تابووتا بامەرنی، زەنگلەک د تابووتا جڤاکەکێ مری دا.. خواندنەک بۆ کومە چیرۆکا تابووت یا (عبدالرحمن بامەرنی)
دلدار محەمەد
رۆژەکێ، من دەمەکێ ڤالا هەبوو، ما دێ بوچی وەکی وان نڤیسەران کەم ئەوێن خۆ ب کەسێن نمونە و بلند نیشان ددەن، هەما راستی من ژی هاتن و چوون دناڤ تۆرێن جڤاکی دا دکر، ژ نیشکانڤه پەرتووکەك ب بەرچاڤێن من کەفت، کومەکا کورتە چیرۆکان بوو بناڤێ( تابووت) ژ نڤێسینا عبدالرحمن بامەرنی. هەر ژ ئێکەم دیتن بۆ من پرسیار چێبوو، بوچی تابووت؟ بۆچی ئەڤ هەمی ناڤێن ئەدەبی هەین، بامەرنی ڤیا ڤێ کوما قەشەنگ بناڤێ تابووتێ بناڤ بکەت؟! ژڤێ کورتە چیرۆکێ بۆ یادی و هەتا گەلەک دەمژمێر من دگەل ڤێ پەرتووكا بناڤێ تابووت دەربازكرین، دەمەکی گەهشتمە وێ کورتە چیرۆکا بناڤێ (تابووت) یا پەرتووك پێھاتیە ناڤكرنێ، ئەڤ تابووتە کەڤالەک بوو پر ژ برینێن جڤاکی، مرۆڤی هەستدکر چیرۆکنڤێسی دڤیا بێژیت: ئەم زیندیێن مرینە، یا مە بەس خوارن و ڤەخوارنە و بێ هەست و لڤین و هەلویست، دەمێ گوتی (ئەڤە زێدەترە ژ چوار دەمژمێران ئەز دناڤ ڤێ تابووتێ دا درێژکری، دچوار دەمژمێران دا هەمی رۆژێن تەمەنێ من وەک شەریتەکا سینەمایی دکەڤنە بەرچاڤێن من و دەرباز دبن، شەریتەکا سینەمایی یا ژ هەستا ساڕ).
مرۆڤ هەست دکەت بامەرنی دڤێت بێژیت: ژیانا مە هەمی کورتە چیرۆکەکا پری مرن و بێ هەسته، ئەم ژ هەمی رابردوویێ خۆ پەشیمان و دلسار و نە دلخۆشین، لەوما ژی رەڤێ بەرەڤ تابووتێ د هەلبژێرین، تابووتەک ب هەناسە و زیندیەک ب تەرزێ مریان!
پەیڤێن ڤێ چیرۆکێ هێشتا ئەز دگەل پێلا خۆ برم، پرسیارەکێ خۆ هەلاڤێت، ئەڤە چ هێزە، دەستێ کێ ل پشتە مە د مرینیت و ژیانێ ژ هەژی مە نابینیت، هەتا پێنڤیسێن نڤیسەران کورتەچیرۆکان بناڤێ تابووتان بۆمە ب ئافرینن؟ نەفرەت ل هەمی هێزێن زاڵ، یێن ئەم نەهێلاین ئەم .
پاشی ئەز بڤەچنقین ڤه ژ گوتنا خۆ لێڤەبووم، هەکو من د رێزکەکێ دا دیتی، (ئەڤە دوماهی بریارا منە، ئەز هەستێن ساڕ و چاڤێن گەمار و گرتی و کەنیێ ژ قەستا ل پاش خۆە بهێلم). پاشی من گوتە خۆ عەجێب نەمینە پێنڤیسەک ڤێ بریارێ ب هەمی هشیاری بدەت، ما جڤاکێ پری هەستێن بەستی گرتی و چاڤێن هەما بەس رەنگ چاڤ و چ تشتان نەبینن و لێڤێن دور ژ گرنژینان ژ هەژی چنە تابووت و رەڤین بەرەڤ مراندنێ تێنەبیت، ما مرۆڤێ نە هشیار و دوور ژ هەر هەستەکی مرۆڤە، ما هەر ئێکێ د خۆت و ڤەدخوت مرۆڤە؟ من دیت بامەرنییێ نڤیسەر دڤیا بێژیت ئێدی دەمە ژ ڤێ تابووتێ بدەرکەڤن، بۆ دەرکەفتنێ هوشیاربوونێ و رابوونە سەر پیا ئێڤار ژی بیت، نە درەنگە!
هەکو ئەز دناڤ ڤێ کورتە چیرۆکێ دا دچووم، پتر نیشانێن پرسیارێ خۆ د هەلاڤێتن، ب تایبەتی هەکو دگوت (چار دەمژمێران دناڤ ڤێ تابووتێدا هێشتا تشتەک نەشیایە هزرێن من بگهوریت!). راستی ژی سەیرە ژیان بگەهیت ئاستەکی مرۆڤ ژ چاڤێن گەمار برەڤیت و پەنایێ ببەتە بەر تابووتێ! کو ب دیتنامن ئەڤ هەست و بریارە دووماهیک ئاستێ بێ ئومێد بوونێ یە هێشتا ڤان هەمی ئێشان و هەستا، ڤان هەموو تابووت و کەلەخان نەشیایە هزرێن مە ب ئاڤا گوهورینێ فرشک بکەن، ئەز وەسا تێگەهشتم نڤیسەری دڤێت بێژیت راسته ژیانێ گەلەک گڤاشتن هەنە، بەلێ ئەم یێن (تاک ـ جڤاک) قوربانیێن هزرێن خوینە، چەند بارانێن گوهورینێ ببارن، چەند ئەم بۆ تەنابوونێ ژڤان ئێشانا هەمیا پەنایێ بۆ تابووتان ببەین یا بێ رامان و بێ بەرهەمە، ئەو قەیدا هزرێن مەیە رێک نەدایی پێشڤە بچین، هندی ئەم ژ گەمارا هزرێن خۆ قورتال نەبین، گوهارتنێن ئەم دکەین ئەگەر مە روحا گوهورینێ ژی ڤەگەراندە جەستەیێن خۆ یێن مری هەر بێ مفایە، چونکی هزرێن مەنە بۆ تابووتان مالبچویکن هەتا ژ تابووتەکا پری بزمار دەردکەڤین بەرەڤ ئێکا دیترڤە دچین، ئەم د مرینە بەلێ هەناسە ددەین و عەشقا مە دگەل تابووتان عەشقەکا دێرینە د هەمی ستات و چرکەیان دا بوومە دبیتە پەناگەهـ.
من تابووت دیت زەگلەکا هشیارکرنێ، بەلێ ئەرێ نڤیسەرەک دێ شێت هشیارکرنێ دجڤاکەکی دا بکەت دناڤبەرا تاکێن وی و خواندەڤایێ دا، دیوارێن ب قەدەر درێژیا دیوارێ چینێ هەبن! جڤاکەک دێ شێت ب کورته چیرۆکەکێ ژ تابووتێ دەربکەڤیت، کو هەتا نوکە دناڤ وی جڤاکی دا کتێب بێ بهاترین تشت بیت، ئاهەنگێن ئیمزاکرنێ یێن کتێبان ب هەروە نەبن ژ کەفتنا تایێ شەرمێ نەبیت کەس ناکریت.
یا ژمن ڤە تابووتا بامەرنی یا جوان و کارتێکەربوو، بەلێ نە بوو تاکێن جڤاکەکی کو ژ مێژە گورێ خۆ بدەستداهێلانێ کولایی و بۆ بەرژەوەندێ نووکرن کریە د هزار تابووتان دا، ژمێژەیە هەمی دبێژنەمە خودێ ژێ رازی بیت، بەلێ ما تۆ بێژی خودێ ژ دەستداهێلایی و بێدەنگ و هەلویستان رازی ببیت؟!
ليست هناك تعليقات:
إرسال تعليق