خاندنه‌ك بو ناخێ‌ شاعره‌كی (ده‌ما شعر دبیته‌ ئێخسیرێ‌ ده‌می) ده‌مژمێرا (ئه‌حمه‌د جاسم)ی وه‌ك نمونه‌

ئێك ژوان قه‌له‌مێن نوی و گه‌نج، كو ده‌مه‌كه‌ روژنامه‌ و كوڤارێن مه‌ ژ وی ناڤی دپرن، چ ب نڤیسینا شعرێ‌ بیت یان ژی بابه‌تێن روژنامه‌ڤانی و هنده‌ك جاران جڤاكی، ئه‌و ژی نڤیسه‌ر (ئه‌حمه‌د جاسم) ێ‌ گه‌نجه‌، ب وێنه‌ی گه‌نج و ب نڤیسینێن خوه‌ مه‌زن. ئه‌ڤه‌ پێناسا من بو، ژ بو نڤیسینێن وی و ئه‌و بابه‌تێن ل سه‌ر ناڤێ‌ وی دهێنه‌ بلاڤ كرن و دبنه‌ جهێ‌ سه‌رنجا من كو ئه‌ز ژ ناڤێ‌ وی نه‌بورم. ئه‌گه‌ر راستتر بێژم، ده‌مه‌كه‌ دهزرا مندا، ئه‌ز زێده‌تر خوه‌ دناڤ به‌رهه‌مه‌كێ‌ وی دا به‌رده‌مه‌ خارێ‌ و ژ نێزیك ئه‌ز بزانم، ئالاڤێن ڤی كه‌سی چنه‌ و لێكدانێن وی و خاندنێن وی بو ده‌وروبه‌رێن وی و ئه‌و چ خودیكه‌ ئه‌و پێ‌ سه‌حدكه‌ته‌ كومه‌لگه‌هی و ئایا ئه‌و تشتێ‌ دبیردانكا خوه‌ دا به‌رڤاژی دكه‌ت و ددانیته‌ سه‌ر به‌رپه‌ران و دبێژیت، ئه‌ڤه‌ نهێنیێن منن و كه‌ره‌مبكه‌ن، بخوینن! راست ژ ناخێ‌ وی ده‌ردكه‌ڤن؟ 

نڤیسین ب قەلەمێ‌ حبری

(1)

من دگەل قەلەمێ‌ خوە بریار دا، ئێدی ئەم بو هەوە نە نڤیسین! ئەم ب ئێش و ئازارێن خەلكی ڤە، ب كێشەیێن جڤاكی و ب كێشمەكێشێن سیاسی ڤە گەلەك وەستیاین. دڤێت سەحكەینە دنیایەك دی، نڤیسینێن مە دەربرینێ‌ ژ جیهانا مە بتنێ‌ بكەن. ئەم ژ دەنگێ‌ شرشرا ئاڤێ‌ و چپكێن بارانێ‌، خەریب بوینە! من جیهانەكا دی دڤێت تێدا گەنجاتیا خوە بزڤرینم، دەمی گەلەك تشت ژ مە دزینە و ئەم رەپ و رویت دناڤ جادەیێن دوو سایدی و سیهـ میتری دا هێلاینە، چاڤەرێی دەمژمێرێن كارەبێی نە و سرایێ‌ لبەر فرنێن سەمونان دگرین، دەستێ‌ مە یێ‌ ب بەریكا مە ڤە و دوو روژا، ئێك كیلویا فێقی دخوین و هەر سەری، ژ ئێك لب زێدەتر نەگەهیتێ‌.