جێری

عبدالرحمن بامەرنی

پشتی خواندنا ڤێ پەرتووكێ، بۆ وێ ھەمی تشتەك ئاشكەرابوون، كو جێری كورتكرییا ناڤێ (جاریە)یە و دەما ئەڤ پرسیارێن بێ بەرسڤ ل بەر سینگا بابێ خوە داناین! بابێ وێ یێ سەرێ وی بچیت و نڤێژا وی نەچیت، مەندەھوشییا خوە دیاركر و تف ل (قاسمێ لەعلێ) باراندن، دەما پێشنیارا ڤی ناڤی دایە وی و كچا خوەیا ئێكانە پێ ناڤكری..

شەڤێ ژ نیڤێ دەربازكربوو، دەما ژبن لحێف و دووشەكێن خوە دەركەفتی و بەرەڤ مێزا خوە یا پەرتووك ل سەر چووی و پەرێن پەرتووكێ ڤەداین، ئاگر ب خانیڤانڤە ھلدچوو، ستوویێ زارۆكان ب لاندكانڤە شورببوو، زەلام و ھندی نێرەكێ خوە ل سەر پێن خوە بگریت، رمەك د سینگی رابوو یان سەرێ وی دوو بھوستا ژ كەلەخێ وی وێڤەتربوو یان وەك دیكلێ ڤەكوشتی، ل سەر سەرێ خوە دزڤری. ھەر مێیەكا مەمكێن وێ ھندی كتەكا گیزێ ژی لێھاتین، ل پشت سیارەكی بوو و ھندان ژی دەستێن وان دگرێدایی بوون و بەری چنگلێ وێ ژی بھێتە كێشان و ببیتە (سەبییا) وان، پەرێن پەرتووكێ پێكڤەدان و بلەز چوو دبن لحێفا خوەڤە و ژوور لخوە تاری و زولماتەكر...

سپێدێ رێكا زانكویێ نەگرت و خوە ل بەردەرێ پەرتوكخانێ دیت، ل رامانا ناڤێ خوە گەرییا، ھەر چ پەرتووكا ل سەر ئەنفالێ ھاتیە نڤیسین، ھەر چ پەرتووكا ل سەر داعشان ھاتیە نڤیسین كرین و ئەو مێزا دژوورا وێڤە ژ پەرتووكان پر بوو و بابێ وێ گوتێ: "ئەڤ ھەمی پەرتووكە ژبۆ چ كچا من؟!!".

شەڤ ب سەردا ھاتن و رووناھییا ژوورا وێ نەدھاتە ڤەمراندن و بتنێ ژی مەبەستا وێ (سەبییە و جاریە) ئێك رامان نەبن، دا بگەھیتە بابێ خوە و بەری چاڤێ وی ب (قاسمێ لەعلێ) بكەڤن، وی تف باران نەكەت...