عبدالرحمن بامەرنی
ئه‌رێ راسته په‌روه‌رده‌كرنا زارۆكی هونه‌ر بۆ دڤێت یان د شیانێن هه‌ر كه‌سه‌كیدایه، كو دێ شێت زارۆكی ب خودان كه‌ت؟ ئه‌ڤ پرسیاره گه‌له‌ك جارا دهێته‌كرنێ و هنده‌ك دبێژن ئه‌گه‌ر خێزانێ زارۆك كێم هه‌بن، دێ باشتر هێنه ب خودانكرن و لێ خێزان یێن هه‌ین زارۆكێن وان د كێمن، ئێك یان دوو بتنێ نه و كه‌سێن زیره‌ك ژێ دروست نه‌بووینه و خێزانێن هه‌ین هه‌شت زارۆك و زێده‌تر ژی یێن هه‌ین، لێ ده‌ما ئه‌ڤ زارۆكه مه‌زن ژی بووین شیاینه پشتبه‌ستنێ ل سه‌ر خوه بكه‌ن و لڤێره دیاردبیت، كو به‌لێ ب خودانكرنا زارۆكی هونه‌ر بۆ دڤێت و ره‌نگه ده‌یك و باب دبنه ئه‌گه‌ر كو ئه‌ڤ زارۆكه كه‌سه‌كێ خودان شیان بیت و ره‌نگه ژی داهێنانێ لده‌ف وی ب كوژن و ئێدی ڤی زارۆكی باوه‌ری بخوه نه‌بیت.
به‌را چه‌نده‌كێ بوو من پارچه ڤیدیۆیه‌ك دیت، زارۆكه‌كی یاریكا خوه كو ترۆمبێله‌كا بچویك بوو و تایره‌كا وێ ژێڤه‌ببوو، بره ده‌ف بابێ خوه كو ل سه‌ر كورسیكه‌كێ یێ روونشتی بوو، گوته بابێ خوه باب تایرا ترۆمبێلكا من یا ژێڤه‌بووی بۆ من چێكه؟ لێ ژبه‌ركو باب یێ مژوولی خواندنا رۆژناما خوه‌بوو، هه‌ر وه‌ك دیار ژی ژ ئه‌وا ژناڤمالیێ د وێ پارچه ڤیدیۆیێ دا ده‌ركه‌فتی خێزانه‌كا ده‌وله‌مه‌ندبوو، ئینا بابێ وی ترۆمبێله‌ك ژ ده‌ستێ زارۆكێ خوه ئیناده‌رێ و هاڤێته د سه‌لكا گلێشیدا و گوته كورێ خوه، ئه‌ڤ یاریكه چێنابیت و یا شكه‌ستی، ده‌ما دچمه بازاری دێ بۆ ته ئێكا باشتر كرم. لێ زارۆك چوو ترۆمبێلكا خوه ژ سه‌لكا گلشی ئیناده‌رێ ڤه و دانا عه‌ردی و تایرا وێ راكر و دانا سه‌ر ئاسنكێ كو تایره دكه‌ڤیتێ و ل سه‌ر شداند و تایرا ترۆمبێلكا وی چوو جهێ خوه و گوته بابێ خوه، ئها ئه‌ڤه ترۆمبێلكا من دروست بوو و قه‌ستا یاریكرنا خوه كره‌ڤه. ژ ڤێ پارچه ڤیدیۆیێ هه‌ر كه‌سه‌كێ بینته به‌رچاڤێن خوه، مرۆڤ دشێت ڤان ده‌رئه‌نجامان ژێ بینته ده‌رێ ئه‌وژی:
ـ زارۆكی دڤیا سه‌رنجا بابێ خوه رابكێشیت، كو به‌لێ ئه‌ز یێ دمالێدا و هنده‌ك ده‌مێ خوه بده من خوه ئه‌گه‌ر یاریكا ژی دگه‌ل من نه‌كه‌ی، لێ ب ره‌نگه‌كی و دوویان هه‌ست بمن بكه و د به‌رامبه‌ردا، بێ ڤی زارۆكی نه بتنێ ده‌مێ خوه نه‌ددا زارۆكێن خوه، به‌لكو ده‌ما ئه‌ڤ ده‌ستپێشخه‌ریه ژلایێ زارۆكێ ویڤه بۆ هاتی، ئه‌وی ب گرنگی نه‌زانی و هزرا هه‌می ل ده‌رڤه‌ی مالێ و خێزانێ یه و خێزان ل ده‌ف وی تشته‌كی لاوه‌كییه.
ـ ده‌ما بابێ گۆتییه زارۆكی كو ئه‌ڤ ترومبێلكه ئێدی شكه‌ست و ب كێر یاریكرنێ ناهێت و دێ بۆ ته ئێكا نوی كرم، هه‌ر وه‌كو بیرۆكه‌یه‌ك د مێشكێ ویدا دروست كری كو به‌رده‌وام پاره‌ی ب مه‌زێخیت و ژلایه‌كێ دیڤه ته‌مبه‌لیێ لده‌ف دروست بكه‌ت و به‌هره‌مه‌ندیێ ل ده‌ڤ دكوژیت.
ـ ده‌ما زارۆكی گۆتیه بابێ خوه دێ ترۆمبێلكێ دانیه عه‌ردی و دێ تایركا وێ ئێخینه سه‌ر ڤی ئاسنكی و دێ دروست بیت، ئه‌وی شییا وانه‌كێ بده‌ته بابێ خوه و هه‌ر كه‌سێ وێ پارچه ڤیدیۆیێ دبینیت، كو ئه‌ڤا ته كری به‌روڤاژیا وێ دروسته و نابیت هه‌ر تشتێ كێماسیه‌ك گه‌هشتێ مرۆڤ ژكاربێخیت.
--------------
رۆژناما ئەڤرو (3511) 23/4/2024
ليست هناك تعليقات:
إرسال تعليق