بحث هذه المدونة الإلكترونية

pertook

pertook

2016/11/27

مە خواندەوار یێ‌ هەی، لێ‌ مە نڤیسەر نینە

دیدار: پیرس
هەر رونشتنەكێ‌ تایبەتمەندییا خوە هەیە و تشتێ‌ هەمیان ل خالەكێ‌ ژی كومڤەدكەت، ئەڤ رونشتنێن هەنێ‌، تشتێن نوی و كەشەكێ‌ جوداتر بمروڤی دپەخشیت ژ ئەوێ‌ ژینگەها مروڤ دناڤدا، ئەڤە وەك كارێ‌ روژنامەڤانی و ئەڤ كارێ‌ هەنێ‌ بكەڤیتە بەر دەستێ‌ خواندەڤانان. دڤێ‌ رونشتنێ‌ دا مە نڤیسەر عبدالرحمن بامەرنی هەلبژارتیە و بزانین چ دچانتكا وی دا هەیە.

پیرس: ئەگەر ژ بەرهەمێ‌ تە دەستپێبكەین، تە چ دئەرشیفێ‌ خوە دا هەیە تو وەك نڤیسەر خوە پێبدەیە ناسكرن؟
عبدالرحمن بامەرنی: ئەگەر دەستپێكا خوە یا نڤیسینێ‌ بو بلاڤكرنا ئێكەم بەرهەمێ‌ خوە بزڤرینم، كو ل سالا 1987ێ‌ ل روژناما هاوكاری ئێكەم تشتێ‌ من هاتبیتە بلاڤكرن،  تا نوكە دبنە 29 سال و ئەز یێ‌ بەردەوامم، 12 پەرتوكێن چاپكری من هەنە، 3 پەرتوكێن ئەلەكترونی من هەنە، ئەگەر وان روژنامە و گوڤاران ژی بهژمێرم ئەڤێن تا نوكە من بەرهەمێن خوە تێدا بلاڤكرین و لدەف من د ئەرشیفكری، زێدەتر ژ 60 روژنامە و گوڤاران بابەتێن من تێدا هاتینە بلاڤكرن، ئەڤە ژبلی كو، ئەز سەرنڤیسەرێ‌ روژناما چاڤدێر بویمە و پاشی مە كریە كوڤارا چاڤدێر كو 136 ژمارە ژێ‌ هاتینە بلاڤكرن و ئەگەر بەحسا وان پەرتوكێن بەرهەڤ ژی بكەم كو ل هیڤییا چاپكرنێ‌ نە تا دەلیڤە هلدكەڤیت، من رومانەكا نڤیسی یا هەی بناڤێ‌ (بەهەشت دهەمبێزا ژنەكێ‌ دا) و دیسان پەرتوكەكا رەخنەی بناڤێ‌ (خواندنەك رەخنەیی بو رۆمانا دەڤەرا بادینان) و ژبلی وێ‌ ژی كاروانێ‌ نڤیسینێن من یێ‌ بەردەوامە.


پیرس: تە بەحسا 12 پەرتوكێن چاپكری كر، دێ‌ شێین زانین، ئەو پەرتوك ل سەر چنە؟
عبدالرحمن بامەرنی: من 4 دیوانێن شعری هەنە و 2 دوو پەرتوكێن فلكلوری و 3 پەرتوكێن ئەدەبێ‌ كلاسیك و 2 پەرتوكێن روژنامەڤانی و پەرتوكەك رەخنەیی.


پیرس: تە بوچی پەنا بو پەرتوكێن ئەلەكترونی بر؟
عبدالرحمن بامەرنی: بهزرا من ئەنترنێت ئالاڤەكێ‌ گرنگە نڤیسەری شارەزای تێدا هەبیت و بشێت بێخیتە دخزمەتا خوە دا، ژبەركو پەرتوك و ئەو بابەتێن ئەم دروژنامە و كوڤاران دا بلاڤ دكەین، بتنێ‌ ل پارێزگەها دهوكێ‌ دهێتە خواندن، لێ‌ دەما نڤیسەر ئەنترنێتێ‌ بێخیتە دخزمەتا خوە دا، بەرهەمێ‌ وی ل هەمی جیهانێ‌ دێ‌ هێتە خواندن و ب ئاسانی هەر كەس دشێت وی بەرهەمی ببینیت. نە بتنێ‌ پەرتوكێن من یێن ئەلەكترونی، بەلكو من پترییا بەرهەمێ خوە و چالاكیێن خوە یێن ئەدەبی دناڤ مالپەرێ‌ خوە دا، داناینە (www.ebdulrehmanbamerni.blogspot.com)، ئەڤە ژبلی كو ئەز كونتاكێ‌ دگەل چەندین مالپەرێن دی یێن كوردی دكەم و نڤیسینان بو فرێدكەم، ژبیرنەكەین دەما ئەم دنڤیسین مە دڤێت خواندەڤا هەبیت و ئەو نڤیسین بكەڤیتە بەردەستێ‌ پترییا خواندەڤای، ئەنترنێت ژی بو ڤێ‌ چەندێ‌ گەلەك كار ئاسانیێ‌ دكەت.

پیرس: پەرتوكێن ئەلەكترونی دێ‌ شێت ڤالاتییا نەبونا خواندەڤای تژی كەت؟
عبدالرحمن بامەرنی: ما كێ‌ گوتە مە خواندەڤا نینە، بهزرا من مە نڤیسەر نینە! نڤیسین بخوە وەك كەرەستەكێ‌ بەردكانێ‌ یە، ئەگەر جوان هاتە رازاندن دخوەبخوەدا دێ‌ خواندەڤان پەیدا بن، ئەگەر خواندەڤا چوو پەرتوكخانێ‌ و پەرتوكەكا باش نەدیت بو خواندنێ‌، پەرتوكەكا وەرگێرای نەدیت، ئەو جارا دوێ‌ قەست ناكەتێ‌، مخابن دبێژم، دیتنا مە بو پاشەروژێ‌ ئەم ل سەر بلندكرنا ئاڤاهییا و ئینانا ترومبێلێن گێچ سفر كار دكەین، مە پروژێن رەوشەنبیری نینن ئەم نڤیسەری پەیدا بكەین و پێ پێشبێخین.

پیرس: تە دنڤیسینا گوتارا ئەدەبی دا دەستەكێ‌ نڤیسینێ‌ یێ‌ باش یێ‌ هەی؟، چ گرنگی دڤی شێوازێ‌ نڤیسینێ‌ دا هەیە؟
عبدالرحمن بامەرنی: گوتارا ئەدەبی جورەكێ‌ نڤیسینێ‌ یە، زێدەتر خواندەڤای بخوە ڤەگرێددەت و خواندەڤا دخواندنا ڤی جوری دا هزردكەت كو نڤیسەر برەخ ویڤەیە و ئەو نڤیسینا خواندەڤا خوە دناڤدا ببینیت ژی زێدەتر دهێتە خواندن، من بو چەندین روژنامە و كوڤاران گوشێن نڤیسینێ‌ هەبون، وەك (روژناما چاڤدێر، كوڤارا سیلاڤ، كوڤارا زینێ‌، روژناما بەهدینان)، ئەڤە ژبلی كو وەك بەشداری ژی دگوشاندا من گەلەك دنڤیسین، گرنتگیەكا دژییا گوتارا ئەدەبی بێژم، شیانێن نڤیسەری دیار دكەت و خواندەڤا ژی حەزدكەت دەما روژنامێ‌ یان كوڤارێ‌ بخوینیت، تشتەك بكەڤیتە بەرچاڤان، دارشتنەكا جوان و تژی رامان بیت.
 تێبینی:
دروژانا پیرس یا ئەلەكترونی ژماری 19 ل روژا 20/11/2016 دا هاتیە بلاڤكرن

إرسال تعليق