نھێنیا خۆشییا ژیانێ

عبدالرحمن بامەرنی

ئەگەر تە بڤێت خوش بژی و جوان بژی و تێر بژی، دڤێت تو نھێنیێن ژیانێ بزانی! دا بابەت زویتر و باشتر بگەھیت ژی، ئەز دێ ژھندەك نموونان دەستپێكەم. بابەكی بەردەوام دگوتە كورێ خوە كو وەختێ وی و ژنانە، ھەر جار دا ڤێ داخوازیێ ژێكەت كا وی چ كچ دڤێت؟ ئەو دێ چن بۆ خازن. لێ كورێ وی ھەر جار دگوتێ، ھێشتا من چ كچێن بدلێ خوە نەیتنە. پیرەمێرەك ل نەخوشخانێ ل ھنداڤێ پیرەژنا خوە بوو، كو ددەمژمرێن دوماھیێ دا بوو ژ ژیێ خوە. ئەڤە (68) سالە ئەو دگەل ئێكدا و بۆ ئێك جار ژی ھەست پێ نەكریە، كو جارەكێ ژی ناكوكیەك دناڤبەرا واندا دروست ببیت و بۆ ببیتە جھێ نیگەرانیێ و ئایا نھێنی د چ دایە؟ ئایا ژبەركو ڤی پیرەمێری ھەلبژارتنەكا جوان كربوو، ئەو ژی وەكی ڤی گەنجی ل كچێن باش و یێن نموونە دگەریا؟ نەخێر، دەما بابێ وی ژێ پرسیار كری، كا تە چ جورە كچ دڤێت ھەڤژینیێ دگەل پێكبینی؟ گوتێ: من دڤێت من ژیانەكا بێ سەرگێژی ھەبیت و كێشە دناڤبەرا مەدا نەبن. بابێ وی گوتێ: ئەڤە گەلەكا ب ساناھییە، كا ھەرە كاغەزەكێ و قەلەمەكی بینە. ئەو ژی چوو ئینان و گوتێ كا ناڤێ خوە ل سەر بنڤیسە؟ ئەوی ژی ناڤێ خوە نڤیسی و بابێ وی گوتێ دێ ناڤێ خوە ب ژێبركێ رەش بكە و دوبارە ھەر دگوتێ ناڤێ خوە بنڤیسە و دەما وی ناڤێ خوە دنڤیسی ژێ داخوازكر ناڤێ خوە رەش بكەت و تا پێڤە وەستیای، گوتێ باب ئێدی ئەز نەشێم ھەر بنڤیسم و ھەر رەش بكەم. بابێ وی گوتێ ئھا نھێنیا ھەڤژینیێ ژی ھوسانە، ھەر ناكوكییا دناڤبەرا ھەڤژیناندا چێبوو و نەھاتە ژێبرن و ھەر گوتن و گوتنە ڤە و ل ناڤ چاڤێن ئێكدا، دێ ناكوكی و كێشەیێن وان بەردەوام بن و رۆژ بۆ رۆژێ دێ زێدەتر لێ ھێن، لێ ھەر ناكوكییا دناڤبەرا واندا دروست بوو و زوی رەش كرن، دمێشكێ خوەدا نەھێلان، دێ ھەمی رۆژێن وان وەك دەستپێكێ بن و دخۆش بن. دەما پیرەژنێ زانی ئێدی ئەو نارابیتەڤە و ساخلەمیا وێ یا تێكچووی، گوتە ھەڤژینیێ خوە، ئایا تو دزانی نھێنییا سەركەفتنا خێزانا مە چ بوو؟ پیرەمێری ب سەرسورمانیڤە گوتێ نەخێر. گوتێ تە سندوقا من یا بچیك دیتییە؟ گوتێ بەلێ بەس تە نەھێلایە ئەز چ جاران ڤەكەم. گوتێ دەما من شوی بتەكری، دەیكا من گوتە من دێ چییە مالەكا نوی و دگەل كەسەكێ دی ژیانێ كەی، ئەگەر تە بڤێت ژیانا تە یا بێ كشە بیت و یا سەركەفتی بی، نەھێلە ناكوكی دناڤبەرا وەدا دروست بن و ئەگەر تە دیت ناكوكی دروست بوون و دا كەربا خوە بینیە خار، خوە بێدەنگ بكە و ھەرە بیكەكا لاستیكی دروست بكە، من ژی ئەو كر. دەما پیرەمێری ڤییایی بزانیت چەند بیكێن لاستیكی ھاتینە دروست كرن دڤان (68) سالاندا، كو رەنگە گەلەك بن، دیت دوو بتنێ نە و دیت (75) دولار ژی یێن دوێ سندوقێ دا. دەما پرسیار ژ ھەڤژینا خوە كرین، ئێ باشە دڤی ژیێ درێژ دا، یانكو بتنێ مە دوو ناكوكی ھەبوون و ئەڤە باشە، بەس ئەو چ (75) دولار بوون؟ پیرەژنێ گوتێ: دا كو ناكوكی نەبنە گەلەك و شوینوارێن وان ژی نەمینن و زویكا ژبیرا من بچن، من ئەو بیكە د برنە بازاری و د فرۆشتن و ئەو بھایێ وانایە ھەتا بووینە ئەو پارە.

ــــــــــــــــــــــــــــــ

رۆژناما ئەڤرو (3561) یا رۆژا 31/7/2024