ئەڤە
زێدەترە ژ چار دەمژمێران، ئەز دناڤ ڤێ سندریكێدا درێژكری و دڤان چار دەمژێراندا،
هەمی رۆژێن تەمەنێ من وەك شەریتەكا سینەمایی دكەڤنە بەرچاڤێن من و دەرباز دبن.
شەریتەكا سینەمایی یا ژ هەستان سار، ئەڤە دووماهی بریارا منە، ئەز هەستێن سار و
چاڤێن گەمارگرتی و كەنیێ ژ قەستا ل پاش خوە بهێلم.
چار
دەمژمێران دناڤ ڤێ سندریكێدا و هێشتا چ تشتەك نەشیایە هزرێن من بگوهوریت، ژیان
لدەف من گەلەك بێ رامان بوویە و ژیانا بێ ئامانج، وەك دارەكا هشكارەیە، نە
سیبەرێ لدوورێن خوە دكەت و نە ژی بەرهەمی ددەت. هندەكان ژیانا وان ل سندریكێ
بدوماهی دهێت و من بریاردا، ئەز ل ژیانا ل پشت ویستگەهێن سندریكێ بگەرم!
ئەڤ سندریكە گەلەك یا تەنگە، ئەڤە چەند جارە هەولێن خوە قولپاندنێ ددەم، بەلێ ل رەخێ منێ چەپێ، سەرێ بزمارەكا ئاسنی دكەڤیتە ملێ من و جارەكا دی خوە د قولپینم سەر پشتێڤە. بۆچی تا نوكە كەسێ گازندا ڤێ بزمارێ نەگەهاندی یە، كو بزمارێن دناڤ سندریكێدا، سەرێن وان نەهاتینە چەماندن؟! ئەز نزانم ئەڤێ بزمارێ چەند كەسێن بەری من بریندار كرینە، بەلێ ما دێ كی زانیت، هەر كەسێ بهێتە دناڤ ڤێ سندریكێدا، ئەو ئێدی رۆناهیێ نابینتەڤە و كەسەكێ مرییە مری، ما كەنگی مرییان مافێ گازندێ هەیە و كی حسابەكێ بۆ وان دكەت؟ ئێ باشە خێركەر، ئەڤە بیرا من دهێت، تە ئەڤ سندریكە بۆ خێرا خوە دروستكری و تە ل ڤێ مزگەفتێ دانای، ئەڤە چەند سال د سەر ڤێ خێرێدا دەرباز بوون و چەندین جەنازە بۆ گۆرستانێ پێ هاتینە ڤەگۆهاستن! دێ بەسە دێ، ما خێرا تە هێكا دیكلی یە، سندریكەكا دییا باشتر دروست بكە، باشتر دبەر كارێ خوەرا هەرە.
ئەز نزانم بۆچی ئەڤ هزرە هاتە سەرێ من، ما چ
رێكێن دی نەبوون ئەز خوە ژ هەستێن سار دوور بێخم، ئێ باشە ئەو ژی چننە، ئەڤە ژی
ئێك ژ بێ ئاقلیێن منە، من سندریك هەلبژارت، ما كەس نابێژیت مانگرتنا خوە
راوەستینە، دێ پسیار ل گازندا تە هێتەكرن، ما كەس ل دووڤ گازییا من ناهێت، ما ئەز
نە ئێك ژ هاولاتیێن ڤی باژێری مە.
ئێ باشە یا جەنابێ رێڤەبەرێ باژێرڤانیێ، یا
جەنابێ خێركەر، ئەڤ سندریكا نوكە ئەز تێدا، نە سندریكەكە ئەم مریێن خوە پێ ب
ڤەگۆهێزینە ناڤ گۆرستانێ، هەر وە خزمەتا مرۆڤێن ساخ یا پشت گوهڤە هاڤێتی، ئێ
پانێ دبێژن قوونا مریا دەرمانە، ئێ هەر چننە بیت، رێزێ ل مریێن خوە بگرن؟!
مانا
من زێدەتر ژ چار دەمژمێران دڤێ سندریكێدا، بیرا من ل تهێنێ و برسێ ئینا. مادێ
كی بۆ من ئاڤێ و خارنێ ئینیت، هەر كەس دزانیت دەما مرۆڤ چوو د سندریكێدا، ئەو
دووماهی ویستگەها ژیانا مرۆڤی یە. برسێ بیرا من ل مرنێ ئینا و بیرا من هات هێشتا
ئەز یێ دناڤ سندریكێ دا و ئەز ب سندریك ڤە یێ ل سەر ملێن هندەك مرۆڤان و خودێ
دزانیت دێ من كیڤە بەن. لێ یا ئەز ژێ پشت راست، هێشتا مرنا من و برنا من بۆ ناڤ
گورستانێ زوویە و ئەز هەست ب لەشێ خوە دكەم و دەستێ من ژی بێ كێشە یێ
دلڤلڤیت، ئەز بگومان كەفتم، كا ژ راستا ئەز ژ زیندییامە یان ژ مرییان، بتنێ تشتێ
هەست پێدكەم و دزانم ئەز یێ د ژیانێدا مایم، دەنگێ (خودێ ژێ رازی بیت) مشە
دهێتە گوهێن من، وی دەنگی ژی ترسەك دی لدەف من پەیدا كر، پا هەكە ئەو خودێ ژێ
رازی، هەر ئەز بم!
ئێ
باشە یا جەنابێ هەمی تشتی، تو بخوە ژی دزانی كەس ب ئاشكەرای نەشێت داخوازیێن خوە
بكەت، تو بخوە ژی چ تشتی بۆ هاولاتی ناكەی، سندریك دووماهی رێكا من بۆ ئەز گازندێن
خوە بگەهینم تە، تە سندریك لمن كرە دووماهی هەناسە و تە دڤێت من و گازندێن من
بەرەڤ گورستانێ ببەی.
كا راوەستن، من ژ سندریكێ بینە دەرێ و من
نەڤێت ئەز نوكە بمرم؟ هێشتا گەلەك تشت یێن ماین ئەز بكەم و بێژم، ئێكەم تشت ژی ئەز
دێ ژ بزمارا ڤێ سندریكێ دەستپێكەم! یا ژ خێركەریڤە دێ خێر بۆ هێنە نڤیسین هەكە
سندریك ژ خوڤەكر و لڤی وەلاتی هەمی كەس وەكی ڤی خێركەری تشتان ژخوە ڤەدكەن. تشتێ
سەیر ژی لڤی باژێری، شوونا ئەڤ كەسێن هەنێ بهێنە سزادان، دهێنە پاداشتكرن.
خرخرا
كلیلێ گوهێن من بەلكرن، بیرا من ناهێت كەس سندریكێ ببەتە د جهەكێ داخستیڤە. من
هەست پێكر، ئەز ب سندریكڤە دانامە عەردی و ئەو دەنگێن دگەل سندریكێ هاتینە ژوور،
دگەل گرتنا دەرگەهی بێدەنگ بوون. دەرێ سندریكێ ڤەدكەم، هەمی تشت كەڤنارن و جوان
هاتینە رازاندن. وێ هەنێ جەركەكێ ئاڤێ یە و وێڤەتر جوهنیەكێ بەری یە و برەخڤە
شالوكەكە و ل كوژیێ دی ددكە و بیرا من ل (سەعدیێ ددكبێژ) ئینا، دەما گولشێنی
شێنی دگوت و مە ملێن خوە دبەر چوخویێ بەروپشت را د هەژاندن.
ئێ باشە سندریك و ڤێرە! ئەز دەهان جاران یێ
هاتیمە ڤێ موزەخانێ. هەر تشتێ گەلەك خزمەتكری، لڤێرە یێ خانەنشین بووی و خو
ناهێلن چپكا توزێ ژی بكەڤیتە سەر. ئەڤ سندریكە ژی وەكی حەفك ستوورێن باژێرێ منە،
دەما دزی و گەندەلیێن وان ئاشكەرا دبن، شنوی دهێنە پاداشتكرن و خانەنشیكرنا وان ژی
برێز و حورمەتە. بەلێ سندریك!
پشتی
من دەرگەهێ موزەخانێ و سندریك ل پشت خوە هێلاین، بیرا من ناهێت بۆ جارەكێ چ
بهەلكەفت و چ بێ هەلكەفت، پێ من ب وێ موزەخانێ كەتبیتەڤە..!
ـ ل رۆژناما ئەڤرو ژمارە 1998 یا رۆژا 22/11/2016
دا بلاڤبوویە.
%20copy.jpg)
ليست هناك تعليقات:
إرسال تعليق