(رەش و سپی)ێن مە..!

عبدالرحمن بامەرنی

دان و ستاندنا من و وی د ترومبێلێ دا دەما مە قەستا مال دكر، بوچی ل تاخێ مە خودانێن دكانان گازندان دكەن و دبێژن، خەلكێ تاخی تشتان ژ دەف مە ناكرن و بۆ تشتێن بچووك ژی قەستا بازاری دكەن، رەنگە بھایێن كرینێ ژی وەك یێن مەبن و ئەگەر ھندەك جاران زێدەتر نەبن! بەری بەرەڤ مالێن خوە ژی بھێین، برایێ من یێ شوفێر ترومبێلا خوە ل بەر سینگێ فرنەكا نانی راوەستاند و ھەر ئێك ژمە لدویڤ پێدڤییا مالێ، نان ژ وێ فرنێ كری..

... ئێ باشە برا ئەڤە بێھنەكە ئەم ھەمان گازندە دكەین، ئەرێ بوچی ئەم قەستا فرنا ل نزیك مالێ ناكەین و نانێ خوە ژ وێرێ بكرین، مانە دڤێت ئەز و تو ژ خوە دەست پێبكەین..؟!

ئەم ھەمی دفێرین گازندان دكەین، ئەم گازندا ژ نەبوونا پەرتووكا باش دكەین و گازندێ ژ نەبوونا سترانبێژێ باش دكەین و گازندێ ژ جوتیاری و بەرھەمێ وی یێ بێ سەروبەر دكەین و وووو لیستا گازندێن مە گەلەك یا درێژە.

... ئەرێ مە جارەكێ پرسیار ژخوە كریە، ئەگەر ئەم پەرتووكێ بكرین و بینینە مال، دێ ھەم مفای ژ خواندنا وێ پەرتووكێ وەرگرین و دێ بۆ نڤیسەری بخوە ژی بیتە داھاتەك و دێ تشتەكێ جوانتر نڤیسیت! ئەرێ مە ھزر كریە شوونا ئەم گوھێ خوە بدەینە سترانبێژەكێ بیانی، گوھداریا سترانبێژەكێ خوە بكەین و كێرڤێ بینەریا وی ل یوتیوبی بلند بكەین بۆ ببیتە داھاتەك، كو ئەو تشتەكێ جوانتر پێش كێشی مە بكەت! ئەرێ دەما ئەم دچینە دكانەكێ و شوونا كیلویەكا موزا بكرین، كو بھایێ وێ دێ بۆ دەرڤەی وەلاتی چیت یان كیلویەكا سێڤێن ئیرانی.... ھندەك فێقیێ خومالی شوونا وان بكرین و ھینگێ جوتیار دێ زێدەتر خوە ب بەرھەمێ خوەڤە ماندی كەت.

گرانبوون و ئەرزانبوونا بھایێ لترا پانزینێ، بۆ مە ھەمیان گرنگە، چ یێن ترومبێل ھەین و یێن بێ ترومبێل ژی، ژبەركو ئەم ھەمی پێدڤی سیاربوونا وێینە، ئەم ھەردەم ژی گازندان ژ گرانییا بھای دكەن و جوداھییا بھایێ ئێك لیتر ژ پانزینخانەكێ بۆ ئێكا دی و ئەم دبێژین، بوچی چاڤدێری ل سەر ڤان بھایان نینە؟

... ئەرێ ما ئەم نەشێین وان پانزینخانان سزا بدەین، ئەڤێن بھایێ لیترێ گران دفروشن و ئەوێن ئەزرانتر خوە (50) دینار بتنێ ژی بن بۆ ئێك لیتر پاداشت بكەین، ئەو ژی ئەم قەستا وێ پانزینخانێ بكەین، ئەڤا بھایێ خوە ئەرزانتر دفروشیت! بوچی ئەم ڤێناكەینە كەلتور، ئەگەر (5) كیلومەتران ژی زێدەتر ترومبێلێن خوە لدویڤ بھایێ ئەرزانتر بگەرین، بخوە دێ ھەڤركی ل سەر دابەزاندنا بھایان دروست بیت.

دڤێت فێر بین، ئەم بەشەكین ژ راستڤەكرنان و دڤێت بۆ ئێكەم جار ژخوە دەست پێبكەین..

ــــــــــــــــــــــــــــــــــــــــــــــــــــــــــــــــــــ

ـ https://www.facebook.com/photo?fbid=10215176033594519&set=g.209899095715001

ـ http://www.rwangauraxna.com/ba/detail.aspx?IDNews=3420