عبدالرحمن بامەرنی
د سوشیالێ دا ئەز یێ چالاكم و ھەڤالێن من بەردەوام دگەھنە پێنج ھزاران و ھەر دەما داخوازی زێدەتر ھاتن، ئەز ھندەكان د كەزێخم. دەما ئەز بەحسا سوشیالێ و ھەڤالان دكەم، ئەز بەحسا پەیوەندیان دكەم، ژوان پێنج ھزاران رەنگە بتنێ دو تا سێ بۆ پێنج ھەڤالێن بەردەوام من ھەبن رۆژانە ئەم پەیوەندیێ دگەل ئێك دكەین، پێنج ھەڤالەكێن دی ژی یێن كاری و پێنج ھەڤالەك ل دەوروبەران و پێنجەك بۆ پرسیاركرنێ و پێنجەكێن دی ژی (تەرح) و یا من مەبەست پێ ھەی، ژبلی ئەڤێن من گوتین ب رەنگەكی و دویان من پەیوەندی دگەل ھەر پێنج ھزار كەسێن دی ھەنە، چ ئەز بابەتێن وان ببینم و چ ئەو بابەتێن من ببینن و چ مە (كونتاك)، مەبەست مە لایك و كومێنت دگەل بابەتێن ئێك ھەبن یان نە، لێ ڤان تورێن كومەلایەتی ئەم یێ گەھاندینە ئێك و ئەم یێن ل سەر ھندەك تشتان بەشدار كرین. بۆچی من بەحسا ھەڤالان كر! رەنگە راستە راست مرۆڤ پرسیارێ ژ ھەر كەسی نەكەت، لێ د سوشیالێ دا دێ پرسیارا خوە كەی و گرنگ نینە تە ناس بكەت و دێ بەرسڤا خوە وەرگری و ئەڤان دەھان جاران دگەل من چێبوویە و تشتێ كەیفا من ب پرسیارا گەنجەكێ ھاتی دەما پرسیارا تەمەنێ من كری و پاشی گوت،
تو چاوان شیایە دڤی ژیێ خوەدا خوە ب گونجینی؟ مەبەستا وی، ئاستەنگێن ژیانێ و خوشی و نەخوشی، خوە گونجاندن و ئەڤی گەنجی بێزاری ژ نەدادیێ ددیت، بێزاری ژ بێكاریێ ددیت، بێزاری ژ گەندەلیێ و نە یەكسانیێ ددیت و من گوتێ ئەز نەشیایمە چ جارەكێ خوە ب گونجینم، لێ دێ ھندەك خالێن راوەستیانێ بێژم، بەلكەی ژیانا تە خوشتر لێبكەن كو تو ژی خوە ب گونجینی، گوت بلا. من گوتێ من یا خوە فێری ھندەك تشتان كری و ژوان، (چ تشتەك دووماھی نینە) و (دەما دەرگەھەك دھێتە گرتنێ، پەنجەرەیەك دگەل ڤەدبیت) و (دەما ئەز ماندی دبم ئەز دكەمە كەنی) و (ئەز یێ فێر بوویم كەنگی خوە بێدەنگ بكەم، دەما جھێ ئاخفتنا من نەما) و (دێ چاوان یێ ب ھێز بم، دەما ب زوری دشێم خوە ل سەر پێن خوە بگرم) و من گوتێ ئەڤێن ھەنێ ئەز ھەمیان دكەم، نە ژبەركو ئەز شیایمە خوە ب گونجینم، بەلكو من چ چارەیێن دی نەبووینە و تشتێ بۆ من سەیر، ئەڤ ئاخفتنێن ھەنێ ل بیرا من نەمابوون، كەنگی بوون و ئەو كی بۆ خودانێ ڤێ پرسیارێ و لێ یا چ جارەكێ ژبیرا من نەچیت، دەما ئەز ل سەر كورسیێن ل سەر جاددا دادگەھا كەڤن روونشتی و من چا ڤەدخار، كەسەك ھات و گوت سەیدا ئەز ئەو گەنجم یێ تە شیرەت ل من كری و نوكە یێ بوویە خودان كار و بەری بچیت ژمن و ژ وی، گوت ب ھەمی پیرۆزیان چایا تە ل سەر حسابا منە.
ليست هناك تعليقات:
إرسال تعليق