عبدالرحمن بامەرنی
هەر تشتێ رووبدەت و بەشەكێ هاولاتییان بخوڤە مژوول بكەت، دڤێت مرۆڤ ژ چەند روویەكانڤە خواندنێ بدەتێ، ئایا روودانا هەنێ چ دەرهاڤێژێن خوە یێن باش و خراب هەنە؟ ئایا بەردەوامیدان پێ، دێ چ كاریگەریا خوە هەبیت و دێ چ تشتی زێدەكەت و د بەرامبەردا ئەگەر بەردەوام بوو، دێ كاریگەریێن وێ یێن خراب ب چ شێوە بن؟.
یا دروست ژی هەر ئەڤەیە، دڤێت دهەمی بوارێن ژیانێدا مە هەلسەنگاندنێن خوە هەبن، تایبەت دڤێ پێشكەفتنا جیهان گەهشتیێ و تەكنەلوژییا بێ دەستووری دهێتە دناڤ كومەلگەهیدا، كو گەلەك جاران ب خرابی ژی ل سەر مە شكەستی یە و هندەك كەس بووینە قوربانی، ژبەركو چ هەلسەنگاندن بۆ نەهاتینە كرن.
رەنگە ئەڤ كەسێن ل هەردوو گەرێن فێستیڤالێ ئامادە بووین، دشێن جوداهییا دناڤبەرا هەردو سالاندا ببینن، ئەو جوداهی ژی ئەڤێن ل خوارێ بوون، ئێك: سەبارەت كەلاندانا دانیكان، ل ئێكەم فێستیڤال چوار مەنجەلێن دانیكان هاتبوونە دانان و سەرەرای بلاڤكرنا ژمارەكا زێدە یا سێنیكان ل سەر خەلكی، لێ ل دووماهیێ دانیك ب هەمییان را نەگەهشتن، بەراورد دگەل ئەڤ سالە، كو بتنێ دو مەنجەل بوون، لێ جورە رێك و پێكەیەك باشتر د بلاڤكرنا دانیكان دا هەبوو و تا دەمژمێرێن دووماهیێ ژی، هەر كەسێ حەز كربا دشییا دانیكان بدەست خوەڤە بینیت. دو: ئەڤ كەسێن ل دوهەمین فێستیڤال ئامادە بووین، رەنگە ب قەد دوجار گەرا ئێكێ بن، ئەڤە ژبلی كو گەلەك كەس ژبەر نەبوونا پاركا ترومبێلێ و دووراتییا جهێ فێستیڤالێ نەشییان ئامادەبن، ئەڤە ژی ئاماژەیە، كو خەلكی ئەڤ جورە چالاكیێن هەنێ پێخوشن. سێ: متایێ جوتیاران و گوندییان ئەڤێ د دوهەمین فێستیڤالدا هاتیە بەرچاڤكرن بۆ فروشتنێ، ب قەد دو جاری وی متای بوو، ژ ئەوا ل ئێكەمین فێستیڤال هاتیە بەرچاڤكرن، ب جور ژی و قەبارە ژی. چوار: دەزگەهێن راگەهاندنێ گرنگیەكا زێدەتر پێددا و لدویڤ سەربورا من یا تاكە كەسی، چالاكیێن ب گەلان ڤە گرێدای، دبنە جهێ پویتەدانا دەزگەهێن راگەهاندنا هەمی وەلاتان.
لدویڤ دەرهاڤێژێ ڤان خالێن من رێزكرین ژی، پێشوازیەكا باش ژ لایێ خەلكیڤە هەبوو و نە بتنێ ژ پارێزگەها دهوكێ، بەلكو ژ پارێزگەهێن دی ژی هاتبوون و من بامەرنیەك دیت گوت، من هاتنا خوە بۆ كوردستانێ پاش ئێخستبوو، دا بۆ فێستیڤالا دانیكا یێ ئامادەبم!
بەردەوامبوون
رەنگە مە ئەڤ كەسێن خەم ژ سەرخستنا ڤێ فێستیڤالێ خوارین و كو هندەكان ژێ، بهەمی رەنگەكی ملێن خوە دابوونە بەر و جهێ دەست خوشیێ نە، گەلەك جاران ئەم هزر دكەین، بوچی ئەم فێستیڤالەكا ژڤی رەنگی بگێرین، كو ئەڤا گەلەك ژێ نەزانن، چ لایەنان مەزاختیێ فێستیڤالێ ب ستوخوڤە نەگرتیە و بتنێ هندەك خەمخورێن بامەرنێ، خوە ل كێشێن گوندی، كێماسێن گوندی دكەنە خودان و ئەڤە چەنیدن چالاكی ل بامەرنێ هاتنە كرن و خەلكێ بامەرنێ ب ستوخوڤە دگریت، وەك بویاغكرنا بازارێ بامەرنێ و دروستكرنا سەروكانیێ كو ب شێوازەكێ مودرن هاتیە دروستكرن و دانانا چەند پەیكەران و چەندین كارێن دی، كو مە نەڤێت ئاماژێ بۆ بدەین، كو رەنگە ل گەلەك دەڤەرێن دی ژی، كارێن ژڤی رەنگی هەبن، لێ ئەز دێ ڤی بابەتی كورت كەمە سەر فێستیڤالێ؟!.
پێنەڤێت ژی هەر هوسانە، ژبەركو ئەو چالاكیێن دی بۆ بامەرنێ و بامەرنییان بتنێ بووینە و فێستیڤالەك ژڤی رەنگی، دبیتە روویەكێ جوان و شارستانیێ پارێزگەها دهوكێ هەمیێ و نە ئەز دبێژم بەلكو فەرە، لایەنێن رەوشەنبیری و تایبەت رێڤەبەرییا گشتییا رەوشەنبیری و هونەری ل دهوكێ، چاڤ خشاندنەكێ و خواندنەكێ بدەتە فێستیڤالێ و گرنگییا وێ.
گەشت و گوزار
ئەم ل پارێزگەها دهوكێ گەلەك جاران خوە ل بەرامبەری پارێزگەهێن دی كێم دبینین، دەربارەی خزمەتگوزارییان و هەولێرێ وەك پایتەختێ هەرێما كوردستانێ و سلێمانیێ وەك پایتەختێ رەوشەنبیری، لڤێرە ئەز نابێژم بلا رێڤەبەرییا گەشت و گوزاری ل بەر پارێزگەها دهوكێ بگەریێن و هەولێن وێ چەندێ بدەت، كو دهوك ببیتە پایتەختێ گەشت و گوزاری، لێ هەر چنەبیت، ئەڤە دەرفەتەكا زێرینە و پرۆژەكێ بەرهەڤە بۆ وان، ئەگەر بیر لێ بكەن و هەولێن پێشخستنا ڤێ فێستیڤالێ بدەن..!
راستی ژی پسیارە و جهێ هزركرنێ یە، فێستیڤالەكا ژڤی رەنگی یا سادە و كێم مەزاختن بۆ بڤێت و بشێت ببیتە جهێ پویتەدانا دەزگەهێن راگەهاندنێ یێن ناڤخویی و دەرڤەی هەرێما كوردستانێ و تا دەرڤەی وەلاتی ژی و ئەڤ رێژەیا زێدەیا خەلكی قەست دكەنێ، ئاخر ئەڤە دەستكەفتە بۆ كەرتێ گەشت و گوزاری ل پارێزگەها دهوكێ و داخوازییا دەیبابانە و بهەروە بۆ هاتیە رێكخستن، هیڤیدارم ئەڤ بابەتێ من جهێ لێ ڤەگەرا رێڤەبەرییا گەشت و گوزاری ل دهوكێ بیت و چاڤ خشاندنەكا زانستی بۆ بكەت.
كی سودمەندە ژ فێستیڤالێ
ئێك ژ برگێن گرنگ یێن فێستیڤالێ یان هەر وەكو ئەز هزر دكەم، گوندێن دەوروبەرێن ناحیا بامەرنێ ب بامەرنێ بخوڤە، دشێن سودمەندێن هەرە سەرەكی بن ژ بەردەوامببونا فێستیڤالێ، دشێن متایێ خوە یێ سالێ ژ (كتك و هنار و گویز و باهیڤ و كەزان و بێمك و بەری ووووووو هتد) بۆ فروشتنێ بەرچاڤ بكەن، ئەگەر بتنێ نمونەكێ بینم، ئەگەر ژنەك یان دو ژن بەرهەڤیێن خوە بۆ سێهەمین فێستیڤالا دانیكان بكەن و ل وەرزێ بهارێ قورادان كوم بكەن و هشك بكەن و ل فێستیڤالێ سێلەكێ دانە سەر پەلا و سەوكێن قورادان بفروشن، تو بێژی ئەو چەند سەوكان بفروشن و تو هزر بكەی چەند پێشوازی دێ ل خورانا وان سەوكان هێتە كرنێ؟!! ئەڤە بخوە بابەتن و دڤێت دگەل بریاردانێ بەردەوامبوونا فێستیڤالێ هشیاركرن بهێتە كرنێ، جوتیار و خەلگێ دەڤەرێ بهێنە ئاگەهداركرن، ژبەركو ئەو سودمەندێن ئێكێ و دووماهییێ نە.
هەر چەندە ئەڤێن من گوتین چەند تێبینیەكێن بچووك و تاكە كەسی بوون، لێ ئەگەر ئەم ڤەكولینەك و خواندنەكا زانستیتر بدەینێ، رەنگە قازانجا وێ بۆ پارێزگەها دهوكێ هەمیێ بزڤریت و ئەز باوەرم ژێ دێ زڤریت، ئەگەر ئەم دروست ژبۆ كار بكەین.
* د رۆژناما ئەڤرو ژمارە 2697 یا رۆژا 10/11/2019ێ داب لاڤ بوویە.
%20copy.jpg)
ليست هناك تعليقات:
إرسال تعليق