سەروكان خەبەر رێژ نەكەن

عبدالرحمن بامەرنی

ئەزمان رەش، خەبەر بێژ، قەسەكرێت یان جنێودان، بتنێ چەكێ كەسێن لاوازە و د زارۆكینیێ دا ئەڤ كەسێن ئەزمان رەش و خەبەر دگوتن، دا پشتا خوە دەینێ و سزایێ وی، دا ڤێ گوتنا كوردەواری بێژینێ: (خەبەر دچنە عەسمانا و دھێنە كوشێن خودانا)، ئەڤ گوتنە ژی تێرا وێ چەندێ ھەبوو، كو سەرێ خوە ب چەمینیت و دەستان ژ ئەزمان رەشییا خوە بەردەت.

كەلتورێ سڤكاتیپێكرنێ دناڤ مە كوردان دا، كەلتورەكێ نەیێ نوویە و ژ دەرئەنجامێ وان ھەمی سڤكاتی و بێ رێزی و زوری و دەست درێژیێن ژلایێ داگیركەرێن مەڤە ھاتیە دناڤ مەدا و مەبەستا نەیارێن مە ژی ب ئینان و سەپاندنا ڤی كەلتوری، ئەم تەقەبوللا ئێك نەكەین، جار ب بەھانا عەشیرێ و دەڤەرێ و بیروباوەرێن ئاینی و نەتەوەی و نوكە ژی ل سەر لایەنگیرییا تاكی و پابەندبوونا وی ب حزبێ و لایەنێ ویێ سیاسیڤە راوەستیایە.

ژ سەرھلدانێ وەرە حزبێن مە ئەڤ كەلتورە ھندێ دناڤ مەدا بلاڤ كری، ئێدێ مە چ پێدڤی ب دوژمنان نینە مە ل بەر ئێك رەش بكەن و ل كەسێ ژی یا ڤەشارتی نینە، ھەر كەسێ بڤێت، لێگەریانەكا كورت دناڤ سوشیال میدیایێ دا بكەت، بەسە دا بزانیت ئەم چەند رێزێ ل سەركردە و سەروكێن خوە دگرین! پێدڤی ناكەت كەس مە ب خاین و ئاخ فروش و چەتە بزانیت، ئێك حزبا كوردی نەمایە، ئێك سەروك و سەركردە نەمایە، ئەگەر مە خالەكا رەش ل سەر نەگرتبیت و بھەلكەفت و بێ ھەلكەفت، ئەم خەباتا وێ حزبێ و شەھیدێن وێ حزبێ و خوین رێتنا وێ حزبێ و سەروك و سەركردێن وێ نە ئێخینە بەر ئەزمان رەشییا خوە و بن پێنەكەین.

بتنێ وەك بیرئانین، ژبیرنەكە ئەو سڤكاتی و زمان رەشییا تو بەرامبەر سەروكێ یان سەركردەكێ حزبەكا دی دكەی، تو یێ سەروكێ حزبا خوە یان سەركردەكێ حزبا خوە دئینیە سەرێ كولانێ و تو یێ رەواتیێ ددەیە لایەنێ دی، ئەو ژی ھەر چ تشتێ كرێتە بەرامبەر سەروكێ حزبا تە و سەركردێ حزبا تە بێژن و دا ڤێ ژی ل سەر نڤیسینا خوە زێدەكەم، ئەگەر ل سەرێ جاددێ یان كولانێ خەبەرێن كرێت بێژیە زارۆكەكی، بلا ئەو چەند یێ بچویك بیت، پشت راستبە ئەو ژتە نا ترسیت و دێ خوە ژ تە دویركەت و ئەو ژی دێ خەبەرێن كرێتتر بێژیتە تە.

ھیڤیدارم كەلتورێ ئەزمان رەشیێ نەمینیت و ئەم رێزێ ل سەروك و سەركردێن دی بگرین، ئەم رێزێ ل سەروك و سەركردێن خوە بگرین و ژ قەسە و ئەزمان رەشیێ دوور بگرین، ئەزمان رەشی و رەخنە گرتن دوو تشتێن ھەڤدژن و بلا ئەم حەژ وان و خەباتا وان بكەین و رەخنە ژی بكەین، لێ ب ئەزمان رەشیێ، ئەم سەروكێن خوە كێم دكەین....!

ــــــــــــــــــــــــــــــــــــــــــــــــــــــــــــــــــــــــــــــــــــــــــ

ـ https://www.facebook.com/photo?fbid=10215212876475568&set=g.209899095715001

ـ http://www.rwangauraxna.com/ba/detail.aspx?IDNews=3461