دەستھەلاتا کومەلگەھی د چێکرن و ژ ناڤبرنا رەوشت و دیاردەیان دا ‌

عبدالرحمن بامەرنی‌20/8/2011
1  ـ  2
دێ ھەولدەین چەند دیاردەیەکان کو بوینە تیتال (عادات) لدەڤ خەلکی، بەرچاڤ بکەین! سەرەرای پابەندبونا خەلکی بوان دیاردە و تیتالان ڤە، بەلێ ژبەرکو وان رەوشت و تیتالێن نوی، دگەل نوییاتیا خوە چ گوھرینێن باش پەیدا نەکرینە، کو ئەو گوھرین حەزا خەلکی و تێگەھشتنا وی تێر بکەن، دێ بینی دەما دبیتە گەرا ساخکرنا یان روژا وێ دیاردەیێ، ڤێجا چ ئەو دیاردە خوشی بیت یان نەخوشی یان ھەر ھەلکەفتەک، خەلک ب کورەی و نە ئارامی قەست دکەتێ. جارێ بەری خوە داھێلینە ناڤ کاکلکا بابەتێ خوە، دڤێت بزانین تیتال چاوان پەیدا دبن؟ پەیدابونا ھەر رەوشت و تیتالەکێ نوی، ڤێجا چ ئەو تیتالە لبن ھێز و گڤاشتنا کومەلگەھی پەیدا بیت، یان چاڤلێکرن بیت، دەما پترییا کومەلگەھی ڤێ دیاردەیێ پەسەند بکەن و دناڤ خوە دا دوبارە بکەن، ڤێجا یا گرنگ نینە ئەو دیاردە لبن چ بارودوخ دا ببیتە تشتەکێ ئاسایی، چ لبن گڤاشتنێن جڤاکی یان سیاسی یان ئاینی پەیدا ببن، یا گرنگ ئەڤ تیتالە دھەلکەفتان دا دھێنە دوبارەکرن!  ژ دوبارەکرنێ ژی، دگەل بورینا دەمی کومەلگەھـ دێ پێڤە دھێتە گرێدان و تا دگەھیتە وی راددەی کو ئەڤ کومەلگەھە ب ھەمی ئاستێ ھزر و رەوشەنبیریەتا خوە ڤە، چ باوەری پێ ھەبیت یان نە، دێ بەرگریێ ژێ کەت و ھەر ئەڤە یە ژی پیروزیێ ددەتە تشتان و ناسناما مللەتان پەیدا دکەت. ئێک ژوان تشتێن بوینە دیاردە و خەلک دناڤ خوە دا دوبارە دکەت، گێرانا شێوازێ داوەت و شەھیانا یە، ئەڤێ نوکە دھێتە دیتن، ئەگەر مروڤ لڤان گوھورێنێن ب سەر دا ھاتین سەح بکەت، دێ زانیت کا ئەڤ گوھورینە لبن چ گڤاشتن پەیدا بوینە و بەرەڤ چ ئاراستە ڤە دچن.    ل بەراھیێ ل سالێن ھەشتیان و پێدا، گێرانا داوەتان د سێ روژان دا دھاتە کرن، روژەک بو گێرانا خەنایێ و روژەک بو سەرشویێ و ڤەگوھاستنا بیکێ و روژەک ژی بو سەر سبەحیێ، ژبەر مەزنبونا باژێری و خرابییا بارێ ئابوری یێ پشتی شەرێ ئازادییا عیراقێ خەلک تێدا بوری، ئەڤ داوەتە لناڤ باژێران بتنێ مان دوو ئێڤاری، ئێک بو خەنایێ و یا دوێ ژی بو داوەتێ. دقوناغا دویڤ دا، ژ ناڤ تاخان بو ھولان ھاتنە ڤەگوھاستن و دھولان ژی ڤە نوکە دیاردەیەکا دی یا دھێتە دیتن، ئەو ژی بتنێ شیڤ خارن، یان کو داوەت و شەھیان ناھێنە کرن، داخوازکەرێن سەر داوەتێ بتنێ دێ چن رویننە خارێ و دێ شیڤێ خون، ھەر ئێک جودا دێ چیتە سەرێ زاڤایی و سەر سبەحییا وی دەتێ و دەرکەڤیت، ئەڤا ھە ژی زێدەتر لبن فشارەکا دینی بویە کو داوەتێن تێکھەلی بھێنە کێمکرن، لێ ئەڤ گوھرینا دوماھیێ لڤێرە بتنێ نە راوەستا، بەلکو سەرەرای نەبونا چ سترانبێژا و جوقێن موزیکێ و ستران گوتنێ و داوەتێن تێکەلی، مودێلەکا دی دەرکەت، بتایبەت ئەوێن خوە زێدەتر ب حزبێن ئیسلامی ڤە دگرن، ئەو ژی دانانا پەردێ یە دناڤبەرا ژن و زەلامان دا یان کو تا دوو ھەڤژین ژی پێکڤە بچنە ڤێ شەھیانێ بو پیروزکرنا بیک و زاڤایان، دڤێت بھێنە ژێک جوداکرن، ژن بو لایەکی پەردێ و زەلام بو لایێ دی یێ پەردێ!   تا ڤێرە ئەڤ گوھورێنێن نوی یێن دبنە دیاردە و یێ دبنە تیتال و ئەم یێ پێگیریێ پێدکەین! بەلێ یا جھێ حێبەتیێ مودێلەکا دی یا دەردکەڤیت، مالباتا زاڤایی داخوازکەرێن خوە ل خارنگەھان مێھڤان دکەن، ل سەر مێزەیان ھەر چەند کەسک درویننە خارێ و ھەروەکو تو دچیە خارنگەھەکێ خارنەکێ بو خو داخواز دکەی  و دەما تە خارنا خوە خار، دێ چیە سەرێ زاڤایی، سبەحییا وی ژی بو کەیە دکارتونێ دا، ژبەرکو ھەڤژینا تە و زاروکێن تە ھەر تو نزانی ل کیڤەنە، ژبەرکو یان یا پەردە کریە یان ژی دھولەکا تایبەت ب ژنان ڤەنە، دڤێت تو تەلەفونەکێ بو بکەی یان ژی زاروکەک ئەگەر ل وارا ھەبیت فرێکەیە ددویڤ را، ئەگەر ژی دێ نیڤ سعەتێ ل پیا مینی، تا تو رێکەکێ دبینی ئەو ژی خاترا خوە ژ بیکێ بخازن و دەرکەڤن. پسیار لڤێرە ئەوە، ئەم دێ چاوان ئەڤان گوھورینێن بلەز و کورە ل جھەکێ باش راوەستینین و ئەم شانازیێ پێببەین، دەما روژەکێ ئەم بو خوە بکەینە تیتال و بەرگریێ ژێ دکەین؟!!