عبدالرحمن بامەرنی
ئێڤاریێن رەمەزانێ، چوونا نانی خەما منە و ئەز یێ بوویمە پێ سڤكێ مالێ. مە جیرانەكێ ھەی، ئەم پێكڤە دكەینە پیاسە و نانێ خوە ژی دئینین و بەحسێ دنیایێ ژی دكەین. جیرانێ من پتریا ژیێ خوە ل بەغدا یێ دەرباز كری و مە ژنەك دیت زەرفەكێ شەكرۆكا ددەستیدا بوو، لێ مە چ زارۆك ل رەخێن وێ نەدیتن و جیرانێ من بەرێخوەدا من، گوت: "سەیدایێ بامەرنی تو دیمەنێ ڤێ ژنێ چاوان دبینی، ئەز كەنیا زارۆكان ل رەخێن وێ نابینم؟" جیرانێ من راست دگوت، مە چ زارۆك ل دوورێن وێ نەدیتن و لێ ئەم حەزبكەین یان نە، كەنیا زارۆكان دێ ھەر یا بەردەوام بیت، لێ بتنێ ژییێ مەیێ دەرباز دبیت و كەس نەشێت بەرسینگا گوھورینان بگریت. من گوتێ: دا ھندەكێ بەحسێ زارۆكینییێ و رەمەزانێن جاران بۆ تە بكەم، ل گوندێ ئەز لێ، چ ئێڤاری دەرباز نەدبوون، ئەگەر ژنەكێ خێر بلاڤ نەكربان و ژ چەند كولانان ژی زارۆكەكی دگوتە ئێكێ دی و ب كەنیڤە مە ھەمیان شەكرۆكێن خوە وەردگرتن، خودانا خێرێ دگوتی لەزێ نەكەن زەرف یێ تژییە و دێ گەھیتە وە ھەمیان و مە زارۆكان ھینگێ ژیان ددیت، كەنیا زارۆكان بۆ وێ خێركەرێ دنیایەك بوو، بابێ من دگوت: "ئەڤ پێكڤەژیانە دڤێت ھەر بمینیت"، و دەما مە ڤیابا ئەم چباینە مالەكێ ب گوندیڤە، مە چ تەلەفۆن بۆ خودانێ مالێ نەدكرن، ژخوە تەلەفۆن ھەر نەبوون، كەسێ ئەم نەفرێدكرین و بێژینێ ئەم ئەڤ شەڤە دێ ھێیینە مالا وە و ئەم زارۆك بەری یێن مەزن دا ب غار قەستا وێ مالێ كەین. ژمالێ ھەمییێ بتنێ گلۆپەكا ھل با بەس بوو، ئێدی دا ل دەرگەھی دەین و كەسێ نەدگوتە مە، بۆچی ھەوە ب ھاتنا خوە ئەم ئاگەھدار نەدكرین. تا ئەم دروینشتین و ژمالا وان دەردكەفتین و مە شەڤا خوە ژی ژێ دخاست، ھەر سەر سەران و سەرچاڤان و ھین ب خێرھاتن ل سەر دەڤێ وان بوو. جیرانێ من گوت: "ئو نۆكە؟". من گوتێ ئەگەر بێ تەلەفۆن قەستا مالەكێ بكەین، ھێشتا لبەر دەرگەھی دێ بێژن خێرە ھین ھاتینە چ؟.
ـــــــــــــــــــــــــــــ
ئەڤرۆ 3713 – 2025 /19/03
ليست هناك تعليقات:
إرسال تعليق