عبدالرحمن بامەرنی
سوشیال میدیایێ ھند ئەمێن بخوەڤە گرێداین، دگەل ھەر ژ خەو ھشیاربوونەكێ ژی، ئێكەم تشتێ چاڤێن مە بۆ خوە رادكێشن موبایلە و بزانین چ سەح و سی و تشتێ نوی ھەیە.! ئەڤە ئەز دبێژم بتنێ وەك سەرنڤیسەرێ (روانگە و رەخنە) و تایبەت د بلاڤكرنا ھندەك بابەتاندا، كو ھند ژێگرتنا بابەتان و سەرراستكرنا وان و بلاڤكرنا وان من نا وەستینن، ھندی كومێنت من بخوەڤە مژویل دكەن، تایبەت ژی د سوشیال میدیایەكا بەردریایدا و نە تو دزانی كی كیە و نە تو دزانی خودانێ كومێنتێ ب مەبەستا نڤیسینا كومێنتا خوە چ دڤێت، ئایا بتنێ شێواندنا راستییانە یان زمانێ گەفێیە یان ژی زمانێ (تەشویش)ێیە ژبۆ مژویلكرنا یان راكێشان یان لادانا مەبەستا سەرەكییا بابەتی؟!!.
دێ كورت كەم:
سپێدەھیەكێ وەك ھەر جار، من چاڤێ خوە ب ناماندا خشاندن، ئێكی یا نڤیسی (سەیدا بگەھێ ڤان چ د ئێك و دوو نەھێلا)، ژوان كومێنتێن ل سەر بابەتەكی ھاتین و دگوتنە ئێك و دوو: (كوفك، گەواد، ئەزمانێ خوە بكە ددەڤێ خوەدا، تو چ نزانی..... ھتد). یان جارەكێ ب رۆژ زەنگا نامەكێ ئەز ژخەوێ ھشیاركرم و دبێژیت (سەیدا بگەھێ شەرێ كافر و موسلمانانە و خوین یا دباریت..!!).
ئەز بۆ تە چبكەم:
من چەند جاران ھوشداری دایە بەرێزەكی، كو یێ یاسایێن مالپەری و ئەو درووشمێ مە بۆ مالپەری داناین تو یێ د بەزینی، درووشمێ مە ژی (دوورخستنا میدیایێ و سوشیال میدیایێ ژ ناڤزراندن و كەرب و كینێ). ئەز ناڤەشیرم من چەند جارەكان كومێنتێن وی ژی رەشكرینە و دووماھی جار، ئەو و كەسەكێ دی یێ كومێنتان وەك تەپكێ دھاڤێژنە بەر ئێك و ب زمانەكێ توند، ئاخفتن ئاخفتنێ ژی دكێشیت، یێ دبێژیتە من سەیدا ئەڤە یێ بێ رێزیێ دكەت..!
رەخنەكرن سەر راستكرنە:
ھەر وەكو ژ ناڤێ مالپەری دیار، (روانگە و رەخنە) كو عەرەبییا وێ (رەسد و نەقد) یان كو تو تشتەكی ببینی و رەخنە بكەی، لڤێرە پرسیار، ئایا ئەم ھەمی د دروستین؟ ئایا ھەمی كەس وەك مە ھزردكەن؟ ئایا ھەر كەسێ وەك من ھزر نەكەت، دڤێت ب زمانێ گەفێ و ترساندنێ دگەل باخڤین؟! ئەڤە و دەھان پرسیارێن دی. بێی كو ئەم بزانین (رەخنە) یان كو دیتنەكە نە ل رەخێ مەیە، ئەگەر ناڤێ وێ نەدبوو رەخنە. یان كو تو یێ خواندەڤا، دەما بابەتەكی دخوینی، یانكو دێ تشتەكی خوینی مەرج نینە تو دگەل بوچوونا نڤیسەری بی.
كومێنت یان كو كەساتییا تە:
تو ئەڤێ كومێنتێ دنڤیسی، بۆ من گرنگ نینە تو چ تەمەن بی و ئاستێ تە یێ زانستی چ بیت و لایەنێ تە یێ حزبی چ بیت و چ ئاین و ل كیش وەلاتی و چ عەشیر بی، كومێنتا تە ڤان ھەمی پێناسان ددەتە تە، یا باشتر رێزێ ل نڤیسینا كومێنتا خوە بگری، ژبەركو سەدان كەس ل سەر وێ كومێنتێ دێ تە ناس كەن، حەز بكەی بلا چ قات و ریبات ل بەر تە بن یان كراسەكێ دریایی و شەكالەك ل سەر پێن تەبیت.
زمانێ گولێ:
مەزنا ژمێژە گوتیە (ھەمی كەس نەیێن ھەمی دیوانانە)، ھەمان تشت بۆ سوشیال میدیایێ ژی دروستە. شوونا تو كومێنتەكێ بنڤیسی و كەساتییا خوە پێ بینییە خار یان دلێ یێ بەرامبەر بشكێنی، ل ئیموجیەكێ نە رازیبوونێ بگەرە یان گولەكێ بۆ نڤیسەری فرێكە.
دووماھی:
ئەم كورد ددرێژاھییا مێژوویێ دا یێن ھاتینە چەوساندن و پاشڤەبرن و بلا ئەم سوشیال میدیایێ بكەینە زمانێ ئێك دوو قەبیل كرنێ، ئەم ب رەخنێ ئێك و دوو ئاڤا دكەین، مەرج نینە ھەر دەم رەخنەگر یان نڤیسەر یێ راست بیت، لێ ئەم دشێین ب كومێنتا خوە وی راستڤەكەین و گەلەك خواندەڤان (گەنج ژ ھەردوو رەگەزان و سنێلە و خوە زارۆك ژی) ژمە فێر دبن، رەخنە مە ئاڤا دكەت، گوھێ من یێ ل ھەوە و مە سەر راست بكەن، ئەگەر ئەم دشاش بین و ئەگەر بارەكا راستیێ ژی دگەل مەدا بیت، دا پێكڤە خوە ئاڤابكەین و بتنێ رەخنە مە ئاڤا دكەت، نەك رەڤین ژ رەخنێ.
ــــــــــــــــــــــــــــــــــــــــــ
لينكێ گوتارێ ل سەر سایتێ روانگە و رەخنە:
%20copy.jpg)
ليست هناك تعليقات:
إرسال تعليق