بحث هذه المدونة الإلكترونية

pertook

pertook

2015/05/31

فەیس بوكە چیروك

دەمژمێر 3ی شەڤێ‌:
جارا دوێ‌ یە، دڤێ‌ نیڤە شەڤێ‌ دا بەرەڤ مێزا كومبیوتەر ل سەر دچیت و فەیس بوكێ‌ خوە ڤەدكەت. هێشتا چاڤێن وی خەوێ‌ بەرنەداین، هەر زوی بەرەڤ تەختێ‌ خوە یێ‌ نڤستنێ‌ ڤەگەریا ڤە و دەستێ‌ خوە بو سەرێ‌ وێ‌ كرە بالیفك. بێهنا پرچا وێ‌ تژی خمخمكێن وی بو، ڤیا ئەڤ شەڤە گەلەك درێژ بمینیت.


دەمژمێر 3و نیڤی شەڤێ‌:
ئەو هێلا دخەو و بەرەڤ مێزا كومبیوتەر ل سەر چوو، فەیس بوكێ‌ خوە ڤەكر. دەستێن خوە دبن پرچا خوە را برن و كەزیێن خوە یێن بەردای و قژاڤژ، ژناڤ چاڤێن خوە دانە رەخەكی و پشت سەرێ‌ خوە ڤە برن. تەزینكێن سەرمایێ‌ و رویساتیا لەشێ‌ وێ‌، ڤەگەراندە سەر تەختێ‌ نڤستنێ‌ ڤە. دەستێ‌ وی ژ سەر سینگێ‌ وی راكر و سەرێ‌ خوە پێڤەنا و دەستێ‌ وی كێشا سەر پشتا خوە. چاڤێن وێ‌ نەشییان بەرگرییا حەزێن وێ‌ بكەن و شراتییا مێیاتیا وێ‌، بەرەڤ نڤستنەكا دی ڤەبرن.
دەمژمێر 5ی سپێدێ‌:

مێزا كومبیوتەر ل سەر و حەزا ڤەكرنا فەیس بوكی، چاڤێن وی راكێشانە بەر پەنجەرێ‌. روناهیێن ل سەر جاددان ژبلی مێش و موران، نەشێن چ دەمێن نیشانكری بدەنێ‌ و ژبلی نەعیمێن تەحلێن عەسمانی، هیرە بایەكێ‌ پایزی ڤەگەراندە سەر تەختی و دیت پرچا وێ‌ بالیفك یا رەش كری. هێشتا ئەڤ دیمەنە ژبەر چاڤێن وی غەوارە نەبوی، خو دبەر دا درێژ كر.
دەمژمێمر 5 و نیڤی سپێدێ‌:
ڤەخارنا قورچەكا ئاڤێ‌، كێشا بەر مێزا كومبیوتەر ل سەر و هێشتا چاڤێن خوە ل چەند پوستێن هەڤالێن خوە یێن فەیس بوكێ‌ نە چەراندین، دوو سێ‌ چپكەكا خوە ژ بنێ‌ كوپی ڤەرەساندن و ب فنجانێن مەمكێن وێ‌ دا شور بونە خارێ‌. هەر زوی خوە كێشا بەر كەلەخێ‌ وی ڤە و تێهنا مێرانیێ‌، رەجفكێن سەرمایێ‌ ژ بیرێ‌ برن.
دەمژمێر 7ی سپێدێ‌:
روناهیا پەنجەرێ‌، گەف ل تاریاتیا شەڤێ‌ كرن. بەری شەریتا دیمەنان بدوماهی بهێت، میلێن سەعەتێ‌ ل سەر ئێك سیار ببون و درەنگ وەختی پێڤە یا دیار بو. كر و نەدكر، پێن وی تاقەتا هلگرتنا وی ڤێ‌ نەمابون. بەری چاڤێن وی باش ژێك ڤە ببن، ژبلی بالیفكێ‌ ل سەر تەختێ‌ خوە نەدیت و هەست ب شەرمێ‌ كر.
دەمژمێر 7 و نیڤی سپێدێ‌:
بەری چاڤێن وێ‌ روناهیا پەنجەرێ‌ هەمبێز بكەن، چەق چەقا ئامانان تژی گوهێن وێ‌ بو. پێن خوە یێن كێشاینە بن زكێ‌ خوە و بالیفك یا دناڤ دەستێن خوە را شداندی. هەر زوی خوە ب بەر ئێك ڤە ئینا و هێشتا كەسێ‌ دەرگەهـ ل سەر ڤەنەكری، رازانا خوە راستڤەكر.
دروژناما وار ژمارە 1337 دا بلاڤ بویە
عبدالرحمن بامرنی
إرسال تعليق