یێ تێر ھایژ یێ برسی نینە.. (قەیرە كچ وەك نمونە!)

 ع: بامەرنی

ئەز دێ بۆ گوتارا خوە پشت بەستنێ ل سەر ھەوالەكی كەم، كو د سوشیال میدیایێ دا بلاڤبووی، ھەر چەندە ئەز ژ راستیا وی یێ پشت راست نینم و بۆ من گرنگ نینە ژی یێ راست بیت یان نە! دەما ل سەر زارێ دادگەھا بلندا فیدرالی یا عیراقێ بلاڤ بووی، (ل سەر ھەر گەنجەكێ بتنێ ھەڤژینەك ھەی پێدڤییە بكەتە دوو، ئەگەر دێ ھێتە سزادان...). ھەوال ھێشتا یێ درێژە لێ من گوت ئەز ژ راستییا وی یێ پشت راست نینم و لێ یا گرنگ بۆ من، ئایا ئەڤە بخوە بابەتە یان نە؟!

دكومەلگەھێ مەدەنی دا وەك چالاكڤانەك، ئەم ل سەر ھەمی رێژەیێن مرۆڤان كاری دكەین، بۆ مە ھەمی گرنگن، چ زارۆك بن یان مەزن یان پیر، چ جورێ پیستێ بیت و چ رەگەز بیت و تایبەتی ژی ئەڤ تەخێن پەراوێز خستی یان كو یێن ژبیركری و بابەتێ قەیرەبوونا كچان ژی، مە گەلەك جاران ئێخستیە بەر دان و ستاندنێن خوە و تایبەتی پشتی قەیرانا ئابوری ل سالا 2014 و ھاتنا داعشێ، رێژا گرێبەستێن ھەڤژینیێ كێم بوویە و دەما ئەم دبێژین كێمبوویە، ئەم ھزرێ ل دوو خالان دكەین:

ئێك: دكومەلگەھەكێ وەك یێ مە یێ كوردی، عەشیرگەری و ئایندار، تێكەلیێن كور و كچان نینن، ئەگەر ھەبن ژی ب رێكەكا تەندروست نینن، مەبەستا من ب تەندروستیێ، ئەو دەرفەت بۆ ھلناكەڤیت دروست د ئێك بگەھن و حەژێكرنا وان ل سەر بنەمایێ ڤیانێ و رێگرتنێ و د ئێك گەھشتنێ بیت، ھینگێ پرۆسا ھاوسەرگیریێ بخوە دچیتە پاش و تەمەنێ كور و كچان مەزن دبیت و دەما كورەكی بڤێت بۆ خوە كچەكێ بخازیت، دێ مالا وی بۆ ل كچەكا تەمەن بچیك گەرن و ھوسان دەرفەتا كچان بۆ شووكرنێ كێم دبیت.

دوو: دگەل ھاتنا قەیرانا ئابوری، دەلیڤێن كاری كێم بوون و رێژا بێكاریێ زێدەبوو و ھەژاری و گرانبوونا تشتان دگەل خوە ئینا، ئێدی بۆ گەنجان بزەحمەت كەفت ڤێ پرۆسێ پێكبینن، ژبەركو شیانێن خوە رێڤەبرنێ نینن و بۆیە ھەر ژ دەستپێكێ خوە ددەنە پاش.

دڤان ھەردوو خالێن ل سەریدا من گوتین، رێژا قەیرەبوونا كچان و زگوردییا كوران زێدە دبیت و لێ وەك بەراوردیەك یا كچان گەلەك و گەلەك زێدەتر دبیت، ئەگەر رێژا گەنجان ئەڤێن بەرەڤ دەرڤەی وەلاتی چووین و دچن وەربگرین و ھەڤبەر بكەین، دیسان رێژا قەیرەبوونا كچان ژبەر خالەكا دی ژی زێدە دبیت، ئەو ژی كوری دەرفەتەكا زێدەتر ھەیە ژ یا كچێ، ژبەركو دەیك و باب و برایێن مەزن ب شانازیڤە بۆ كورێ خوە ل كچەكێ دگەرن و ھیچ جارەكێ ژی د بەرھەڤ نینن، بۆ كچا خوە ژی سەحكەنە زاڤایەكی.

ژ دەرئەنجامێ ئەڤ ھەمی خالێن ل سەر من گوتین و ئاماژە بۆ داین، رێژا قەیرەبوونا كچان بەرەڤ ھلكێشانە و ئەز دگەل ئینانا ژنا دوویێ نینم، كو وەك دڤی ھەوالێ ل دەستپێكێ من ئاماژە بۆ دای، ژبەركو ئەو دێ كێشێ مەزنتر لێكەت شوونا چارەسەر بكەت، لێ نابیت ھیچ تەخەك بھێتە پەراوێزخستن و مەبەستا من پێ قەیرە كچن.

لڤێرە ئەم دشێین رێكەكا دی بگرینە بەر، ھەر چەندە ئەگەر ل گەلەك وەلاتان ھاتبیتە بكارئینان ژی، لێ بۆ كومەلگەھەكێ وەك یێ مە ژ باشترین رێكانە، ئەو ژی ڤەكرنا نڤیسینگەھێن لێكگەھاندنا كور و كچان، لێكگەھاندنا بێوەژن و ژنمرییان، ئەڤە ژی ب رێكێن یاسایی بھێتە كرنێ، ناڤ و نیشان د پاراستی بن و كور و كچ، دایك و باب دشێن باشترین ھەڤژین بۆ كور و كچێن خوە دەست نیشان بكەن و گەلەك ژنمری و بیژن ژی ھەنە و ژ كومەلگەھی شەرم دكەن و ئەو ژی بڤێ رێكێ دێ شێن ھەڤژینیێ پێك ئینن.

ئەڤ چارەییا وەك تاكە رێك وەك پێشنیار من بەرچاڤ كری، من بتنێ بۆ نڤیسینا گوتارەكێ نە ئینایە زمان، بەلكو ئێك ژ رێگە چارەیانە و دڤێت لایەنێن پەیوەندیدار خوە لێ بكەنە خودان و خەلكی ھانبدەن، كو بەرەڤ ڤێ رێكێ بچن و ئاسانكارییان ژی بۆ بكەنhttps://www.facebook.com/photo/?fbid=10217120159116442&set=g.209899095715001

ـــــــــــــــــــــــــــــــــــــ

http://www.rwangauraxna.com/ba/detail.aspx?IDNews=6230