ئەڤروئێڤارێ 19/8/2022 ل ھولا نڤیسەران و ژ بزاڤ و چالاكیێن ئێكەتیا نڤیسەرێن كورد/ تایێ دھوكێ، سمنیارەك بۆ (د. ئەمین عەبدولقادر) ھاتبوو رێكخستن، بناڤێ (تەكنیكێن ئاماژەیێن میتا ڤەگێرانێ د رۆمانێن مرۆڤێ بەلەجەك و رەشكۆی دا). بەری كورتیەكێ ژ سمینارا وی بەرچاڤ بكەم، یا من دڤێت بێژم ئەو ژی پرۆسا رەخنێ یە، ھەر گاڤا مە رەخنەگر ھەبیت، باوەردكەم مە جوانترین بەرھەمێ ئەدەبی یێ ھەی و دێ باشترین بەرھەمێ ئەدەبی ھێتە نڤیسین و ھینگێ دێ خواندەڤا بخوە ژی پەیدا بیت، ژبەركو پرۆسا خواندنێ ب سێ كارلێكان را دەرباز دبیت، ئەو ژی نڤیسەر و رەخنەگر و خواندەڤان، ب بەرزەبوونا ئێك ژ ڤان كارلێكان ژی، پەرتووك ل پەرتوكخانێ دێ توزگرتی مینن و بەرھەمێ باش ژی دێ دناڤ یێ نەباش دا بەرزە بیت.
كورتیەك ژ سمینارێ:
"...... د رۆمانا (رەشکۆ)دا، نڤیسەری بزاڤکرییە ناسنامەیا میتا ڤەگێرانێ ب رێک و تەکنیکێن میتا ڤەگێرانێ ب تێکستێ خۆ ببەخشیت. نڤیسەر شیایە پڕانییا تەکنیکێن میتا ڤەگێرانێ بکار بینیت. نڤیسەر (عبدالرحمن بامەرنی) تەکنیکا پەیوەندیکرنا ئێکسەرا ب خواندەڤانی ل دوو جهان بکار هینایە. دیسان شیایە تەکنیکا چیرۆک د ناڤ چیرۆکێدا ل سێ جهان بکاربینیت؛ لێ نە ب ئەوی رادەیێ چیرۆکێن سەربەخۆ یێن خۆدان گرێ و ناڤەرۆکەکا درێژا جودا بن. نڤیسەری هەر دوو تەکنیکێن کەسایەتیێن کو دزانن کەسایەتیێن چیرۆکێنە و ڤەگێرێ رۆلێ خۆئاشکرا دکەت وەک ئێک ژ کەسایەتێن چیرۆکێ ب شێوازەکێ دیار و ئاشکرا بکار هیناینە. هەر وەها نڤیسەری تەکنیکا کۆمێنت دانو رەخنەگرتنا ل سەر چیرۆکا ڤەگێرای وەک بەشەک ژ چیرۆکێ بکار هینایە. واتە بامەرنی پترین تەکنیکێن میتا رۆمانێ د تێکستێ خۆدا بکار هیناینە.
ل دوماهییێ بۆ مە ئاشکرا دبیت کو میتا رۆمان وەکە ئێک ژ شێوازێن رۆمانا پۆست مۆدێرند ناڤ رۆمانا کوردی یا دەڤەرا بەهدینان دایا پەیدابووی".
لدویڤ سمینارا دكتوری و ڤەكولینا وی ژی دیار دبیت، كو رۆمانا رەشكۆی ئێكەمین نمونا میتا ڤەگێرانێ یە ل بادینان بھێتە نڤیسین، كو پرانیا مەرجێن میتا ڤەگێرانێ دناڤ خوەدا ھەمبێز كربن.
ليست هناك تعليقات:
إرسال تعليق