عبدالرحمن بامەرنی
لدویڤ ئاماژەیان، ئەڤ خولا پەرلەمانێ عیراقێ بۆ كوردان یا ئاسان نابیت و كورد نەشیاینە مفای ژ خولێن بەری نوكە وەربگرن، كو ل سەر شەنگستەكێ دروست كاندیدان بۆ بەغدا بەرهەڤ بكەن و بنێرنە پەرلەمانی و هەمان شاشی و دوبارەیا شاشیێن بەری نوكە، ئەندام پەرلەمانێن مە دچنە بەغدا و ئەو دەستكەفتێن بۆ مە د دەستورێ عیراقێدا هاتینە چەسپاندن ژی، ئەم نەشیاینە پاراستنێ ل سەر بكەین و ئەگەر لدویڤ ڤان ئاماژەییان بیت و دووبارەییا شاشییان، ئەز باوەرم گەلەك ماددێن دی ژی ژ دەستورێ هەمیشەیێ عیراقێ بهێنە هەموار كرن و د بەرژەوەندا ناڤەراست و باشوورێ عیراقێدا بشكێن.
ئەو ئاماژەیێن من دڤێت بینمە زمان، ئێكەمێ وان مانشێتەكێ (مالپەرێ دوارۆژ) بوو و بڤی رەنگی و ب فونتەكێ مەزن هاتبوو نڤیسین (زێدەتری 30 كاندیدان عەرەبیێ نزانن!)، ئێ باشە لڤێرە پسیار، ئەو كاندیدێ عەرەبیا وی باش نەبیت، ئەو دێ چاوان شێت بەرگریێ ژ مافێن خوە یێن دەستوری كەت؟ راستە زمانێ كوردی ژی ل سەرانسەری عیراقێ زمانەكێ فەرمی یە، بەلێ ئایا ئەڤە بتنێ بەسە؟ نەخێر ژ بەركو، د پەرلەمانیدا و دناڤا لیژنێن پەرلەمانیدا، گەلەك تشت دهێنە ئێكلایكرن و ئەگەر ئەندام پەرلەمان یێ ئەكتیف نەبیت و زمانزان نەبیت و سیاسی و یاریكەرێ زیرەك نەبیت، ئەو نەشێت پاراستنێ ل سەر هیچ تشتەكی بكەت، ئەڤە وەك زمان ئەز دبێژم، هەر چەندە ل خولێن بەری نوكە، گازندا مە زێدەتر ئەو بوو، ئەم بۆ پەرلەمانێ عیراقێ بتنێ عەرەبی زانان فرێدكەین و سیاسی زانان نا فرێكەین و ڤێجارێ نە بتنێ سیاسی زانان ئەم نا فرێكەین، بەلكو عەرەبی نەزان ژی مە ل سەر زێدەكرن.
بابەتێ دوویێ یێ من دڤێت ئاماژێ بۆ بدەم و رەشبینیا خوە ل سەر دیار بكەم، دەست نیشانكرنا كاندیدانە ژ ئالیێ لایەنێن سیاسیڤە، كو ئەو كەس بەربژێر كرینە یێن زێدەتر دەنگان كومڤەدكەن، راستە ئەڤە مافێ هەر لایەنەكێ سیاسیە كو بەریكانا كومكرنا دەنگان بۆ پێویستە و سەنگا خوە و خەباتا خوە یا رێكخستنێ یا چەند سالان دیار بكەت، بەلێ لایەنێ سیاسی یێ كەسەكی بۆ بەغدا بەربژێر دكەت كو گەلەك تشتێن چارەنڤیس بهیڤیا وی ڤەنە و دڤێت ئەو شەری ل سەر بكەت و بۆ ئێكلا بكەت.
ئەز باوەرم شاشییا خەلكی و دەنگدەری نابیت و ئەو نا كەڤنە بەر بەرپرساتیا دیروكێ، هندی لایەنێن سیاسی دكەڤنە بەر بەرپرساتیێ، ژبەركو لایەنێن سیاسی دەنگدەر ژی یێ كریە قوربانی عەشیرەتێ و ئەو نەچارە ژ ڤێ هەڤركییا عەشیرەتكانێ دەنگێ خوە د بایی وەربكەت و هەستا وی ژی رەنگە ل وی ئاستی نەبیت، كو بزانیت بەغدا و گرنگیا بەغدا و دەستوری بۆ كوردان و مافێن وان چەندە و ل سەر ڤی بنیاتی دەنگێ خوە بدەت.
تێبینی:
درۆژناما رێگای كوردستان ژمارە 1126 سێشەمبیا 8/5/2017
%20copy.jpg)
ليست هناك تعليقات:
إرسال تعليق