كێم دكان نەبن، ھەكە پرانییا وان فێقی و زەرزەواتی بەرچاڤ دكەن و دفرۆشن. لێ دەما رێكا من ب بازاری كەفتی، رێكا من كەتە سەردابا فێقی و بھارە، تو بێژی ل بھارێ چ رەوشەك بكەڤیتە ڤێ سەردابێ و مێزێن تژی فێقی؟ شینكاتی و بێھنا چییای ژێ دھێتن، تایبەت بۆ كەسەكێ وەك من، تا زركورییا خوە من ل ناڤ چییا دەرباز كری و ژیانا گوندان و عاقاری. عاقار ژی ل بھارێ، گیایێن بھاری و ئھا ڤی دیمەنێ من دھزرا خوەدا چێكری، ئەز كێشامە بەر مێزێن فێقی و زەرزەواتی لڤێ سەردابێ. ئەز ل بەر مێزەكا حلی ترشكان راوەستام و كەسەكێ ھەڤال ئەز دیتم و یێ دكەتە كەنی، من پرسیارا كەنیا وی ژێكر، ئەڤێ لپشت مێزێ گوتی ئەز دێ بۆ تە بێژم، گوت یێ پرسیارا (جەرجیرێ) دكەت و ئێكی یا گوتیێ (جەرجیر ڤیاگرا سروشتییە) و بێ دبێژیت گوتنەكا ھەی دبێژیت (ئەگەر خەلكی زانیبا كا جەرجیر دشێت چبكەت، دا لبن تەختێ خوە یێ نڤستنێ چینن).
من ژی گوتێ: ئێ دێ نیشا بدە مالا تە، خێرەكە دێ دگەل كەی، بلا بچیت بۆ خوە بكریت و چ ل سەر دلێ خوە نەھێلیت! گوت برایێ من، ئەڤە دوو سالە ئەز ل پشت ڤێ مێزێ و ھەكە مفا گەھاندبا ئێكی، دا ئەز ژ ھەمیان زێدەتر مفای ژێ وەرگرم، ھندی من یا خاری، ڤێجا چ ب ترسی یان لناڤ نانی یان ل بەر گرارێ! لێ باوەربكە تشتەك لمن پەیدا نەكریە و مە ھەرسێكان كرە كەنی.
لێ خودانێ مێزێ كەنیا خوە راوەستاند و گوتە ھەڤالێ من، باشترین جەرجیر ئەوە، تو باوەرییا خو ب ھێز و شیانێن خوە موكم بكەی، ژبەركو ئەڤرو وەرزێ جەرجیرێ یە و سوبەھی دێ چێكەی! ئەڤ دێ چكەییا ھەنێ ئەز ل بەرامبەری دەھان پرسیارێن بێ بەرسڤ راوەستاندم، ژبەركو ژیانا مە ھەمی یان راستە راستە یان چەپە چەپە و ئەم رییا سیێ نزانین، لەو زوی د ھلنگڤین..!
*درۆژناما ئەڤرودا (گوشا بیناھی) ژمارە 3331 دا بلاڤبوویە.
ليست هناك تعليقات:
إرسال تعليق