عبدالرحمن بامەرنی
وێ رۆژێ ب رێكا سەمونخانێ ڤە، جیرانەكێ مە دەستێ كورێ خوە گرتبوو و كچا وی یا بچیك كو سالەك یان دوو دناڤبەرا ژیێ واندانە، ددیفرا دكرە گری و دگوتێ ئەز ژێ دێ ھێم، لێ بابێ وێ ب لێحەیتاندن دگوتێ، بزڤرەڤە ھەكە ئەز بۆ تە (قاقا) ناكرم. ب ھەر حال كچ دگریرا ھێلا و ئەم پێكڤە بەرەڤ سەمونخانێ چووین. من گوتێ جیران دیارە تە كورێ خوە گەلەك خوشتر دڤێت؟ گوت مانێ ئەڤە برایێ سێ خیشكانە و پێنەڤێت دێ من خوشتر ڤێت. من گوتێ جیران ئەز بۆ تە بەحسا بابەكی بكەم، من ھوسا یا خاندی، ئەو ژی بابەكی حەێژكرنا خوە دابۆ كورێن خوە بتنێ و یاری دگەل كچا خوە یا بچیك نەدكرن، رۆژەكێ ل كچا خوە یا پێنج سالی حەیتاند، ژبەركو كاغەزا تایبەتا پێچانا دیاریا ددا بەر مەقەسێ و تورەییا ڤی بابی زێدەتر لێھات، دەما دیتی كچا وێ یا عەلبكەكا بچیك ب وێ كاغەزێ د خەملینیت! سپێدێ ڤێ كچا بچویك ئەو عەلبكا بچویك ئینا و گوتە بابێ خوە ئەڤە دیاریا منە بۆ تە و بابێ وێ دیاریا وێ ژێ وەرگرت،
لێ بابێ وێ دوبارە تورەییا خوە دیار كر، دەما ئەو عەلبك ڤەكری و دیتی یا ڤالایە، ئینا ل ڤێ كچا بچیك حەیتاندەڤە و گوتێ، دەما تە بڤێت دیاریەكێ بدەیە كەسەكی، یا پێدڤییە تشتەك دناڤ وێ دیاریێدا بیت یا ڤالا نەبیت و ئەو عەلبك كرە د تەنەكا گلێشیدا و تژی چاڤێن كچا وی رۆندك بوون و گوتە بابێ خوە، بەلێ ئەو عەلبك یا ڤالا نەبوو، من بۆ تە تژی ماچ كربوو و دەما بابێ وێ ئەڤ گوتنە ژ دەڤێ وێ گولێبووی، ھەروەكو ئاڤەكا تەزی ب سەرێ ویداكری و كەیفا خوە ب كچا خوە ئینا و ئەو عەلبك ژ تەنەكا گلێشی دەرێخستەڤە و ل خوە ئینادەر، كو یێ ماچا ژوێ عەلبكێ دئینتە دەرێ و كچا بچیك ژ كەیفا نەشیا خوە بگریت و دەست قوتان و ئێدی بابێ وێ زانی، وی چەند نەدادی یا ل ڤێ زارۆكا بچیك كری و سوزدا چ جارەكا دی جوداھیێ دناڤبەرا زارۆكێن خوەدا نەكەت، جلفەكا شەرمێ ب سەر جیرانێ مندا گرت و خو بكورێ خوڤە مژویل كر.
ليست هناك تعليقات:
إرسال تعليق