هزار دولار.. ئەڤە من چەند جاران بۆ ھەوە دوبارە كر، هەر كەسەك دێ هزار دولاران دەت! ئەڤ دوبارەكرنا وی ژ بەر وێ ژنا گەنج بوو، ئەوا برایێ وێ دگەلدا و هەر داخاز دكر، چەند سەد دولارەكان بۆ برایێ من بهێلە، دا بشێت تا سنورێ وەلاتی ڤەگەریت و چ دی داخازا كێمكرنا پارێ سیاربوونا كەشتیێ ژێنەكەت. ژ بەریكا خوە، من دو سەد دولار كرنە د دەستێ برایێ وێدا و من گۆتە قەچاخچی، درەنگە مە ب رێ بێخە؟ ئەڤە ژی نە ژبەركو ئەو ژن یا جوان و جەحێل بوو و دێ دڤێ سەفەرێدا خوە نزیكی من كەت یان دلێ من مابیتە ب برایێ وێڤە، كو ل كۆلانێن ڤی وەلاتێ بیانی، نە كەڤیتە سەر جاددان. بتنێ هەر رۆژەكا گیروبوونا مە و تا قەچاخچیەكێ دی بدەست دكەڤیت، ئەم گەلەك پاران ل هوتێل و خارنگەهان د مەزێخین و ئەڤە ژبلی خوە ڤەشارتنا مە ژ پۆلیسان.
ئەم ل كەشتیێ سیاربووین و مە دا بەحرێ. سێ جاران ئەم نزیكی سنورێن وەلاتێ یونانێ د بووین و قەچاخچی ب بەهانا پولیسێن زێرەڤانیا سنوری دكەن، ئەم د ڤەگەراندینە نیڤا بەحرێ ڤە. دووماهی جار، ئەڤێن د نیڤا كەشتیێدا، دەست ب قیژییا كرن و نیڤا كەشتیا مە تژی ئاڤ بوو. هندا دەست ب لاڤاكرن و هیڤیێن خوە گەهاندنە بەر پەرێن عەسمانی و هندان دەست ب هەوار هاتنێ كرن و هندان ژی ب چ تشتێ ل بەر دەست، بهەمی هێزا خوە ئاڤ ژ كەشتیێ ڤالا دكرن. بتنێ قاچاخچی نەبیت، چۆخكێ سەرئاڤ بوونێ ب سەر ملێن خوە داگرت و عەسلی ل پشتا خوە شداند و خوە سەرنشیڤی ئاڤێ كر.
كەشتی نقومی ئاڤێ دبوو و هەر كەسێ چۆخك ل پشتێ،
ب سەر ئاڤێ كەت و یێن وەك من بێ چۆخك و ئەڤێن دانعەمر و زارۆك، كەتنە لاڤەلاڤێ
و من ئەو هێلان و خوە هاڤێتە چۆخكێ قەچاخچی، من ملێن وی گرتن و ئەز و ئەو پێكڤە
بن ئاڤ بووین. ژبلی بزاڤا سەرئاڤبوونێ، ئەوی ب پێهنا و هەر هێزا د لەشیدا هەی،
ئەز ژ خوە ددامە پاش. ژ من و ژ وی! من چۆخكێ وی بەرنەدا و من نەهێلا سەرێ وی
سەرئاڤ بیت و چپكا هەوای بگەهیتە ناڤ سیهێن وی، تا ژ بێهنێ مالق بویی و وەكی ئاڤا
دەریایی لێ هاتی و تەزیتر. من چوخكێ وی د بەردا ئینا خارێ و ل سەر ئاڤ بوونێ،
رەخ و دوورێن من هەمی یێن بووینە كەلەخ و بیرا من چوو سەر فلمێ تایتانیك! مانا مە
دوێ ئاڤا تەزی و وێ شەڤ تاریێدا، زێدەتر ژ چەند دەمژمێران ڤەكێشا و كەشتیەكا
رزگاركرنێ، ئەم یێن ساخ و نیڤ ساخ و كەلەخێن مری ژ ئاڤێ دەرئێخستین.
هێشتا
قەچاخچیێ دبێژیت، هەر كەسێ سەفەرێ بكەت، چ مەزن چ زارۆك بیت، دڤێت هزار دولاران
بدەت و ئەو ژنا گەنجا جەحێل یا بدەڤ و لێڤێن ویڤە بوویە میچرك، بەلكویە، كێمتر
پارەی ژ وێ وەرگبریت، دا برایێ وێ ڤەگەریت وەلاتیڤە.
ژ بەریكا خوە من دوو سەد دولار كرنە د دەستێ
برایێ وێدا و من گوتە قەچاخچی، درەنگە، كەشتیێ ب رێ بێخە؟ ئەڤە ژی، نە ژبەركو
ئەو ژن یا جوان و جەحێل بوو و دێ دڤێ سەفەرێدا، خوە نزیكی من كەت یان دلێ من
مابیتە ب برایێ وێڤە، كو ل كولانێن ڤی وەلاتێ بیانی نە كەڤیتە سەر جاددان. بتنێ
ئەز دزانم ئەڤە سەفەرا مریانە و ئەڤێن لدوورێن ڤێ كەشتیێ خرڤەبوین، ساخ و نیڤ
ساخ و مری دهاتنە بەرچاڤێن من.
ـ د رۆژناما ئەڤرو ژمارە 1824 بلاڤبوویە.
%20copy.jpg)
ليست هناك تعليقات:
إرسال تعليق