عبدالرحمن بامەرنی
ئەز دێ دوو بابەتان پێكڤە گرێدەم، ئێك: ئەڤا بەری چەند رۆژان بەحس ل گرانبوونا بھایێ ئاری و بریارا بچیكرنا گركا ھەڤیری دھاتە كرنێ، كو بھایێ نانی ژی ل فرنان وەك بھایێ ھەر تشتەكی دی بھێتە گرانكرن و بابەتێ دوویێ، دەما ئەز ل فرنێ و من ژ نانپێژی پرسیاركری، ئەرێ مانە بریار بوو كو ھین گركا نانی بچیك بكەن یان بھایێ نانی گران بكەن؟! گوتیە من: مە چەند گینیكێن ئاری یێن ماین و خوە ئەگەر بریار بھێتە جێبەجێكرن ژی، تا ئارێ مە مابیت ئەم چ گوھورینان نە ل بھایێ نانی و نە ژی بچیكرنا گركا ھەڤیری ناكەین.
بەھانا وی ژی گوت: باوەر بكە سەیدا، گەلەك دھێن نانی ژ دەف مە دبەن و دبێژن ھەتا سەرێ ھەیڤێ و وەرگرتنا موچەی بنڤیسە...!
ئەز لڤێرە بەحسا رێژا ھەژاریێ ناكەم، كو باژێرێ دھوكێ ل سەر ئاستێ ھەرێما كوردستانێ بۆ ھەژاریێ و بێكاریێ ل رێزا یێ ئێكێ یە و ل سەر ئاستێ عیراقێ ژی، ژناڤێن د سەرێ لیستێ دایە، ژبەركو چ گوھورینێ ل بابەتێ من ناكەت و ئەو خێزانا نانی ب (قەر) دكریت تا سەرێ ھەیڤێ، چ ژ رەوشا وی ناگوھوریت.
یا من دڤێت بابەتێ خوە ل سەر بنڤیسم، ئەو چیرۆكا ل ناڤ تورێن كومەلایەتی ب بەرچاڤێن من كەفتی كو ل ئێك ژ باژێرێن بیانی بوو و بڤی رەنگی: كورەكی دگەل بابێ خوە قەستا كافیەكێ كرن و بابێ وی بھایێ (5) قەھوان دا و گوتێ بۆ مە (2) قەھوان بینە و یێن دی خزمەتگوزاری، كوری ژی پرسیار ژبابێ خوەكر، ئەرێ مانە ئەم بتنێ دوو كەسین، تە بوچی بھایێ پێنج كەسان دا؟ بابێ وی گوتێ دێ نوكە ھەر سێ كەسێن دی ھێن.
پشتی بێھنەكێ كەسەكێ دی ھاتە كافیێ روونشت و داخازا قەھوەكێ كر و بھایێ دوو قەھوان دا و گوتێ ئەڤا دی بۆ خزمەتگوزاری. كوری ھەمان پرسیار ژ بابێ خوە كر، گوتێ ئەرێ ئەڤی ژی بھایێ دوو قەھوان دا و گوت ئێك خزمەتگوزاری، ما ئەو ژی چاڤەرێی كەسەكییە؟ بابێ وی گوتێ بەلێ.
پشتی بێھنەكا دی دیتن، كو پیرەمێرەك ھاتە ژوور و گوتە خودانێ كافیێ، قەھوا خزمەتگوزاری ھەیە؟ گوتێ بەلێ روینە و دێ نوكە بو تە ئینم. ئینا كوری ژ بابێ خوە پرسیار كر، ئەڤە چییە؟ بابێ وی گوتێ: گەلەك كەسێن ھەین پارە نینن و حالێ وان باش نینە و دھێنە ژوور، داخوازا قەھوا خزمەتگوزاری دگەن، كو پێش وەخت ئەڤ كەسێن پێچێبووی پارێ وان ددەن و بڤی رەنگی ئەو ژی ناكەڤنە تایێ شەرمێ و بدلێ خوە قەھوا خوە ڤەدخوون و دەردكەڤن.
دا ئەم ژی ژنانێ خێرێ دەست پێبكەین
ل دەف مە ژی د ھەیڤا رەمەزانا پیروزدا، جورەكێ خزمەتگوزارییا بڤی رەنگی پەیدا بوو، تا نوكە ژی گەلەك كەس دچنە فرنێن نانی و دێ ھزارەكێ یان زێدەتر دەنەف نانپێژی و بێژنێ ئەڤێ دی بكە خێر، نانپێژ ژی دێ ب بھایێ وی پارەی، نانی دەتە بكران. رەنگە كەسێن پێدڤی مفای ژێ وەرنەگریت یان نانپێژ بخوە ژی ھەمی كەسان ناس نەكەت و ھندەك جاران نانپێژ ھەر كەسەكێ بھێت نانەكێ زێدەتر ددەتێ، كو ئەز ژخوە دبێژم، ئەز دزانم چەند نان تێرا مەھەنە و ئەگەر نانا خێرێ ژی ببەم، ژمە زێدە دكەت.
دا كو ببیتە دیاردە و رەنگەكێ شارستانیتر بخوەڤە وەربگریت و كەسێن پێدڤی مفای ژێ وەربگرن، ئەم دشێین ھەمان تشتێ خزمەتگوزاریێ لدەف خوە ژی دروست بكەین. ل فرنێ، جھەكێ تایبەت ھەبیت و نان تێدا بھێتە دانان و ئەڤ كەسێ پارێ نانی نەبیت، بۆ خوە ژ وێرێ راكەت، ھینگێ كەس پسیارا نانێ خێرێ ناكەت.
رەنگە گەلەك كەس شەرم دكەن ل دەف خەلكی بێژن نانێ خێرێ ھەیە و دیسان خێر ژی دێ گەھیتە كەسێن پێدڤی و ب ھەروە ناچیت و ئەگەر ببیتە كەلتور، رەنگە دگەلەك بیاڤێن دی دا ئەڤ چەندە سەر بگریت و دێ بیتە تشتەكێ شارستانی و مرۆڤایەتی.
%20copy.jpg)
ليست هناك تعليقات:
إرسال تعليق