بیست دەرهەم
حەمید ئەلیوسفی
و، عبدالرحمن بامەرنی
نوكە دكومەلگەهیدا تشتەكێ دی یە.. یێ بوویە خوادنێ بیست دەرهەمان د بەریكا خوەدا.. دەرازینكا هەژاریێ دەربازكر، هەر وەكو وەزیرا هەماهەنگیێ و خێزانێ گوتیێ و ئەو ژناڤ قوبا پەرلەمانی دەردكەفت.. بەلێ بیردانكا وی نەمایە.. چ خانی نینن.. نەشێت پارێن كرێیا بانەكێ تایبەت بدەت.. د خەیالێدا، چوار حوری لێ د مارەكرینە و چ جوانی ژێ د پەشیت.. هیبوویە نڤستنا ژ دەرڤە.. پارێ كارەبێ نادەت و هەمی گلوپێن كولان و رێكا یێن وینە.. دەما ژ بن دیواری رابویی، دڤیابا هەمی تشتێن خوە دگەل خوە هلگرتبان.. تشتێن وی گەلەك سڤكن و تا وی راددەی وی پێدڤی ب چانتێ ژی نەبیت.. كێشەییا وی دگەل دەستئاڤێ یە.. دەما ریهـ و خێلی باژێرەكی پرێڤە دبەن، كێشە بەرزە دبن و خەلك دەرازینكا هەژاریێ دەرباز دكەت.. خودێ شیانێن داینە هەڤژینێن وی، وەك مەلائیكەتان نە دخوون و نە دكەنە بەرخوە و نە ڤەدخوون و نە زارۆكان دئینن و ناچنە دەستئاڤێ ژی.. ل نزیك رووباری دیار دبن و ژ دارا سێڤێ دخوون و ب بەلگێن تهیركا پێسیرێن خوە د نخێڤن و بێهنەكا خوش ژ وان دفریت، هەمی بێهنێن نەخوشێن لەشێ وی ژ وی دوور دئێخن.. هیڤیخوازبوو ئەگەر هەر رۆژ وان ئەو دگەل خوە بربانە جیهانا خوە یا گەرم.. دناڤبەرا وی و واندا، پر هەنە و حەفت ستێر وان دووری ئێك دكەن.. ل سەر شەرە، ل سوریا و لیبیا و عیراقێ یان ئەوێ قایشا (تی ئێن تی) گرێددەت.. ئەڤ عەسمانێ بەردریایی، ل بەر سینگا وی دەستئاڤە.. دوهی باپیرێن وی جەرێن ئاڤێ دروست دكرن و هەمیان ئاڤا ب هەروە ژێ ڤەدخوار.. ئەڤ شوونوارە هەمی بەرزەبوون.. برەنگەكێ چر ل ئاڤێ دگەریا.. ئەو خوە نا شووت.. سەروچاڤێن خوە نا شووت.. دەست نڤێژێ ناگریت.. ناچیتە مزگەفتێ، بتنێ ئەگەر پارەی بەرامبەر بدەت.. دەستێ خوە برە سەر قروشێن د بەریكا خوەدا و دەستێن خوە ژ سەرما پەرخاندن.. دڤان رۆژاندا پلێن گەرماتیێ گەلەك یێن هاتینە خوار.. دەستێن خوە برنە سەروچاڤێن خوە.. چەند رۆژە ئەڤ ریهێن نەفرەتكری نە تراشین.. ئەرزنكا خوە د خورینیت.. توز كەفتیە سەر پرچا سەرێ وی، ئەڤا هووسا زیكا دهێت و درێژ دبیت.. ب دژواری كوخی.. تف كرە رەخێ خویێ راستێ.. خوونەكا رەش تێكەلی تفا وی ببو.. تف كرە رەخێ چەپێ.. بیرا وی ناهێت جارەكێ چبیتە نەخوشخانێ یان سەرەدانا نوژدارەكی كربیت یان چبیتە د دەرماخانەیەكێ ڤە..
ژ دژواریا سەرمایێ دەستێن خوە پەرخاندن و برەخ خوارنگەهەكا مللی ڤە راوەستا.. سێ كورسیكێن داری یێن لاكێشە و رەنگێ خوە یێ رەسەن ژ دەستداین، ل بەرامبەری مێزەكا بلندتر ل نیڤەكێ و هند مایە بەژنا كورت و لەشێ لاوازێ خودانێ خوارنگەهێ ل پشت خوە بەرزەكەت، ل تەنشتا وی قوریكەكێ چایێ یێ مەزن و قازانەك ل سەر ئاگری دكەلی و شیشەكێ روونێ مللی و هندەك دەرمانك و بهارات بوون.. دانەك ژ سێنیەكا بچووك ژ (بیصارە)، دگەل پیچەكا روونێ مللی و نانەكا بچووك و پیالەكێ چایێ ب پێنج دەرهەمان.. ل باكوری تامەكا دی ل سەر زێدە دكەن و ب فونەتیكا ئسپانی دبێژنێ (لا بەیسار).. دەستێن خوە برنە بەریكا خوە.. سەرێ وی گەرم نەبوو كو برەخ بكرانڤە روونتە خارێ.. دێ د خەیالێدا ل تەنشت حوریێن خوە تێشتا خو خووت.. بەرەڤ گورەپانەكا مەزن ڤە چوو.. خەیال كر ئەوی سێ جگارە ب سێ دەرهەمان كرین.. وەكی كومەكا مرۆڤان ئەڤێن ژ پێرڤە د راوەستیایی، جگارا خوە كێشا و وەك وان خوە ل هیڤیا پاسێ گرت، ئەڤا دێ وان بۆ كاركرنێ بەرەڤ چەمێن نزیك بەت.. تا نیڤرو ما راوەستایی.. هەر سێ جگارێن خوە بدوماهی ئینا بوون.. ناچیتە چایخانێ.. پشتی دەمەكێ كێم ئەو دێ نەچار بیت و فراڤینێ كریت و دڤێت بهایێ وێ پاشكەفت بكەت.. زڤری تەنشت خوارنگەهێ ڤە.. سێنیەكا بچوووك یا نیسكێ یان (لوبیكا) و پرتەكا نانی ب دەهـ دەرهەمان.. هەست ب قروشێن خوە د بەریكا خوە دا كرن و د خەیالێدا فراڤینا خوە خوار.. حوریا كرنە كەنی و نیسك دگەل وی نەخوارن.. هەست بگرانیا سەرێ خوە كر.. جگاران ناكێشیت.. پارێن بەریكا وی تێرا وێ چەندێ ناكەن هندەك جگارێن دی بكریت.. دەمێ مای دێ لكیڤە بورینیت.. ئەگەر ژ جهێ خوە چوو دێ لڤینێن وی زێدەتر لێهێن و ئێڤاری دێ پێدڤی خوارنا شیڤێ بیت و بتنێ دوو دەرهەم یێن دگەلدا ماین و شیانێن نڤستنا دگەل حوریەكێ بتنێ ژی نینن و پا تو بۆ چوار حوریان چ دبێژی..
ئێڤاری هەست ب گێژبوونێ كر.. حوری بەرزە بوون.. دا دلێ وی گریت.. نەشیا دیمەنی تەمام بكەت.. بەرەڤ دەرهێنەر (عەبدولحەق بەسیمی) ڤە چوو.. بیست دەرهەمێن وی بۆ زڤراندنە ڤە و ژێ داخواز كر، ئەو بخوە بچیتە جاددێ و ئەو بخوە خو د سەر دەرازینكا هەژاریێ را بهاڤێژیت..
• د رۆژناما صباح كوردستان ژمارە 49 دا بلاڤ بوویە.
%20copy.jpg)
ليست هناك تعليقات:
إرسال تعليق