كورتە چیرۆك ـ دل ـ
ساتع راجی
وه‌رگێران ژ عه‌ره‌بیێ: عبدالرحمن بامەرنی
د ئێك ژ شەراندا، من دلێ خوە ژ دەستدا. ل وی دەمی نوژداران گوتن، تو حالەتەكێ دەگمەنی. د چركەكا خوڤەدزینێ یان لادانێدا گوتن، ئەز دشێم بۆ دەمەكی ب دلێ گیانەوەرەكی بژیم، ل وی دەمی دلێ مەیمینكەكا بچووك یێ ئامادە بوو، ژ وی جورێ ئەوێ لێبووك بكار دئینن، ئەز دگەل وی یان ل سەر وی، بۆ ماوێ چار سالێن كەیفێ ژییام. دەم د بوری، هەر وەكو چنە، من خوە د هەلاڤێت و بەردەوام دكرە كەنی، من زارڤەكرنا هەمی تشتێن مرۆڤی دكر، من گەلەك دكرە كەنی، ژبەركو ئەڤێن دی دكرە كەنی، سەرەرای كو من ئەگەرێ كەنیا وان نەدزانی، بەلێ دەمێن خوش زوو دەرباز دبن، بوویە بێی ئەز هەست پێبكەم، من دلێ مەیمینكێ مەزاخت، خوزی من باشتر دەم بكار ئینابایە.
دلێ دویێ ئەوێ بەرهەڤ، دلێ تاووسی بوو. من گەلەك پێ كرە كەنی، ل وی دەمی ئەز ب دلێ مەیمینكێ د ژییام و ئەز نە د شییام ژبلی كەنی چ هەلویستان راگەهینم. دلێ تاووسی! هزر بكەن؟ ئەڤە تێرا هەمی تشتان ناكەت، دگەل ڤێ ژی ئەز نەچار بووم بۆ چەند دەمەكی بكار بینم. تشتێ سەیر، من حەز ژێكر، من خوە مەزن د دیت و هەمی تشتێن دی پووچ، دەمێن گەلەك خوش، تا من خوزی راهێلاین ئەز دگەل دلێ تاووسی بمینم، ئەگەر بابەت ب دەستێ من بایە، دا هەمی تاووسان سەر ژێكەم، ئەڤێن دەستێ من دگەهشتێ، دا ئەز ب كەیف خوشی ل سەر دلێ وی بژیم، خوە مەزن كرن ب وێ تیشكێ ئەڤا ئەز دهەلگرم، سەرەرای كو ئەز یێ بێ پەر بووم و تا پەرێن بێ سەروبەر ژی، ئەز وەك هەر مرۆڤەكی یێ رووس بووم، بەلێ د سەر ڤێ چەندێرا، قوناغا تاووسی گەلەك ژ قوناغا شێری خوەشتر بوو، ئەڤا ئەز پشتی وێ تێدا ژیایم.
شێرەكێ پیر هەبوو و چ نەمابوو گیانێ خوە ژ دەست بدەت، كرێكارەكێ گەندەل ل باخچێ گیانەوەرا گوتە سەروكێ خوە یێ گەندەل، كو شێرەكێ گەمژە د ئێك ژ قەفەسێن تەنگدا یێ لبەر مرنێ. سەروكێ گەندەل گوتە هەڤالێ خوە یێ نوژدار و گەندەل، ل وێ نوخووشخانا بەرگومان ئەڤا ئەز مامەلێ دگەلدا دكەم، كو شێرەكێ وەستیای وەك من لبەر مرنێ یە و د شیاندایە دلێ شێری بهێتە بكار ئینان. پشتی چەند پەیوەندییان و گەلەك پارەی و هیڤییان، ئەز شییام دلێ شێرێ وەستیایی بدەستڤە بینم و د دو سالێن دووفرا ژی، من خوزییا رۆژێن نێچیركرنێ د خواستن، من هزر دكر ئەز یێ بدووف مامزا و كێریشك و بزنێن كیڤیڤە دكەمە غار و ئەز یێ لهیڤییا بالندێن گەمژە برەخ منڤە دادەن. بەلێ ئەو خەیالەك بوون و بتنێ نەخوشی پەیدا دكرن و نە زێدەتر، ب راشكاوانە خەمێن من دگەل دلێ شێری گەلەك بوون، سەرەرای كو ئەو بتنێ شێرەكێ پیر بوو، ئەز شایستەی وی دلێ زیرەك و بهێز نەبووم، سەرەرای ب ناڤ سال چوونێڤە، بوویە من هەست ب ئارامیێ كر، دەما نوژداران ئەز ئاگەهداركریم كو پشتی ژناڤچوونا دلێ شێری، دلێ بەرازی یێ بەرهەڤە.
دەنگ و باس بۆ هەمیان یێ سەییر بوو، گەلەكان هەڤدژییا من كرن، هەمییان گوتە من تو یێ پیس بووی و ئەو نەشێن مامەلێ دگەل مندا بكەن. تا دەیكا من ژی پەیوەندیێن خوە ژمن قوتكرن و گوتە من، ئەو دشێت مامەلێ دگەل هەمی دلان بكەت بتنێ یێ بەرازی یان یێ سەی نەبیت. وێ رۆژێ بتنێ دلێ بەرازی هەبوو، دا ئەز ل سەر خاترا دەیكا خوە ب دلێ مێریەكێ رازی بم و دلێ بەبەغایەكی ل سەر خاترا بابێ خوە، دا ئەز ب دلێ كەرەكی رازی ژی بم، دا هەمی كەیف خوەش مابان، بەلێ بتنێ دلێ بەرازی هەبوو. نوژداران پسیارا زانایێن ئاینی كرن و ئەوان پێرابوونا نەشتەرگەریێ ب حەرام زانین، من د گەشتەكا گومان لێكریدا بۆ پێرابوونا نەشتەرگەریێ دلێ بەرازی دگەل خوە برە وەلاتەكێ دی، هەمی تشت ب سەركەفتی پرێڤەچوون، بەلێ ئەز یێ خەمگین بووم، ئەز بتنێ و پیس و هەرمی مام، سەرەرای كو گوشتێ مەیمینكێ و شێری ژی د حەرامن و من چ هەلویست سەبارەت گوشتێ تاووسی نەدزانین، بەلێ هەمی بۆ بەرازی د نەیار بوون. دا ئەز ب ژیانا دلێ كەری یێ رازی بم و گوشتێ وی ژی یێ نەیێ رەتكریە، باشە دا ئەز ب دلێ بەرخكەكی ژی رازی بم، بەلێ خەلكێ ڤی باژێری دلێن بەرخكا ناهێلن و هەر زوی ب كولافە خوە تێوەر دكەن و دخوون. ژیان ب دلەكێ پیس و هەرمی یێ ئەستەم بوو، بەلێ ئەڤ دلە ب ئاسانی بەرەڤ نڤستنێ ڤەدچوو و چ تشت ب خەمڤە وەرنەدگرتن، بوویە من چ تشت ب خەمڤە وەرنەگرتن، تا ئەز رۆژەكێ ژ بێهوشییا خوە و زەنگا نوژداری هشیار بوویم و یێ دبێژیت، بەراز یێ بەرەڤ مرنێڤە دچیت و دلێ ددوف را یێ بەردەست، دلێ ستوو درێژییە، وی دەمی من خوە نە رازی كر، ستوو درێژ بەرۆڤاژی بەرازی زوو نا نڤیت، ژبەركو ژی ستوویێ ویێ درێژە، ئەو دێ بەری هەمییان ئایندەی بینیت. بڤی رەنگی من هزركر و ئەز حەز ناكەم ئایندەی بزانم، ئەڤە زانینەكا خەمگینە و ژیانەكا هەرمی ب دلێ بەرازی ژ وێ باشترە و ژ هینگێ وەرە، ئەز هزرێن مرنێ دكەم، خوە من دلێ بەرازی ژی هەبیت.
چیرۆك نڤیس: ساتع راجی
ـ ل سالا 1973ێ ل عیراقێ پارێزگەها بابل چاڤێن خوە ڤەكرینە.
ـ بەكالوریس د زانستێ كومەلایەتیدا، كولیژا ئاداب، زانكویا بەغدا 1995 هەیە.
ـ چیرۆكێ و رەخنێ و ڤەكولینێن هزری و گوتارێن سیاسی د نڤیسیت.
ـ ل سالا 2003ێ ئێكەم بەرهەمێ خوە بلاڤ كریە.
ـ ل رۆژناما (ئیتیحاد، صباح، زەمان، حیوار موتەمەند و مالپەرێ وەرشا رەوشەنبیری)دا د نڤیسیت.
• د رۆژناما صباح كوردستان ژمارە 106 یا رۆژا 24/9/2019ێ داب لاڤ بوویە.
ليست هناك تعليقات:
إرسال تعليق