رەنگە نڤیسینا ل سەر وی جهێ تو لێ ژ دایكبووی، پیچەكا پرسیارێ بدووڤ خوەڤە بینیت، لێ ما چ قەیدییە ئەگەر ئەو نڤیسینا هەنێ ببیتە دەرگەهەك، كو گەلەكێن دی چاڤلێكرنا جوانیێ و خزمەتكرنا وی جهی بكەن، ئەوێ زارۆكینییا خوە دناڤدا مەزن كری. ئەڤە دەستپێكەكە، كو بامەرنێ بكەمە نمونا ڤێ نڤیسینێ، كو چەند گەنجێن خوە بەخش، كارێ خزمەتكرنا ڤی باژێركی ئێخستیە سەر ملێن خوە، ئەڤە د دەمەكیدا، ئەگەر هەر كەسەك ژمە حەز بكەت، پویتەی ب جوانییا تاخێ خوە و گوندێ خوە و باژێرێ خوە بدەین، گەلەك یا ئاسانە و هەر چنە بیت، ئەو جهێن ئەم قەست دكەینێ و سەیرانێ دناڤدا دكەین، پیس نەكەین، ژبیرنەكەین ژی، ئەڤرو سەردەمێ گەشت و گوزارێ یە و ئەگەر ئەم حەز بكەین، هەر ئێك ژمە و لدویڤ ئەوا ل بەر دەست هەی، ئەم دشێین بەرێ خەلكێ دی بدەینە دەڤەرێن خوە و هوسان گوند و دەڤەر و باژێر گەشێ دكەن و خەلكێ وان پێ بكار دكەڤیت و بەراهی و دووماهیا خزمەتكرنێ ژی، بەرهەم پێڤە دهێت و ئابورا دەڤەرێ گەشێ دكەت و ئەوێن ل دەڤەرێ ژی دژین، دێ شیانێن داهێنانێ لدەف وانان خورتتر لێهێت.دا بزڤرینە بابەتێ خوە و هندەك ژوان خزمەتان باس بكەین، ئەڤێن سەرنجا من راكێشاین، كو بكەمە هێڤێنێ ڤێ نڤیسینێ و ئەو ژی، ئێك: ڤەكرنا پەرتوكخانەكا گشتی و پێشكێش كرنا سەدان ناڤ و نیشانێن پەرتووكان، وەك خوبەخش ژلایێ خەلكێ بامەرنێ بخوەڤە، هەر چەندە، بەشەكێ هاریكاریێ رێڤەبەریا پەرتوكخانا بەدرخانیان ب ستوخوڤە گرتبوو، لێ بەرامبەری ئەو پەرتووكێن دیاری گەهشتینە پەرتوكخانێ، رێژەكا كێم بوون. دو: دانان و دروستكرنا پەیكەرەكی لنیڤا سەنتەرێ بامەرنێ، كو خوە بەخش ژلایێ گەنجەكێ بامەرنێ بخوەڤە هاتیە دروستكرن. سێ: هەوەكا بویاغكرنا بازارێ بامەرنێ، كو بازار ئێكەم وێستگەهە، خەلك ل هەر دەڤەرەكێ قەست دكەتێ و دا كو بازار ب قەد وێ ماندیبوونێ بیت و چاڤێن وی كەسی تێر بكەت، یێ ئەو سەرەدانە بۆ كری، گەنجێن بامەرنێ د هەوەكا خو بەخشیێدا و بۆ چەندین رۆژان رابوون ب بویاغكرنا روویێ بازاری و ب ئەندازەیەكا جوان.
چوار: ئێك ژ كانیێن جوان ل بامەرنێ (سەروكانی)، كو هاتبوو پشت گوهـ خستن و سەرەرای جوانییا وێ و ل دەمەكی ناڤدارییا خوە دناڤ ئەدەبیات و شعرێن كلاسیكدا هەبوو، وەك بەیتا (حەودێن بن گویزان) یا هوزانڤان (حوسنی بامەرنی) و دیسان چەند شعرێن ئەحمەدێ نالبەند، كو باس ل وێ كانیێ كرین، گەنجێن بامەرنێ و ب جوانترین ئەندازە، رابوون ب نوژەنكرنا وێ كانیێ و هەر كەسێ سەرەدانێ بۆ بكەت، ئێك ژ كانیێن سروشتی دێ سەرنجا وی بۆ خوە راكێشیت و ژێ نابوریت، ئەگەر لدەف نە راوەستیت و چەند فرەكێن ئاڤێ ژێ ڤە نەخووت. پێنج: گێرانا فێستیڤالا دانیكان، كو هەر ژناڤێ وێ دیار و سەرەرای ئامادەكاریەكا بچووك د گێرانا وێدا، لێ بۆ جهێ پویتەدانا وێ و گەلەك كەسان دویڤچوون ل سەر دەمێ گێرانا وێ دكر و خوە بەرهەڤكرن، كو دڤێ كومڤەبوونا كەلتوریدا بەشداریێ بكەن.
پێنەڤێن ئەڤێن هەنێ هەمی ژی كارێن خوە بەخشن، پشتەڤانییا وان ژی، ئەگەر تشتەك پێ بڤێتن ژی، هەر ژ خەلكێ وێ بخوە بوویە و ئەڤێن شیان و حالێ وان ژ كەسێن دی باشتر و هەر كەسی لدویڤ پێچێبوونا خوە و ئەگەر نە، ئەڤ كارێن دی هەمی خوبەخش بووینە و گەنجێن ڤی باژێكری پێ رابووینە.
دا بزڤرینە بابەتێ خوەڤە، ئەم گەلەك جاران گازندێ دكەین و تایبەتی ژی ژ پویتەپێنەدانا ب پارێزگەها دهوكێ ژلایێ خزمەتگوزاریڤە و درێژەپێدانا قەیرانێن ئابوری و یێن سیاسی، ئەڤێن كارتێكرن ل هەرێما كوردستانێ هەمیێ كرین و تایبەتی ژی ل پارێزگەها دهوكێ و ئەو ژمارا زێدەییا ئاوارەییان ل پارێزگەهێ، لێ ئەم ژبیردكەین ژی، كو پارێزگەها دهوكێ ژ روویێ گەشت و گوزاریڤە دشێت ئێكەمین پارێزگەهـ بیت، بۆ راكێشانا گەشتیاران هەر چنە بیت ژناڤ عیراقێ و پارێزگەهێن ناڤەراست و باشوورێ عیراقێ، تایبەت ژی پشتی ئاسایبوونا پەیوەندییان و نەمانا گروپێ داعش یێ تیروری و ئەگەر مە بڤێت، ئەم ڤی كەرتی پێش بێخین، سەرنجا گەشتیاران بۆ دەڤەرێن خوە راكێشین، دڤێت هەر كەسەك ژمە، تا د چوارچوڤێ دەڤەرا خوە ژیدا بیت، ئەم دشێین ب هەوێن ژڤی رەنگی راببین و عەقلیەتا گەشتیاری پەیدا بكەین و هەر چنەبیت و ژبلی كو ئەو جهێن ئەم لێ دژین، دێ جوانتر بن، دێ دەرگەهەكێ ژیارێ ژی بۆ خوە و كەس و كار و گوندیێن خوە ژی ڤەكەین.
درۆژناما ئەڤرو ژمارە (2649) 2/9/2019 دا بلاڤبوویە
ليست هناك تعليقات:
إرسال تعليق