عەبدولڕەحمان بامەڕنی
ئەم یێ بەرەڤ بانگەشەیا هەلبژارتنان دچین و ژبەركو هەلبژارتن بخوە پرۆسەكا دیموكراسییە، دڤێت ئەم رێزێ ل وێ دیموكراسیەتێ بگرین و ئەم خوە ژ گوتارا كەرب و كینێ دویر بگرین. هەلبژارتن یان كو ھندەك كەس، دێ نوینەراتییا مە دكارەكێ دەستنیشانكری دا كەن و ژبەركو مە هەمیان مافێ هەلبژارتنا وان نوینەران هەیە، یانكو ئەم هەمی د پرۆسەیەكێ دا بەشدارین و ئەم ب دەنگێ خوە دێ ئاڤاھییەكێ دروست كەین. ئەگەر شەنگستێن وی ئاڤاھی د موكم بن، ئەڤە بۆ ماوەیێ چوار سالێن دی، دێ ژیانا مە یا گرەنتی بیت و دەرئەنجام، دێ كێشێن مە كێمتر بن و خزمەتگوزاریێن مە زێدەتر بن و ئەو ئاڤاھییێ ئەز ژێ بەحس دكەم، پەرلەمانێ كوردستانێ یە و بتنێ ئەندامێن پەرلەمانی دشێن، شەرعیەتێ ب دروستبوونا وی ئاڤاھی بدەن.
ئەركێ ل سەر ملێن مە وەك هاولاتی دمینیت ئەوە، ئەم ڤێ پرۆسەیێ دروست دویر ژ گوتارا كەرب و كینێ ئەنجام بدەین، ب دەنگێ خوە و ئەوا مە باوەری پێهەیی، ئەم ڤان نوینەران هەلبژێرین و دگەل راگەهاندنا ئەنجامان، ھینگێ ئەمێن هاولاتی بتنێ دێ تەماشەڤان مینین، حزبا خودانا زێدەترین نوینەر، ئەو دێ بیتە خودانا وی ئاڤاھی و چ باش و چ خراب، دڤێت ئەمێن هاولاتی ب ئەندازەییا وێ رێڤەبرنێ د رازی بین. یا ل سەر مە وەك هاولاتی دمینیت، چ تشتە؟ ئەم بەهایێ دەنگێ خوە بزانین و ئەوێ ئەم دەنگێ خوە پێددەین، چ تاك بیت چ حزب بیت، ئەو باوەری بومە دروست كربیت، بەلێ ئەو دێ شێت دگەل مەدا یێ بەرەوام بیت و دڤێت ئەم دوو تشتان ژ ئێكجودا بكەین، ئەو ژی هەڤركی و كەرب و كین. ئەم هەڤركییێ ل سەر وی كەسی و ل سەر وێ حزبێ بكەین، یا مە باوەری پێهەی كو ئەو دێ ل وی ئاڤاھی بیتە خودان و یا دوێ، ئەم بهەمی رەنگەكی خوە ژ گوتارا كەرب و كینێ دویر بگرین و ژبیرنەكەین، دڤێ دەمێ بهێتدا تا رۆژا دەنگدانێ، سەدان دەستێن رەش دێ پەیدا بن و بناڤێن جودا دێ كەرب و كینێ دناڤبەرا مەدا دروست كەن و دڤێت ئەم ب ھشیارانەتر، سەرەدەریێ دگەل پێشهات و رویدانان بكەین.
ليست هناك تعليقات:
إرسال تعليق