عبدالرحمن بامه‌رنى
ئەرێ بوچی ئەم كورد تا نوكە دبینە دار دەستێ كومەلگەهێن دی و هەر چاوا وان بڤێت، وەسا مە د دەنە بەر كاشوێ خوە؟، رەنگە هەر كەسی ئەڤ پسیارە ژخوە كربیت و هەر ئێكی ژی لدویڤ مێشك و تێگەهشتنا خوە بەرسڤەك بۆ كەر كربیت. ئەڤ گوتنا من یا ل سەری، دێ لدوور بەرنامێ (میناك) بیت، ئەڤێ ژ لایێ میدیاكارا كچ (هەودان سەعید) ڤە دهێتە پێشكێشكرن و ئەگەر نە بێژم هەمی خەلەك، بەلێ پرانیا وان من بەرێخوەدایێ و دوماهی خەلەك ژی یا بوویە جهێ دان و ستاندنێ و كومێنت و رەخنە بۆ چووین، بەرنامێ (كچ و پروسا شینكرنێ)، كو بەرنامە ب 26 خولەك و 48 چركان بخوە ڤە دگریت و چەند كەس دناڤ بەرنامەیدا هاتینە مێهڤانكرن و ئێخستینە بەر پسیارا و بوچوونێن وان هاتینە وەرگرتن.
بلاڤبوونا بابەتی و پشتی كەتیە بەر چاڤێن خەلكی، كو گەلەكان هێرش و رەخنەیێن خوە ل بەرنامەی كرینە، هندەكان بناڤێ ئاینی و هندەكێن دی ژی بناڤێ رەوشت و تیتالێن كوردی بەرنامە رەخنە باران كریە و مخابن، كو گەلەك ژ كومێنتان د چوونە د بابەتێ ناڤزراندنێدا. لدەستپێكێ ئەم ب پرسین، ئایا دەما ئەم بەحسا ژنان دكەین، ئەم بەحسا مافێن وان دكەین و ئازادیا وان دكەین، ئەڤە دبیتە سەربەرداییا ژنان؟ نەخێر، ژبەركو ئەم یێ هەولددەین جڤاكەكی پەیدا بكەین، ژن تێدا یا كارا بیت، ئەڤرو ژن یا بوویە قوتابی و دچیتە خواندنا بلند و فەرمانبەرە و مل بملێ زەلامی یا هەمی كاران دكەت و دگەل هندێ ژی یا خزمەتا زەلامێ خوە و زارۆكێن خوە ژی دكەت و بەرڤاژی ئەگەر هەڤبەر بكەین، پەروەردەكا باشتر ددەتە زارۆكێن خوە ژ ژنەكا، نە خواندەڤا، ئەڤە وەك دەركەتنا ژنان و خواندنا وێ. ئەگەر هەڤبەركرنەكا دی ژی بكەین، دناڤبەرا كچا قوتابی و یا بابێ وێ نەهێلیت ژ خانی دەركەڤیت، دێ بینین كچا خواندەڤا ئەگەر كورەكی بۆ خوە هەلبژێریت ژی، دێ ئێخیتە دبن چەندین فلتەرانرا، كا كی یێ باشە و كی هەست ب بەرپرساتیێ دكەت و كیش كور ژی نە هەژیە ببیتە هەڤژینێ وێ یێ پاشەرۆژێ یانكو هەلبژارتنا وێ دێ یا تەندروست تر بیت ژ یا دخانیڤە، ژبەركو ئەو كچا بابێ وێ نەهێلیت ژمالێ دەركەڤیت، بهەر حالێ هەبیت، جلك راخستنا سەر بانی بیت یان شووشتنا بەر دەروكی بیت یان تەنەكێ گلێشی بیت، دێ چاڤێن وێ ب كورەكی كەڤن و رەنگە حەژێكرنەكا نە دروست پەیدا بكەت و ئەگەر بگەهیتە هاوسەرگیریێ ژی، ژبەركو ئەو كورێن بتنێ ل ناڤ جاددە و كولانان دگەرن، ئەو كور د سەركەفتی نینن و زێدەتر ئەو یێن بێ كار و هەست ب بەرپرساتیێ نەكەن، ئایا دێ ئایندێ كیش كچێ ژ هەردوویان باشتر بیت؟
خالەكا دی كو بوویە جهێ دان و ستاندنێ، ئایا ئەم چاوان بەرێخوە ددەینە رەوشت و تیتالێن خوە، ئایا ئەم ژوان هەمی تشتێن ژ باب و باپیرێن مە بومە مای، د رازینە یان دڤێت ئەم دگەل پێشكەفتن و عەقلیەتا نوكە جیهان گەهشتیێ خوە بگونجینین! مە بڤێت و نەڤێت جیهانگیریا دهێتە د خانیێن مە ڤە و ئەنترنێت و موبایل و تلستار و درامایێن بیانی و فلم و تا دوماهیێ، دەما ئەڤ جیهانگیریە دهێت ژی، شەرمێ ژ كەسێ ژ مە هەمیان ناكەت و بێ دەرگەهـ قوتان دهێتە ژوور، ئایا چ ل سەر مە پێدڤیە ئەم بكەین، تەماشەڤان بین و چ دئینیت بلا بینیت یان ژی بەرنامان ل سەر دروست بكەین و ڤەكولینان ل سەر بكەین و دێ چاوان شێین بەرسینگا وان گرین و تشتێ باش وەرگرین و خوە ژ یێ خراب دوور ئێخین؟.
ئها دڤێت ئەم پسیارێن ژڤی رەنگی ژ خوە بكەین، ئەم هەمی بابەتان ب رۆژئاڤای و سكسی و بێ دینیێ ڤە گرێنەدەین، ژبەركو ئەم مللەتەكین، ژ پتریا مللەتێن خوە ب ئیسلامێ ددەنە دیاركرن پاقژتر و زێدەتر رێزێ ل ئاینێ خوە و رەوشتێ خوە دگرین، مخابن، هەمی مللەتان بۆ خوە مفا ژ پێشكەفتن و گوهورینان وەرگرتن و تا نوكە ژی، ئەو مامەلا ئیسلامێ دگەل مە ناكەن و كومەلكوژیان دگەل مە دكەن و كەس ئیدانە ژی ناكەت، دڤێت ئەم سەربورێ بو خوە ژ مێژویێ وەربگرین و ئەو تشتێن ب سەرێ كوردان دهێن و خوە وەلاتەكێ ئیسلامی ژی شەرمەزار ناكەت.
لدوماهییا گوتارا خوە كو من دڤێت زومێ بێخمە سەر، ئایا مە پسیار ژخوە كریە بوچی ئەم پێشناكەڤین؟ بوچی كەسێن بەهرەمەند ژمە دەرناكەڤن؟ بوچی مە پیشەنگ دبوارێ رەوشەنبیری و هونەری وووو دا نینن؟ ژبەركو مە كەلتورێ ئێك و دوو شكاندنێ هەیە، ئەم دوو كەس لدەف ئێك رونین، ئەم بەحسا كەسێ سیێ یێ دكەین و هەولددەین بهایێ وی كێم بكەین و ئەڤە دهەمی بوارەكێ ژیانێ دا.
• درۆژناما ئەڤرو ژمارە 2299 ل رۆژا 25/3/2018 دا بلاڤ بوویە.
%20copy.jpg)
ليست هناك تعليقات:
إرسال تعليق