عبدالرحمن بامەرنی
هەر كەسەكی تشتەك پێخوەشە و تشتێ زێدەتر من مژوول دكەت، داهێنانە و ئەڤ كەسێن حەز دكەن ژیانێ جوانتر لێبكەن یان تشتان جوان ببینن و كەسێن دەوروبەری خوە ژی، بەشداری وێ جوانیێ دكەن. ژبەركو ژی پرانیا دەمێ خوە ئەز بۆ خواندنێ تەرخان دكەم، چەند دەمژمێرێن من ل پشت لاپتوپی دچن و تشتێ لڤێ دووماهیێ سەرنجا من راكێشای، دو بەرێزن، دو هوزانڤانن و ئەو تشتێ ئەو دنڤیسین، نڤیسینێن تەر و نازك و خوەشن، هەر كەس حەز دكەت بخوینیت و ژ خواندنێ ژی زێدەتر، مەرەق دكەن تشتەكێ وان یێ دی بخوینن، تایبەت ئەڤێن بەشەك ژ ژیانا گوندا و ئاقاری دیتی و ئەڤێن حەز دكەن، دژیانا سادەییا كوردەواریدا شارەزا ببن.
یا راستی بیت، ل دەستپێكێ ئەز ژ خواندنا وان هوزانان ب گومان كەفتم، ئەگەر من سەیدایێ (خورشید) ژ نزیك ناس نەكربایە! رەنگە گومان لدەف من دروستبایە، برەنگەكی یان ئەڤ كچا بناڤێ (سوزان) ژ خەیالا وی بخوە یە و یان ژی، ب راستی خورشید یێ عاشق بووی و عاشقبوونا قوناغا دویێ و رەنگە قوناغا سیێ بیت، ئەگەر ئەم پشتی تەمەنێ چل سالیێ، ب قوناغا دویێ یا عاشق بوونێ لدەف گشت زەلامان دانین، هەر چاوا بیت، نڤیسین و داهێنان تەمەنی ناس ناكەن، تشتێ جوان و نڤیسینێن جوان هەر د جوانن، خوە ل كیرێ بن و كی وان بنڤیسیت.
تشتێ ئەز پالدایمە ڤێ نڤیسینێ ژی، ئێك: مافێ هەر كەسی هەیە، دەما ئەو تشتەكێ جوان بنڤیسیت و بلاڤ بكەت، هندەك هەبن رەخنێ لێبگرن و جوانییا وی سەراڤ بكەن و ئەگەر كێماسی ژی هەبن، بۆ راستڤەكەن، ئاخر هەر هوسایە ژی، ئەگەر مە بڤێت ئەم بەهرەمەندان دروست بكەین، دڤێت رێ ل بەر وان ڤەوژێرین. دو: ژبەركو ئەو هوزانێن خوە ل تورێن كومەلایەتی بلاڤ دكەن، ژ ئەڤا ل سەری من ئاماژە بۆ دای، كومێنت بۆ دهێنە نڤیسین و باوەردكەم تێبینی ژی بۆ دچن، لێ من دڤێت بدیتنەكا ئەدەبی یا سەرپێ ئاڤریەكێ لێبدەم, ئاخر ژی دڤێت كەسەك هەبیت هەلسەنگاندنا وان بەرهەمان بكەت، یێن دهێنە بلاڤكرن و دكەڤنە بەرچاڤێن خەلكی.
هوزانا مللی
هوزانا مللی بكورتی ئەو رەنگێ هوزانێ یە، كو پەیڤ و ناڤەرۆكا وێ دەربرینێ ژ وی كومەلگەهی دكەت، ئەڤێن هوزانڤان دناڤدا دژین و شێوێ لێكئینانا ڤان هوزانان ژی، ئەو پەیڤن یێن نزیكی شێوەزارێ ویێ ئاخفتنێ و پرانییا جاران ژی، وان بابەتان د ئازرینن، یێن د چوارچوڤێ ئاینی یان وەسفی و سروشتیدا و د هوزانێن (خورشید و سوزانێ)دا، چوارچوڤێ عەشق و ئەڤینێ بخوەڤە دگرن و هەر چەندە ئەگەر فورمەكێ هوزانا مللی بخوەڤە بگرن ژی، لێ زێدەتر بەرەڤ حەیرانوكان ڤەدچن.
حەیرانوك
فكلورێ كوردی ب چیرۆك و چیڤانوك و ستران و گوتن و پایزوك و حەیرانوكێن خوە یا زەنگیە و ئەگەر ل شێوازێ نڤیسینا ڤان هوزانان ژی بنێرین، دێ بینین كو ڤان هەردو هوزانڤانان مفا ژ شێوازێ حەیرانوكان وەرگرتینە و هەر چەندە د حەیرانوكاندا، خودانێ وێ یێ دیار نینە و دیسان گەلەك جاران مرۆڤ نەشێت بزانیت كا ل سەر زارێ كچێ یان كوری هاتینە نڤیسین، لێ دڤان هوزاناندا، هەر دو رەگەز ددیارن و هەر چەندە ئەگەر دووراتی ژی دناڤبەرا واندا هەبیت.
ئەدەبێ فەیس بوكی
ئایا ئەم دشێین چ ناڤ ل سەر ڤان هوزانان بدانین؟ ئەگەر ئەم ڤێ بكەینە پرسیار و تایبەت ژی، ئەو كەسێن دووڤچونا تورێن كومەلایەتی دكەن، دێ زانن، كو زێدەتر تورەكە بۆ گەهاندن و لێكنزیكرنا خەلكی پێكڤە و دروستكرنا پەیوەندیان دناڤبەرا واندا، بوویە خەلكی گەلەك رێكار گرتینە بەر، كو زێدەتر كونتاكێ دگەل وان كەسان بكەن، یێن ئەو ژ خوە و هزرێن خوە نزیك دبینن و دێ بینی، گروپێن ئەدەبی هەنە و یێن هونەری و یێن كومەلگەهێ مەدەنی و رۆژنامەڤانی و تا یێن سیاسی و یێن عەشیری ژی. ئەڤە ژبلی ئەڤ كەسێن هەولددەن، داهێنانێن خوە ل سەر بلاڤ بكەن و كو پرانییا ئەڤێن سەرەدانا ڤان تورێن كومەلایەتی دكەن، حەز دكەن تشتێن نوی و سەرنج راكێش بخوینن و ئەڤ جورێ هوزانێ ژی، بزاڤێن تاكە كەسینە ژ پێخەمەت بلاڤكرنا داهێنانێن خوە، یان كو مینبەرەكە بۆ دیاركرنا ئەو تشتێ مرۆڤ حەزدكەت، خەلكێن دی ژی بەشداری شیانێن خوە بكەت، چ یێن هزری بن و چ یێن بیرو باوەر و چ دەنگ و باسان ژی، كو تورێن كومەلایەتی دشێت راییا گشتی دروست بكەت. بوویە بهزرا من ئەم زێدەتر دشێین ڤان جورە هوزانان ب ئەدەبێ فەیسبوكی دانین. نمونەكا ئێك ژ هوزانێن (خورشید ئەحمەد) و (سوزان عەبدولهادی).
( باخچەڤان )
خورشید :
نـاڤـێ تـە هــنارە یـا تــرش و مـزی
مــن تـو دیـتی و تـە دلـێ مـن دزی
قێرین د سینگیدا بو نە هزار خوزی
خـوزی رادهـێلان دل بــۆ تە دەرزی
هەوار ژ هنارا مسافكێ یا گەهشتی
سوزان:
بــاخچـەڤـانـو تـو وەرە خــو كـاركە
بچـنە سێڤێت سیـنگی و جان باركە
د سورو زەرن سێڤ نێ كانی ساركە
حەشتەدكەم ڤیانا خو بۆ من دیاركە
هــەر وەكی تـە چـێدكـرن نڤــشـتی
خورشید :
نــاڤــێ تــە بــیهـا زەرە لـۆـپـائـیــزێ
خو كەهی و بستەكە هەی عەزیزێ
دلــێ مــن كـەتـە بـەر خـیزە خیزێ
خـو نێزیك كـە هـەی كـاكلكا گـیزێ
چـەلەنگێ تو یا خـشكوكو خـشتی
سوزان:
چــاڤـێن مـن حـلیكا رەشــو ئالە
گــەردەنــا مـن كـانــیەكــا زەلالە
ئەزمان گـرتـیە و بــو تە یـێ لالە
وەرە خـێـفەكـە بــو تــە حـەلالـە
نێ ئەزم یا تە ب ئەڤینێ كوشتی
خورشید :
بــەژنـا تـە یـە هـەمـی فـێقی پێڤە
ریكێت تە سورن رەنگێ وان سێڤە
سـینگێ تـە هـرمیـنە دایـنە بـكێـڤە
پلوخن لبەر دەستی لێ بكەم خێڤە
بەرهەمێ باغـێ مـن یـێ گـەهشتی
سوزان :
بــاخـچــەڤـانـی باغ یێ پێدڤییە
جان چاڤدا نـێ ب ئومێدو هیڤییە
دەریـایـەكـە ژ ڤــیانـێ تـــژیــیە
مــالداری لگەلـتە یــا ژ هـەژییە
تو دنیایی تو بۆ من بەهەشــتی
د رۆژناما ئه‌ڤرو ژماره (2656) یا رۆژا 12/9/2019 دا بلاڤ بوویه
%20copy.jpg)
ليست هناك تعليقات:
إرسال تعليق