فەرھاد پیربال و سیاسەتا كویلەكرنێ

عبدالرحمن بامەرنی

پوستێ دكتور فەرھاد پیربالی گومەك شلقاند، دەما گوتی ئێدی ئەز بۆ ھیچ دەزگایەكێ راگەھاندنێ نائاخڤم، ئەگەر پارەی بەرامبەر نەدەنە من و تا كوژمێ پارەی ژی دەست نیشانكریە بۆ دەمێ ھەر چاڤپێكەفتنەكێ و راستە ژی بەریا وی ژی ژلایێ گەلەك رەوشەنبیرانڤە ئەڤ گومە ھاتیە شلقاندن، لێ چییان ژێ، وەك وی شلق بڤێ ئاڤا پەنگیایی نە ئێخستینە.

ل ئێك ژ كەنالێن عەسمانی یێن كوردی، بۆ 15 خولەكان ل سەر بابەتەكی ئەز مێھڤانكرم، بەرنامە راستەوخو بوو و من ژێ داخوازكر وێ چاڤپێكەفتنێ بۆ من بكەتە د(CD)ەكیدا، ژبەركو من مالپەرێ خوە یێ تایبەت ھەیە كو ئەز بەرھەمێ خوە ھەمیێ ئەرشیف دكەم، دگەل لێبورینێ گوت، بەخشێ كەنالێ مە یێ لاوازە و ھەكە ئەز شیایم باشە! من گوتێ باشە تو دێ چاوان جارەكا دی من رازی كەی ئەز بھێم دوبارە بەشدارببم، ددەمەكیدا، دڤێت جلكەكێ جوان بكەمە بەرخوە و یێ ئوتیكری و پرچا من یا شەكری و كاروكوكێ من یێ جوان بیت، خوشبەختانە من ترومبێل یا ھەی و ھەكە من نەبا دڤیابا ب تەكسیەكێ ھاتبامە و دا پارێ وێ ژی ژ بەریكا من بیت و ئەڤە ژبلی ئەو بابەتێ ئەز ل سەر دھێم مێھڤانكرن، ھەر چنەبیت دڤێت دەمژمێرەكی پێداچوونێ ل سەر بكەم و رەنگە دێ چایەكێ دەیە من یان ژی نە؟!!

مەبەستا من ب ئینانا ڤێ نمونێ و پوستێ دكتور فەرھاد پیربالی ئەوە، پشتەڤانیا رەوشەنبیری نینە، رەوشەنبیر وەكی سیاستەتڤانی نینە، سیاسەتڤان برێكا دیدارێ دێ دەنگان بۆ خوە خرڤەكەت و دەستكەفتان بدەستڤە ئینیت یان دیدارەكا دەزگایەكێ خزمەتگوزاری ژی جودایە ژ یا رەوشەنبیری و ئەو دێ دبیاڤێ كارێ خوە فەرمی دا كاروچالاكیێن خوە بەرچاڤ كەت و ل سەر ئاخڤیت، لێ رەوشەنبیر جوداترە، ئەو دشێت ل سەر مەژیێ تاكی كار بكەت و ل سەر ھشیارییا كومەلگەھی كار بكەت و ئەگەر دڤان (30) سالێن بوریدا بەرێخوە بدەینێ، تاكە سكتەرێ ل ھەرێما كوردستانێ ئەم پێدڤی دبینێ كو تاكی بگوھوریت و ئاڤا بكەت رەوشەنبیرە و تاكە سكتەرێ ھەرێما كوردستانێ پیتە پێنەدای، دیسان رەوشەنبیریە و ئەڤە ژی پسیارەكا دناڤبەرا دوو كەڤاناندا دروست دكەت، ئەو ژی (یان سەركردایەتیا مە دڤێت خەلك كویلە بمینیت یان ژی بەھایێ رەوشەنبیریێ لڤێ ھەرێمێ ناھێتە زانین؟!!!).

ــــــــــــــــــــــــــــــــــــــــــــــــــــــــــــــــــــــــــــــــــــــــــ

ـ https://www.facebook.com/photo?fbid=10215190755882567&set=g.209899095715001

ـ http://www.rwangauraxna.com/ba/detail.aspx?IDNews=3432