دیاریە بۆ (عسمەت محەمەد بەدەل)
چەند شەڤەكە ھەردەما كەفتمە ناڤ نڤینێن خوە، مریشكا مە یا باژێلە دكەفتە سەرێ من و ئەڤە دایكا من گوتی مریشكا مە یا باژێلە بوویی و ھێكێن خوە ل جھەكێ دی دكەت؟! ئەز یێ بوویمە شڤانێ وێ و كا دێ ھێكا خوە ل كیرێ دانیت! جیرانێ مە یێ بۆ دەرمانی ژی مییەك ب سەری ڤە نەمایی، ھندی بێژی یێ جوامێرە و پێشنیارا بازارێ ھێكفرۆشان دامن، ئەز دەستا ژ مریشكێ بەردەم و بۆ دلێ دەیكا خوە، تەبەقەكا ھێكا ژ بازاری بكرم و رۆژێ ھێكەكێ بكەمە دناڤ دەستێن دەیكا خوەدا و مریشك بلا ھەرا باژێلە بیت، ھێكێن ئەو دكەت ژی بلا ھەر بۆ كەسەكێ دی بن، دێ دلێ دەیكا من ژی خۆش بیت و ئەز ژی دێ تێر نڤم.
ل بەراھییێ جیرانێ من یێ مییەك بۆ دەرمانی ژی ب سەریڤە نەمایی، خۆش گوت و من ب یا وی كر. من دەست ژ لێگەریانا مریشكێ بەردان و ل كیرێ باژێلە ببیت، بلا ل وێرێ بیت. ھێكا دناڤ ھێلیڤانكا كیژ مالێ دا بكەت، بلا بۆ بكەت و دو سێ شەڤەكێن ئارام من دناڤ نڤینێن خوەدا دەربازكرن و ڤێجارێ دەیكا من ھات و گێسكێ وێ یێ د دەستیدا و خەو ژ چاڤێن من مالشت، ئەگەر شەرم نەبیت و ڤی تەمەنێ من، چەند گێسكەك ژی ل پاشییا من دان و نە بتنێ خەو چوو، مریشك چوو و دەیكا من ژی دگوریدا نەفرەتان ل وێ رۆژێ دكەت، یا باژێلەبوونا مریشكێ ئێخستییە ستووێ من!
ھەڤالێ من یێ دزانیت ئەز د چ حالدامە و ڤیایی ل سەر من سڤك بكەت، گوت: "مریشك ل كیڤە و باژێلە بوون ل كیڤە و ھێكێن وێ ل كیڤە و دەیكا تە یا بەری چەند سالان مری ل كیڤە و خەوا تە ل كیڤە؟". ھەڤالێ من ژی راست دگوت، لێ من شەرم كر بێژمێ، ئەڤە ژ وێ رۆژا مە دەست ژ ھێكێن مریشكا خوە بەرداین و مە پشتا خوە ب بازارێ ئازادێ ھێكفرۆشان گەرمكری، مریشكا مە یا باژێلە بۆ ھێكان ل مالێن جیرانایە و بۆ قدقدێ ژی ل بەر دەرۆكێ مالا مەیە.
ھەڤالێ من یا ل سەر خوە راكر و جیرانێ من یێ مییەك بۆ دەرمانی د سەری را نەمایی، حەقێ جیرانییێ دایێ و دا دەیكا من دگوریدا یا ئارام بیت و نەفرەتان ل وێ رۆژێ نەكەت یا باژێلەبوونا مریشكێ كریە خەمان من، من مریشك كرە د كۆلكیڤە و من مریشك داكر و دڤیابا رۆژا ئێكێ من ئەڤ چەندە كربایە و من مریشك ل جھێ وێ راوەستاندبا.
زیلا عەسكەری:
ئەڤە چەند رۆژە ئەم لڤی چولی بنەجھ كرین و نە ئەم دزانین دێ چكەین و نە ئەم تشتەكی ژ چارەنڤیسێ خوە دزانین؟ ئەڤە گوتنێن زەلامەكێ ژیێ خوە ژ حەفتێ سالییێ دەربازكری و دو پێنگاڤان نەشێت ل سەر ئێك بھاڤێژیت، ھەر زوی دبیتە حلكە حلكا وی و خوە بەرددەتە عەردی. نەدیتنا وان، ژ برس و چارەنڤیسێ نەدیارێ ئەم تێدا سەدجاركی خۆشترە! ئەڤە گوتنێن دایكا كچەكا د دەھكێن خوە یێن دوویێ دابوو و ئەو كچ یا گوھشی و سەرێ وێ دناڤ كۆشا دەیكا وێ دابوو. ئەم دێ لڤی چولێ خودێ چكەین و زەلامێن مە ب چ سەرداچوون و كی دێ شیری بۆ ڤان تفالان پەیدا كەت؟ ئەڤە گوتنێن ژنەكێ بوون، تفالەكێ ل بەر سینگا وێ بوو و زارۆكەكی ژی خوە ب دەھمەنێن وێڤە كربۆ نۆژ.
ئەڤ چیرۆكا دناڤ دەستێن مندا، رێك بەحسا سالا 1988ێ یە و جھـ (بەحركێ)یە و ئەڤ كەسێن لڤی چولی ژی بنەجھكرین، ئەنفالكریێن كوردن. چیرۆك ڤەگێرانا دیمەنێن ئەنفالایە و ئەز دڤێ چیرۆكێ دا زارۆكەكێ ھەرزەكارم و ھەر ژ خۆ رادەستكرنا مە، بابێ من دانە بەر قونتاغێن تڤەنگا و پالەك پێرانان و ھاڤێتنە ناڤ چەند زەلامێن دی و (زیل)ەك ل بەر راوەستاندن، چاڤێن وی ركۆرك ل مە بوون و دەھان پرسیارێن بێ بەرسڤ و شۆفێرێ زیلێ پێ خوە ل پانزینێ نا و شلقەك ب وان زەلامێن وەكی زلكێن شخارتێ راحەشاندینە پشتا زیلێ كەفت. ھەمی ب سەرئێكدا چوون و ئەو دووماھی جار بوو، مە بابێ خوە تێدا دیتی.
زڤرین بۆ چیرۆكا (ھێكفرۆش)ی:
پشتی من چیرۆك نیشا ھەڤالەكێ خوە یێ چیرۆكنڤیس دای بۆ پێداچوونێ، گوت ئەز د پەیڤا (باژێلە) نەگەھشتم؟ ھەڤالێ من یێ مافدار بوو، من زمانێ خوە یێ ژ گوندی وەرگرتی و چەند جارەكێ ب سەرەدان ژی قەستا گوندێ خوە لێ ژ دایكبووی دكەم، بیرا من ل لاتكا مستویێ عەیشێ دھێت و باژێلەبوونا مریشكا مە یا رەش، ئەڤا دەیكا من ئەز كریمە شڤانێ وێ و ب ھژمار چەند رۆژان تا من زانی مریشكا مە دناڤ وێ لاتكێدا ھێلیڤانكەكا دییا بۆ خوە چێكری و ھێكێن خوە لێ ددانیت.
زڤرین بۆ چیرۆكا (زیلا عەسكەری):
ھەڤالێ من پێشنیارا پەراوێزان بۆ پەیڤێن ئاسێ دامن و ژبلی (زیلا عەسكەری)، من چ تشتێ دی نەدیت، ئەو زیلا ھەنێ ژی یا تایبەت بوو ژ بۆ ڤەگوھاستنا سەربازان ژ جھەكی بۆ جھەكێ دی.
دەیكا من و زیلا عەسكەری:
خەما دەیكا من مریشكا مەنەبوو، كانێ دێ ل كیرێ ھێكا خوە دانیت! خەما بابێ من ئەو نەبوو، كا دێ زیلا عەسكەری وان ب چ رێ دا بەت!! دەیكا من د كوڤانێن بابێ مندا، سەرێ خوە دانا. بابێ من د رێیا مەدا، چارەنڤیسەكێ نەدیار ھەلبژارت و ھێشتا ئەز یێ ل دووماھییەكا دیتر بۆ چیرۆكا خوە یا (ھێكفرۆش)ی دگەریێم. ھەڤالێ من یێ پێداچوون بۆ چیرۆكێ كری، گوت: "ئەز ھەست دكەم، چیرۆك یا مایی؟!"، لێ ئەگەر ھەڤالێ من، بەرێخوەدانا بابێ من د پشتا (زیلا عەسكەری)دا دیتبایە و چاوان وی ركۆرك ل مە دنێری، دا زانیت مە ئەو ب چیرۆكێن خوەڤە چەند یێ ماندی كری.
ـــــــــــــــــــــ
د كوڤارا پەیڤ ژمارە 100 دا بلاڤبوویە.
ليست هناك تعليقات:
إرسال تعليق