تكێتا شەمەندەفرێ

تكێتا شەمەندەفرێ

 

ئەو رۆژا من ڤیایی ل بیرەوەریێن خویێن نە نڤیسی ڤەگەرم، ئەو ھەمان رۆژ بوو، دەما ئەز سواری شەمەندەفرێ بوویم و ل دووماھی فارگوونا وێ، من جھێ روونشتنا خوە دیتی.. فارگوونا ئەز لێ سیار، دووماھی فارگوون بوو ژ شەمەندەفرێ و یا تژی سەرنشین بوو. جووت جووتە ملێن وان ب پێکڤەبوون و ئەڤە ژی نە ب حەزا وان بوو! دەما مە تکێت د برین، تایبەت ئەگەر ئەم تاک باینە، ئەم و چانسێ خوە و دێ روونشتنا مە ل تەنشت کێ بیت و ڤێجارێ ئەز ل دووماھییا ھەمییان بووم و کەس ل تەنشتا من نەبوو.. ئەز باش دزانم ژی، جھێن ھندەکان بۆ وان د خوشن و حەز ناکەن، زوی بگەھنە دووماھی قوناغ و دووماھی وێستگەھێن خوە..

ھێشتا ئەز یێ مژوولی تێھزرینێن خوە بووم، ئەوێ ھەنێ عاشقێ پەرتووکانە و ئەوێ دی ملێ وی ب ملێ کچەکا جوانڤەیە و ئەوێ دی ھیتفوونێن وی د گوھێن ویرانە و ھەردوو کەسێن ل بەر سینگا وان ژی، ب لڤاندنا دەستێن وان، مرۆڤ ھەست دکەت، ئەو چەند ب گەرم و گوری، یێ بابەتەکی دناڤبەرا خوەدا چارەسەر دکەن و یێ شروڤەکرنان ددەنێ.

 ھێشتا ئەز یێ دڤێ تەماشەکرنێدا، دەنگەکی ڤیزێن ژ گوھێن من ئینا، لێ من ژێدەرێ دەنگی نەزانی و راستی ژی بیت، من چ گرنگی پێنەدا. دووبارە بوونا ھەمان دەنگ، ئەز کومڤەکرمە سەر ئێکڤە و من ل روونشتیان نێری و کەسێ ژوان تاقەتا وێ چەندێ دگەلدا نەبوو، دەنگەکێ ژ وی رەنگی دەربێخن و ھەر وەکو دیار، کەسێ گازندە نەبوون كو دەنگەكێ ناموو ژ جھەكی ھاتبیت و ھەر ئێكێ دڤێ شەمەندەفرێ دا چیرۆكەك دگەلدا ھەبوو و نە دڤییان چ تشتێ دی ل چیرۆكێن خوە زێدە بكەن.

دووبارە بوونا ھەمان دەنگ، ئەز ل سەر ملێ من یێ چەپێ زڤراندم و ژبلی جامی و لەزاتییا شەمەندەفرێ، ھندەک دار و جاددە و گرکێن ئاخێ دکەتنە بەرچاڤێن من و دەما ل ملێ خویێ راستێ ژی زڤریم، ھەمان تشت من دیتن، قەد د ھزرا مندا نەھات، ئەز ل پشت خوە بزڤرم و دوبارە ئەز ل وان مرۆڤێن لبەر سینگا خوە زڤریم، ھەردوو کەسان ملێن وان پێکڤەنە و بتنێ ئەز نەبم. تو بێژی ئەگەر دەما ل تکێت برینێ، ملێن من و کچەکا ھەڤتەمەنێ من کەتبانە پێکڤە و دڤان چەند دەمژمێرێن رێکێدا، مە پەیوەندییێن ھەڤالینیێ دگەل ئێک نە گرێدابانە و ئەوان پەیوەندییان، ئەم ل دووماھیێ گەھاندبایینە ئێک یان ژی نڤیسەرەک یان ھونەرمەندەک ل تەنشت من روونشتبایە و دڤان چەند دەمژمێرێن رێکێدا، حەز و ئارەزوویێن من ب ئاقارەکێ دیترڤە بربانە و ھێشا ئەز مژوولی ڤێکدانا ڤان سەرە ھزران، ڤیزێنا دەنگی ڤێجارێ، ئەز ژ ھەمی ھزرانم ڤەقەتاندم و نزانم بوچی، من ھزرا بەرێخوەدانا پشت خوە نەکربوو، دەما لپشت خوە زڤریم، کچەکا لدویڤ شەمەندەفرێ دکەتە غار و یا تشتەکی دبێژیت و ھەر چەندە من نەزانی ئەو چ دبێژیت، لێ یا ئەز شییایم بۆ بکەم، شەمەندەفر راوەستییا و دگەل سیاربوونا وێ کچێ و تکێتا وێ د دەستیدا، ل سیاربوویێن شەمەندەفرێ دنێری و تا چاڤێن وێ ب چاڤێن من کەفتین و ھێشتا ئەز تێنەگەھشتیم کا وێ چ ژمن دڤێت، گیانێ وێ د سەردا چوو بوو و دەما من ل تکێتا وێ نێری، جھێ وێ ل تەنشتا من بوو و تا دووماھی وێستگەھا ئەم د گەھشتینێ، دا تاکە ھەڤالا من یا رێکێ بیت..

دکوڤارا پەیڤ ژمارە ٨١ یا ھاڤینا ٢٠٢٠ێ دا بلاڤبوویە