەند رۆژان عەرەفاتێن جەژنێ بوون، ل نیڤا بازاری و ب شەڤێ خەلكی تشت ل سەر جاددێ د فروشتن و ھەر كەسەك دشییا كارتونەكێ دانیت، چ پێلاڤ یان دەمژمێر یان چكلێت و شیرینیێن جەژنێ یان ھەر تشتەك با فروشتبایە و دا قازانجەكێ باش كەت، گوتە من ماددێ چاوان چن سەر جاددێ تشتان فروشن و كورێن من دەرچوویێن زانكویێ!!

خزمێ من دەستێ خوە دانا سەر بەرچاڤترین كێشە، ئەو ژی دێ چاوان ژخوەگرن؟! ژبەركو كورێن وی وەكی سەدان گەنجێن نوكە بێ كار دەرچویێن زانكویێ و ئەو ژی دێ چاوان ژخوە گرن!! مەبەستا من ب ئینانا میناكێ ڤێ كچا بەرنامێ (كارۆرێنجبەری) ھەمان تشتە، ئێدی دڤێت ئەم فێربین دێ چاوان بۆ خوە لكاری گەرین.

دڤێت گەنجێ مە و زانكویێن مە و وەزارەتا خواندنا بالا ژی بزانن، ژ دەرئەنجامێ سەقەتییا زانكویێن مە، خوێندكار نەھاتیە فێركرن كو بشێت كارەكی بدەستخوەڤە بینیت و ژ سەربورا خوە و بسپورییا خوە ژی، دەما دچیتە سەركارەكی ژی یێ زیرەك نابیت، ژبەركو تێرا وێ چەندێ نەھاتیە راھێنان و فێركرن كو وی كاری ببەتە سەر و تایبەت ئەگەر كار ل كەرتێ تایبەت بیت، ژبەكو ھینگێ باوەرنامە مفای ل وی ناكەت ھندی ژبەرچوونا كاری و دیسان ھند ھزرا وی ل سەر كاری نینە، ھندی ل سەر كو ئەڤە نەكارێ منە و دێ بێژیت ئەز و ئەڤ كارە و ئەز دەرچووی!!

ئەز زێدەتر ل سەر ڤێ خالێ ناراوەستم، ھندی ل سەر وێ گوتنا دبێژیت (ھەرێ رەشو بدەستێن خوە ئەگەر ئاڤێ تو بری) و بێكاری ژی یان كو كورتییا وێ ئاڤبرن و سەقەتبوونا گەنجیی یە، دەما بێ ئومێدی خوە پێدا دخشینیت.

ـــــــــــــــــــــــــــــــــ

https://www.facebook.com/photo/?fbid=10217081007057665&set=g.209899095715001

http://www.rwangauraxna.com/ba/detail.aspx?IDNews=6191