د رووشنتەكا من و چەند ھەڤالاندا، پوستەكێ ئەنترنێتێ بۆ بابەتێ دانوستاندنا مە و ئەو پوست بڤی رەنگی بوو: "ھەر زەلامەكێ ل جیھانێ ژنەك ژبۆ ھاتیە ئافراندن و ئەو ژن دبیتە نیڤا زەلامی یا نە تەمامكری و ھەر ژنەكێ ژی زەلامەك بۆ ھاتیە ئافراندن و ئەو زەلام دبیتە نیڤا ژنێ یا نە تەمامكری". ھەر چەندە مەھەمیان ئەڤ بابەتە پەسەندكر، لێ مە ئێخستە بەر پرسیارێ ژی، ئەگەر ھەر ئێك ژمە نیڤەكا دی ھەبیت، ئایا ئەڤێن ژنا دوویێ دئینن، ژبەركو وان نیڤا خوە یا دروست نەدیتییە؟ ئایا ئەڤ ژن و زەلامێن بەردەوام كێشە دناڤدا دروست دبن، ئایا ئەو نە تەمامكەرێن ئێكن؟ ئایا ئەو كور یان ئەو كچێن بەردەوام خەونا ب كور و كچێن دی ڤە دبینن و چ ئەكتەرێن سینەمێ بن یان ژی ھونەرمەند، ئایا ئەو نیڤا خوە یا بەرزە د وێنێ وان رادبینن؟ مە گەلەك ژڤان پەرسیاران ل سەر مێزێ دانان و ب دیتنێن جودا مە خوە د سەر بابەتی را گاڤدا، لێ بابەتی لدەف من بخوە گرنگیا خوە ھەبوو و ئەگەر چەند رێزەكا ل سەر بەحس بكەم:
دەما ئەم بەحسا نیڤا خوە یا دوویێ دكەین، ئەم ل زێدەترین خالێن ھەڤبەش دگەرین و رەنگە دەما بەحسا جوداھیا رەگەزی ھاتیەكرنێ، ژبەركو زێدەترین پەیوەندییا دناڤبەرا مرۆڤاندا دناڤبەرا ھەڤژیناندا دھێتە دیتنێ و ژڤی روانگەی دێ ھندەك ھەڤژینان بینی سەركەفتینە و ھندەكێن دی بەردەوام ب سەروستویێن ئێكڤەنە، ھەڤدژیێن وان زێدەترن ژ لێكتێگەھشتنێن وان، ئەڤە ژبلێ ئەگەر رێژا جودابوونێ وەربگرین و لڤێرە پرسیار دمینیت، ئایا ژبەركو ھەر ئێكی نیڤا دی یا خوە ھەیە؟ ب ھزرا من نەخێر، ژبەركو مرۆڤ بخوە دشێت ڤێ نیڤێ دروست بكەت و ئەو ژی ب چەند رێكان، ئێكەم، بەری پێنگاڤا ھەڤژینیێ مرۆڤ ل ھندەك خالێن ھەڤبەش بگەریت و ھندی ئەو خالێن ھەنێ زێدەتر بن، رێژا سەركەفتنێ زێدەترە و یا من دڤێت ل سەر راوەستم ئەڤە بتنێ نینە، ژبەركو ئەو نیڤا ئەز ژێ دبێژم مرۆڤ دروستكەرێ وێیە و چاوان باخچەی پێدڤی ئاڤدانێ و چاڤدێریێ ھەیە، ئھا ھوسان مرۆڤ دشێت پەیوەندیا خوە دگەل رەگەزێ دی، مرۆڤ دشێت سەركەفتنێ بێخیتێ و نھێنییا ڤێ چەندێ ژی مرۆڤ یێ گەشبین بیت و لدویڤ یاسایا ھێزا راكێشنانێ، ھێزا گەشبینیێ گەلەك بھێزترە ژ یا رەشنبینیێ و بتنێ ل سەر ھەر ئێكی پێدڤییە ل خالێن باش بگەریت ل گەل نیڤا خوە یا دوویێ كو ھەڤژینە مەبەستا من.
ـــــــــــــــــــ
رۆژناما ئەڤرو: ژمارە 3550 یا رۆژا 28/5/2024
ليست هناك تعليقات:
إرسال تعليق