عبدالرحمن بامەرنی
هەر وەكو ژناڤی دیار، دناڤبەرا تەتەرو و تویتەریدا ب سەدان سال هەنە و هەر دووكان ژی باندوورا خوە یا ئێكسەر ل سەر جیهانێ هەبوویە و ئەگەر ژ تەتەری دەست پێبكەین، كو دەستەواژە بۆ (تەتەر و مەغولان) دزڤریت، كو ب وی ناڤی د بەرنیاس بوون و شەر و هێرشێن وان گەلەك بلەز بلاڤ بوون و دەولەتا تەتەران ب سەركردایەتییا (جەنگیزخان)ی دروست بوو و شییان دەستهەلاتا خوە گەلەك بەرفرەهـ بكەن، لێ جوداهییا تەتەران دگەل تویتەری، هەردووكان دەستهەلاتا خوە ل جیهانێ دكر، لێ تەتەران تا جهەك داگیردكر و وەلاتەك ژناڤ دبر، رەنگە ب هەیڤان و سالان خاندبا، لێ د بەرامبەردا، تویتەر ب چەند چركەییان دشێت هژاندنێ ل گەلەك وەلاتان دروست بكەت و سیاسەتا وەلاتان ئالوز بكەت و تویتێن (ترامپ)ی سەروكێ ئەمریكا باشترین بەلگەنە، چاوان تویتەكی د نڤیسیت و هەر د گاڤێدا، جیهانێ هەمی بخوە ڤە مژویل دكەت! تا ڤێرە، ئەڤە ئەو بوو یا من ژ سمینارەكا (مەلا بەحتیار) گوهێ خوە دایێ و دگوتی: دڤێت ئەم سیاسەتا ئەڤرو، لدویڤ تویتەری بكەین نەك تەتەری!
لێ تشتێ ئەز پالدایمە ڤێ نڤیسینێ، سوشیال میدیایە و عەقلیەتا مە و خواندنا مە بۆ بوویەران و چاوان ئەم تشتان لێكددەین، هەر چەندە ئەم د چەرخێ لەزێ و تەكنەلوژیایێ داینە، لێ ئەم هێشتا ب كەلتورێ باب و باپیران و ب كەلتورێ و ل سەر مە هاتیە سەپاندن هزرێ دكەین و پلانێن خوە ددانین، مەبەستا من ب كێشانا بابەتێ سوشیال میدیایێ ژی، كو جیهان هەمی ل بەر چاڤێن مەیە و بوویەرا ل هەر جهەكی رووبدەت زیندی ئەم تەماشا دكەین، لێ ئەم نەشییانە كێمترین مفا ژی ژڤێ سوشیال میدیایێ وەربگرین، لڤێرە پرسیار، ئایا ئەم شیاینە سوشیال میدیایێ و تورێن كومەلایەتی، بێخینە د خزمەتا خوەشكرنا ژیانا خوەدا؟ ئایا ئەم شیاینە سوشیال میدیایێ بكەینە چاڤدێر ل سەر دەستهەلاتێن عەشایری، ئاینی و تا سیاسی ژی و گوشارێ پێ دروست بكەین و بەهایێن مرۆڤایەتیێ و ئاشتی و ئارامیێ پێ بلاڤ بكەین؟ پێنەڤێت ئەڤە هەمی پرسێن بێ بەرسڤن و مە نەڤێت ئەم دەستبەرداری بەهایێن خوە یێن كەلتوری، رەوشت و نەریتان ببین، هێشتا ئەم خوە ب داب و نەریتێن عەشیرێ ناس دكەین و دڤێ تەكنەلوژییا جیهان هندە بچویككری، ئەم پەنایێ بۆ كەسەكی دبەین، ئەگەر كێشەك كەتە بەر سینگا مە و ئەگەر ب كورتی و كوردی بێژم، ئەم دڤی سەردەمیدا وەك گوندیەكی نە، ل كولانێن باژێرییا ب سەر دەلنگ و سەنتور و پەنتورێن نە ئوتی كری پیاسا دكەین، گونەهـ ژی نە بتنێ یا مەیە، ژبەركو سوشیال میدیایێ هەمی تشت یێ دانایە بەرسینگا مە و مە دڤێت ب عەقلیەتا رابردوی، ئەوێ ئەم شانازیێ پێدبەین، هەڤركیێ دگەل جیهانا ئەڤرو بكەین و سیاسەتێ پێ بكەین!.
• د رۆژناما رێگای كوردستان رۆژا سێشەمبی رێكەفتی 26/11/2019ێ بلاڤ بوویە.
%20copy.jpg)
ليست هناك تعليقات:
إرسال تعليق