عبدالرحمن بامه‌رنی
ئێك ژ برگێن ل دەستپێكا پرانیا هەلكەفت و ئاهەنگ و كونگران دهێتە پیشاندان، برگەكا هونەرییە و پرانییا جاران ژی تابلویەكێ هونەریێ سەمایێ دهێتە پیشاندان. ئەڤا من مەبەست پێ باژێرێ دهوكێ یە زێدەتر، كو ڤان تابلوییان تایبەتمەندیەكا خوە هەیە و پارێزگەها دهوكێ زێدەتر ژ پارێزگەهێن دیێن هەرێما كوردستانێ، چەندین نەتەوە و ئول كلتورێن جودا لێ دژین و پێكڤە ژیانا ڤان هەمی جوداهییان، تابلویەكێ خورستی پەیدا كریە و دا كو ئەڤ تابلویێ هەنێ ژ بلنداهییا خوە بكەڤیتە بەرچاڤێن خەلكی و كەتوارێ دروستێ پێكڤە ژیانا لڤێ پارێزگەهێ پیشان بدەت، دڤێت بەهرەمەندەك هەبیت و بزانیت، دێ چاوان گیانی بڤی تابلوی پەخشیت و پەخشیینا گیانی ژی، وەك هونەر و ئەدەب ئەز دبێژم، دڤێت هونەرمەند و ئەدیبێن هزر ڤەكری و بیر تیژ هەبن و خولقێنەرێ تشتێن نوی بن.
بڤی رەنگی من دڤێت بەحس ل تابلویێن سەمایێ، ئەڤێن ژلایێ هونەرمەند (ئەحمەد مشەختی)ڤە دهێنە دروستكرن بكەم. یا راستی بیت من ناڤێ مشەختی بەری دیتنا وی گوهلێ ببو و ئەڤە ژی ژ سەرسورمانییا من بوان تابلوییانڤە، ئەڤێن دڤان هەلكەفتاندا دهاتنە پیشاندان، كو یا راستی بیت نە بتنێ سەرنجا من رادكێشان، بەلكو ئەز ئێك ژوان هەمی بینەران بووم، ئەڤێن مە تەماشا دكر و ئەم ب لەیزتن و لڤینێن خوەڤە حێبەتی دكرین، ئەز ناڤەشێرم گەلەك جاران من دڤییا ژ نێزیك من ئەو كەسێ هەنێ ناسكربایە، بۆ من گرنگ نەبوو، ئەو چ كەس بیت و چ رەنگ بكەتە بەر خوە و ب چ دەڤوك باخڤیت، لێ یا گرنگ، ئەڤە ئێك ژ بەرهرەمەندێن باژێرێ منە و بۆ من خوشە ئەز هەمی وان كەسان ژ نێزیك ناس بكەم، یێن شوون تلێن خوە هەین، تا رۆژەكێ و د هەلكەفتەكا رۆژنامەڤانیدا، كو ئەڤێن پەرتووكێن رۆژنامەڤانی هەین، دوان رێ و رەسماندا پەرتووكێن خوە پیشانددان و بۆ ئامادەبوویان ئیمزا دكرن و ئەز ژی ئێك ژوان كەسان بووم یێن خودان پەرتووك، ئەحمەد مشەختی هاتە هنداڤ سەرێ من، دەما ئەز ل سەر مێزێ و ب كارێ ئیمزاكرنا پەرتووكێن خوەڤە مژوول و دەما بوویە دوورا وی، من گوتێ، ناڤێ تە دا ل سەر پەرتووكێ بنڤیسم و بۆ تە بكەمە دیاری، پرسا من ژ ناڤێ وی و دەما ناڤێ خوە گوتی، راستی من نەزانی دەستێ وی بگڤێشم ژبەر كارێن ویێن هونەری یان ژی بەردەوام بم ل سەر ئیمزاكرنا پەرتووكا خوە و ناڤێ وی ل سەر بنڤیسم. هەر چاوان بیت، وێنێ وی و دێمێ وی و كارێ ویێ دروستكرنا تابلوویان ژ سەرێ من نەهاتنە دەر و راستی ژی بیت، هەر چەندە ئەو ل سەر دەپێ شانوویێ نا دەركەڤیت ژی، لێ ئەو هژیانێ دئێخیتە هولێ هەمیێ و ئامادەبوویان بكارێن خوەڤە سەرسورمان دكەت، دووماهی كارێ وی ژی من دیتی، ل حەفتەمین فلمە فێستیڤالا دهوك یا نێڤ دەولەتی بوو و ئەڤ تابلویە ژی بەرهەمێ تیپا دهوكێ یا هونەرێ مللی بوو، كو تابلویێ پێكڤە ژیانێ بوو.
بوچی تابلوو
رەنگە گەلەك كەس هزر بكەن، ئەڤ تابلویێن هونەری و برگێن هونەری یێن د رێ و رەسمێن پرانییا ڤان بوناندا دهێنە گێران، بتنێ دەڤ شرین كرنەك بیت ژ بۆ چوونا ناڤا روودانەكێ، چ فلمە فێستیڤال بیت یان د هەر بوارەكێ دیدا بیت، كو پێش وەخت كار ژ بۆ هاتیە كرن و خەلك بۆ هاتیە داخوازكرن، بهزرا من ئەگەر وەسان ژی بیت، لێ دڤێت ئەم ل سەر وان برگەییان راوەستین و مافێ وانە ئەم دەستخوشیێ ژی لێبكەین، ژبەركو ئەو یێ نوونەراتییا ڤی باژێری بهەمی كەلتورێن خوە یێن جیاواز ڤەدكەن، ئەگەر برگەكا لاواز بهێتە پیشاندان و ئەو تابلویێ دهێتە نمایشكرن ل ئاستێ پێدڤی نەبیت، رەنگە هەر ل دەستپێكێ وێنەكێ نە دروست د چاڤێن ئامادەبوویاندا دروست بیت و تایبەت ژی، ئەگەر مێهڤان ژ پارێزگەهێن دی یان وەلاتین دی دوێ هەلكەفتێدا د ئامادە بن، بوویە ئەز ب شانازیڤە دبێژم، ئەم ل پارێزگەها دهوكێ شانازیێ ب كارێن (مشەختی) د بەین و هیڤیخوازین، ئەو دكارێ خوە دا داهێنانێن جوانتر بكەت و روویەكێ جوانتر بدەتە پارێزگەها مە.
*د رۆژناما ئەڤور ژمارە 2667 یا رۆژا 29/9/2019ێ دا بلاڤ بوویە.
%20copy.jpg)
ليست هناك تعليقات:
إرسال تعليق