كورتە چیرۆك
نیهاد عەبدولستار رەشید
وەرگێران: عبدالرحمن بامەرنیش
دەما ئەز ل پاصێ سیاربویم ئەڤا دێ مە گەهینتە بەغدا، من پرتەكا نانێ كەڤن ل سەر وێ كورسیكێ دیت، ئەڤا بو من هاتیە دەستنیشانكرن كو ل سەر روونمە خارێ و د پەنجەرێرا، من هاڤێتە د ناڤ بەرمیلەكا نزیكدا. دەنگێن نە رازیبوونێ هاتنە گوهێن من، ژ كورسیكێن پشتێ یێن پاصێ دهات و پیچەكا زڤراتیێ دگەلدابوو: "بوچی.. نێ گونەهە؟.. ما ئەڤە نە (نیعمەتا) خودێ یە!". ئەز پیچەكێ مەندەهوش مام، تشتەكی ئەز نەچاركرم، لدوور خوە بزڤرم، ئەو دەنگ ل بەر گوهێن من نە یێ غەریب بوو. ل سەر ملێ خوە، ئەز ل وی كەسی دگەریام یێ دلوڤانی ب وێ پرتا نانی دبر، من دیت و باش ل ناڤ چاڤێن وی نێریم، من پسیار ژ خوە كر: "ئەرێ ئەڤە نە (ئەبو سامی) یێ گوشتفروشە؟".. بۆ چەند چركان بێدەنگیێ خوە كێشا ناڤ پاصێ، من هەست ب بێهن تەنگیێ كر، لێ من بێدەنگیا خوە پاراست، ژبەركو من نەدزانی ئەز چ بێژم، كو پێ بەرسڤا وی بدەم، ل سەر جهێ خوە روونشتم و من كارێن وی یێن نە مرۆڤاتی ئینانە بەرچاڤێن خوە و من پسیار ژخوە كر: "بوچی ئەو نوكە خوە بدلوڤانیێ و نازكیێ و نەرمیێ دئینتە دەر؟
لڤین كەفتە روودانێن كەڤن و وێنەیێن د بیردانكا مێشكێ سەرێ مندا بەرچاڤبوون، من هندەك دیمەنێن بومبەبارانكرنا ئەمریكا ل سەر خانیێن ئاكنجیان ل دەڤەرا مە، نزیككرن، تشتێ ژ هەمیان زێدەتر مایە د بیردانكا مندا، ئەڤ گوشتفروشە بوو و دەما ل ناڤ خانیێن بومبەبارانكری دگەریا و ل ناڤ جلكێن قوربانی و برینداران، ل پاران دگەریا، بێی هاریكاریا تیمێن هەوارهاتنێ بكەت بۆ راكرنا قوربانیان.
من بیردانكا خوە بو رابردویەكێ نزیك ڤەگەراند، وێنێ وی هاتە بەرچاڤێن من دەما دا گولكەكی ل بەر چاڤێن دەیكا وێ ڤەكوژیت. چریسەتێ ئەز گرتم و من دگەل خوە دا گوت: "مانە ئەركێ گوشتفروشی یە رێزێ ل هەستێن دایكینیێ بگریت، دەما گیانەوەرەكێ ڤەدكوژیت؟ ئەڤ گولكێ دەیكا وێ پێ بدوو گیان كەفتی و زایی و ب بێهنا تەڤنپیركێ داڤ داڤ مەزنكری، پێنەڤێت كارتێكرن دێ ل دەیكێ بیت دەما دبینیت گولكێ وێ، ل بەر چاڤێن وێ دهێتە ڤەكوشتن".
ل سەر دێمێ چێلێ نیشانێن ئێشانێ و بێچارەیێ دیار دبوون و ئەزێ راوەستایی و دیمەنێ كارتێكەر ب خەموكیڤە دبینم، گولكی هەولدان دكرن خوە ژ ناڤ دەستێن گوشتفروشی رزگار بكەت، عوورێن بۆ دەیكا خوە رادهێلان كو د هەوارا وێ بهێت. چاڤێن وێ ژی رك و رك لێبوون، مرۆڤی د چاڤێن وێرا گازی و دلوڤانی و هیڤی ددیتن. هەستێن دەیكینیێ، گیانێ چێلێ هەمی دهژاند. هەناسێن وێ بلەز و بەز بوون و دلێ وێ ژ قوتانێ نە دراوەستا، پێن وێ دلەرزین و چ هێز د لەشیدا نەدما، ژ بەر وێ ئێشانا كەتیە ناڤ دەروونێ وێ.
روندك د چاڤێن مندا د پەنگیان، لەرزین كەتە ناڤ هەستیێن من، ترسێ حەفكا من گرت، من دڤیا من ئەو گولك كێشابا ناڤ دەستێن خوە و من ب سینگێ خوە ڤە گڤاشتبا، من هەست بخوینا خوە دكر ژ بێ دلوڤانیا گوشتفروشی چاوان د فیریا، بەلێ دێ چ رێك بینم پێ رزگار بكەم؟ هاتە هزرا من ئەز گولكی بكرم.. پیچەك ب بێهن تەنگی و دەنگ بلندی من هەڤسارێ گولكێ گرت و گوتە گوشتفروشی: "ئەز دێ ڤێ گولكێ كرم"، تشتەكێ ژ قەستا بوو ئەز خوە ب گوشتفروشی ڤە مژوول بكەم، بۆ هزرا كرینا گولكێ! دەست بكەنیەكا پێترانكی كر بۆ وێ بەرهەڤبوونا من ژ بۆ كرینا گولكی، دەست ب پاشڤەبرەنا من كر، هەر وەكو داخازا من یاریپێكرن ب وی..
چاڤێن گولكێ و چێلێ بۆ چەند چركان مانە پێكڤە، وەك بالندێ چەنگ شكەستی، گولكی خوە رادەستی كێرا گوشتفروشی كر، دەیكێ ل دیمەنی دنێری و دلێ وێ روندك دباراندن. من هەست پێكر هناڤێن وێ یێن كەر كەر دبن و ئەوێ ب بێدەنگی تەماشەدكر.
من شیا هزرێن خوە كومكەمە سەر ئێكڤە، دەما پاصێ دەست ب چوونێ كری و دەما ژ بەرێخوەدان و دەنگێ جاددێ دەرباز بوی، بتنێ ئێك حەفتی د سەر ڤێ روودانێرا دەرباز ب بوو، بەلێ تشتەكی دناڤ مندا هەستێن من لڤاندن.. من زانی وی دڤییا بگەهیتە چ.
• د رۆژناما صباح كوردستان ژمارە 41 دا بلاڤ بوویە.
%20copy.jpg)
ليست هناك تعليقات:
إرسال تعليق