عبدالرحمن بامەرنی
ئەگەر ھەمی تشتەكی بازارێ خوە یێ كرین و فرۆشتنێ ھەبیت و ھەر تشتەكی ژی بەھایێ خوە یێ تایبەت ھەبیت، ئەڤ بھایێ ھەنێ ژی لدویڤ مفایێ وێ، جوانیا وێ، دەگمەنیا وێ و رەسانەتیا وێ بیت، ئەرێ مە جارەكێ پرسیار ژخوە كریە كانێ بەھایێ ژن و زەلامان دناڤ كومەلگەھیدا چەندە؟ ب پشت بەستنێ ل سەر ھندەك مالپەران و ئەڤا د چاندكێ مەدا ھەی، دێ ھندەك ژوان بەھایان رێزكەین.
ھەر كومەلگەھەكی دابونەریتێن خوە یێن كومەلایەتی ھەنە و دێ بەحسا ھندەك راستیێن كومەلگەھێ خوە یێ كوردی كەین و دێ بینین كو دیتنا كومەلگەھی بۆ زەلامی نە ھەمان ئەو دیتنن یێن بۆ ژنان ھەین، ئەڤ دیتنێن ئەز ژێ بەحسدكەم ژی، بەھایێ بازاری نینە وەك كرین و فرۆشتن، لێ ھەر تشتەكێ دڤێ جیھانێ دا ھەی بەھایێ خوە ھەیە و دا ل ژن و زەلامان بنێرین: سێ ساخلەت بەھایێ زەلامی دناڤ كومەلگەھیدا دئینە پێش، ئەو ژی ھەر ئێك ژ (مالداری، پلەداری، ناڤداری) و سێ ساخلەت بەھایێ ژنان بەرچاڤ دكەن، ئەو ژی (تەمەن، جوانی، رەوشت) و داخازی وی دەمی ل سەر زەلامی ھەیە، دەما ئایندە ھەبیت و زەلامی باوەری بخوە ھەبیت و ھەست ب بەرپرساتیێ دكەت و داخازی وی دەمی ل سەر ژنان ھەیە، دەما رابردوو نەبیت و پرانیا ژنان شانازیێ ب ھەییا زەلامێ خوە دبەن و ناڤداری و ناڤودەنگیا وی و دگەل ڤێ وەك بەراوردی، كێم ژن ھەنە شانازیێ ب رەوشتێ زەلامێ خوە ببەت و زەلامێ خودان كەساتیەكا لاواز، ژنێن تبعەت زەلام دروست دكەن و زەلامێن ب ھێز، خانمێن بەرمالا دروست دكەن و ژن ل بەرامبەر زەلامەكێ خودان كەساتیەكا بھێز و ژ خوە رازی، نەرم دبیت و بۆ زەلامێ خوە دبیتە پشتەڤان و تەمامكەرا وی و ل بەرامبەر زەلامەكێ باوەری بخوەنە و خودان كەساتیەكا لاواز بەرەللا دبیت و باوەری بخوە نامینیت و ژڤان بەراوردیێن ل سەری من ئاماژە بۆ دایین، مەرج نینە ئەز و تو سەدا سەد دگەلدا بین و بەھایێ ژن و زەلامان ئەڤە بن، لێ ل دووماھیێ بازار ھەر بازارە و كوردان ل دوور بازارێ ژن و زەلامان ژ مێژە گوتنەك ھەیە دبێژیت: "ژنا شەرمین ب شارەكێ و زەلامێ شەرمین ب كارەكێ" و دیسان كوردان بۆ پێكڤەمانا ژن و زەلامان گوتیە: "ژن بێ زەلام ھار دبیت و زەلام بێ ژن ژار دبیت" و ئەڤە ژی باشترین بەرسڤە، ئەگەر چ ژن بیت یان زەلام و حەز بكەن بەھایێ خوە دناڤ جڤاكیدا بلند رابگرن و پێكڤە بژین.
ــــــــــــــــــــ
رۆژناما ئەڤرو یا رۆژا 7/5/2024 ژمارە (3518).
ليست هناك تعليقات:
إرسال تعليق