2012/04/05


نڤیسین ب قەلەمێ‌ حبری


(1)

من دگەل قەلەمێ‌ خوە بریار دا، ئێدی ئەم بو هەوە نە نڤیسین! ئەم ب ئێش و ئازارێن خەلكی ڤە، ب كێشەیێن جڤاكی و ب كێشمەكێشێن سیاسی ڤە گەلەك وەستیاین. دڤێت سەحكەینە دنیایەك دی، نڤیسینێن مە دەربرینێ‌ ژ جیهانا مە بتنێ‌ بكەن. ئەم ژ دەنگێ‌ شرشرا ئاڤێ‌ و چپكێن بارانێ‌، خەریب بوینە! من جیهانەكا دی دڤێت تێدا گەنجاتیا خوە بزڤرینم، دەمی گەلەك تشت ژ مە دزینە و ئەم رەپ و رویت دناڤ جادەیێن دوو سایدی و سیهـ میتری دا هێلاینە، چاڤەرێی دەمژمێرێن كارەبێی نە و سرایێ‌ لبەر فرنێن سەمونان دگرین، دەستێ‌ مە یێ‌ ب بەریكا مە ڤە و دوو روژا، ئێك كیلویا فێقی دخوین و هەر سەری، ژ ئێك لب زێدەتر نەگەهیتێ‌.



(2)
 من تا خوە دگەهاندە وێ‌ كولیلكا دناڤ وی كەڤرێ‌ هشكارە را، شوین بوی، دەستێن من هەمی دسەلخین و تا ئەرزنكێ‌ خوینەلو دبون. براستی جوانی و بێهنا وێ‌ كولیلكێ‌ بو من رامانەك مەزن بو، هێشتا بیرێ‌ لوێ‌ كولیلكێ‌ دكەم. ئەز داخبارێ‌ موزیكە و سترانێن كەڤنم، براستی هێژ ئەز داخبارێ‌ وێ‌ موزیكا كلاسیكی مە كو جارنا دگەل دەنگێ‌ چیاییێ‌ محەمەد عارفێ‌ جزیری، دەردكەت و من هزر دكر، ئەو بتنێ‌ سترانبێژێ‌ ترومبێلا یە، ژبەر هندێ‌ ژی تا نوكە چەند ئەز ل ترومبێلەكێ‌ سیار دبم، ئەز خەریبیێن وی دەنگی دكەم. گەلەك تابلویێن ژڤی رەنگی دگەل من ماینە و هەمی یێن گەنجاتیا منن، هەكو من چاڤێ‌ خوە ل كچكان دگێرا و ژ قوتابخانا وێ‌ تا بەر دەروكێ‌ مالا وان، من پێنگاڤێن وێ‌ دهژمارتن، گەلەك جاران ژ شەرما دهلنگڤی و خو ژ هەڤالان ڤەدەر دكر، چەند خو گیرو كربا، من خوە ژێ‌ دویر تر دكر و من وێرەكیا بەرسینگا وێ‌ نە بو. بێی هزرێ‌ ل ئێك پەیڤا عاشقانە بكەم و دلێ‌ وێ‌ بخو راكێشم. نزانم بێ‌ ئومێدیە ئەز و قەلەمێ‌ خوە ل سەر رێكەفتین یان ژی  رەڤینە ژ دورهێلی یان ژی چ ژڤان هەمیان نینە و پێدڤی یە قەلەمێ‌ من دوبارە ژ حبری بهێتە داگرتن.

(3)
بو جارا سیێ‌ ئەز هەست دكەم، قەلەمێ‌ من نەشێت دگەل من بەردەوامیێ‌ بدەت و یێ‌ خوە ژ نڤیسینێن من، ڤەدهێلیت. براستی ئەڤی شیشێ‌ حبری، ئەز گەلەك وەستاندم، نزانم حبر یێ‌ ئێكسپایرە یان سەركێ‌ قەلەمی سەلخیە و ل نڤیسینێ‌ دهەزقیت. هەمی دبێژنە من تو مروڤەكێ‌ كلاسیكی، ژبەركو تو هێژ ب قەلەمێ‌ حبری دنڤیسی! براستی ژی من دڤێت بڤی قەلەمی هەمی تشتێن خوە یێن كلاسیك زیندی بكەم. دبیت كو هێژ ئەز خوە ب كەسەكێ‌ كلاسیك دزانم، هەكو ئەز یێ‌ گەنج حەژێكرن هەما هەر یا هوسا بو، چەند جارەكێ‌ بیرێن زاروكاتیا خوە دكەم، بیرێن سەیدایێ‌ عەدنان دكەم، براستی بو من گەلەك نەخوش بو، هەكو دهاتە گوهێن من، كو سەیدایێ‌ عەدنان یێ‌ بویە رێڤەبەر، چنكو دەست دگەل (منەزمێ‌) هەبو! براستی سەیدایێ‌ عەدنان گوتنەك كریە دگوهێ‌ من دا و هندی بیرییا وێ‌ بكەم، دچاڤێن من دا پتر مەزن دبیت، سەیدایێ‌ عەدنان دگوت: (لدەف موسلمانان هەكو زاروك هێژ ل سەر پێچولكێ‌، دگوهێن وی دا بانگ ددەن. دڤێت ئەم كورد دگوهێن زاروكێن خوە دا بانگ بدەین و بێژینێ‌، كوردستان یا پارچەكریە و دڤێت ئەم بو خەباتێ‌ بكەین)، چەندا جانە ماموستا ئەڤ گوتنە، براستی ئەز قەردارێ‌ گوتنا تەمە و ئەگەر تو ژ دەرڤەی كوردستانێ‌ زڤری و ئەز بوێ‌ زڤرینێ‌ ئاگەهـ بوم، ئەز دێ‌ هێم سوپاسیا تەكەم و بێژمە تە، ماموستا تە هەستا كوردینیێ‌ یا نیشا من دای، ئەگەر تو هاتبی و من چاڤ بتنە نە كەتبن ژی، ئەز تا هەبونا خوە، دێ‌ قەردارێ‌ گوتنا تە بم.

(4)
بو جارا چەندێ‌ من كاغەز كێشانە بەر قەلەمێ‌ خوە یێ‌ حبری و چەندین رێزك بو دەرسوكا شێخاتیێ‌  من رادەستی بەرپەرێن روژنامان كرینە، ژ درێژاهیا ناڤێ‌ من كو ژ نەهـ پیتان پێكدهێت، جارنا ئەز ب شێخ دهێمە گازیكرن، ناڤێن زەمەنێ‌ مە یێ‌ بچویكاتیێ‌ ژ ئەحمەد و محەمەدا دەستپێدكرن و نوكە هەمی یێن بوینە وارین و وارڤین و ئەڤرو ئەم خودان هەرێمین و خودان فیدرالیەت. خەلكی گوتنە من شێخ و هندەكان بكەنی ڤە دەستێ‌ من ماچ دكرن، براستی هەر كەسێ‌ بڤێت دی بیتە شێخ، نە كەس ب دەستێن مروڤی ڤە ماچی دكەت و نە كەس پشتیێن دارا بو مروڤی دئینیت و كەس ب سەرێ‌ مروڤی ژی سویند ناخوت! براستی ژیان هوسایە، بەری نوكە تشتێ‌ عەسل و نە عەسل تژی سەر رەفاتكێ‌ دكانا بو، شێخان قەدر و قیمەتێ‌ خو هەبو و خودان تبەركێن خو بون، نوكە تەقلیدێ‌ جهێ‌ هەمی تشتەكی یا گرتی، قاچكێ‌ دەڤێ‌ هەمیا نە، ژ كەرەما خودێ‌ تەقلیدخانێ‌ هەمی تشت یێ‌ ڤەگرتی، هەر ژ وان دەڤكێن بەری چەند روژان من بو تراشینا رهـێن خو كرین، تا دگەهیە ترومبێلێن شوفرلێت (ئەڤیو). ژ من حێبەتی نە بە ئەگەر بێژمە تە ئەڤرو مروڤ ژی تەقلیدن، دقوتابخانێ‌ ڤە و ل نەخوشخانێ‌ و دتەكسیێ‌ دا و ئەڤێن ل سەر كورسیێن لدوور خوە دزڤرن، هەما چنە! ڤێجا هەكە تە بڤێت ئەز ب ماركێتا فروتنا قەلەمێن حبری دكەڤم، بتنێ‌ تشتێ‌ مای نە تەقلید و بهایێ‌ وی وەك خو قەلەمێن حبری نە، ئەڤێن دبێژنێ‌ (قەلەمێن پندان).



ليست هناك تعليقات: