چێل و گولك/ كورتەچیرۆك

عبدالرحمن بامەرنی

دیاری بۆ (فەتحی لیناڤایی)

چەند چیرۆكێن خوە یێن بەری سەرھلدانێ بۆ مە ڤەدگێران، لێ من زێدەتر حەژ ڤێكر و رویدانێن وێ سەردەمانەكی پیشانددەن، كو ئەو زوردارییە د خەیالا مرۆڤی ژیدا نەبیت. سال وەخت، شەرێ دناڤبەرا عیراقێ و ئیرانێ دا بوو. تەمەنێ وی دبن (18) سالیێ دابوو و ھێشتا ناڤێ وی بۆ سەربازیێ نەھاتبوو. دایكا وی گوتێ كورێ من، بابێ تە یێ چوویە بەر دلوڤانییا خودێ و تو ژی دچییە باژێری بۆ خوە كار دكەی و ئەڤ چێل و گولكە دخانیڤە یێن بوینە بەلا سەرێ مە و ئەم نەشێین ژبەر وان چبكەین، نە دشێین ژ مالێ دەركەڤین، چ سەرەدان بیت نەخوشخانە بیت یان ژی چوونا ناڤ چەم و رەزی بیت و ئەگەر تو بمن بكەی، دێ بەیە مەیدانكا باژێری و ب چ چوو، دێ فرۆشی و پێدڤیێن مالێ بۆ خوە پێكرین و ئەڤێن ژبەر دمینن ژی، بۆ خوە بكە د شولەكیرا.

ھەڤالەكێ وی جھێ مەیدانكا فروتنا حەیوانان نیشاندا و بۆ پێشنیار كر، چێل و گولكێ خوە ل مەیدانكا دھوكێ نە فرۆشیت و ب بەتە مەیدانكا زاخو، ل وێرێ بكر باشتر یێ ھەی و دێ پتر پارە ژی پێھێنەدان.

ترومبێلەك بۆ خوە دەستەبەركر و سپێدەھییا رۆژا ئەینی، ھێشتا بەروەخت، ھەردوو چێلێن خوە و گولك ل پشتا پیكەمێ سیاركرن و بەرەڤ باژێركێ زاخو، كا تو لكیڤەی. دەما پیكەم ل جھێ دەستنیشانكری راوەستیایی، نیشانێن چ مەیدانكا لێنەبوون، ھندی زویكا ژمالا خوە دەركەفتبوو و ھێشتا خەلكێ زاخو بخوە یێ دخەو، سەرەرای دەمژمێر و نیڤێن ھاتنا وان برێكێ. شوفێرێ ترۆمبێلێ ھاری وی ھەردوو چێل و گولك ژ پشتا پیكەمێ ئینانە خارێ و ئەو بجھـ ھێلا و رێكا ڤەگەرێ گرت. ئەوی ژی ھەردوو چێل ب كنفەكی ب ستوینكەكێ ڤە گرێدان و گولك ھێلا بەردای، ژبەركو ماكا وێ یا دگەل و ژێ دویرناكەڤیت.

كێشانا جگارەكا كیسكی و بێھنەكا ھاتنوچوونێ ل دەردوورێن مەیدانكێ ب بەھانا كوشتنا دەمی تا خەلك دجەمیێت، بتنێ دووسێ پیرەمێران سەرێ خوە ل مەیدانكێ دیار كر، ژ وی سلاڤ و ژ یێدی سلاڤ، پیرەمێرا گوتنێ تا دەمژمێرەكا دی، شنی دێ مەیدانك بدروستاھی ڤەبیت و خەلك قەست كەتێ.

ھەردوو چێل و گولك ب ستینكێ ڤە گرێدایی ھێلان و بەرەڤ بازاری چوو. سەر تێشتەك بیت، چایەك بیت، لەخرینیا خوە بشكێنیت و ھەر چنە بیت دا بشێت جگارا خوە بكێشیت و خوە لناڤ بازاری دیت، بتنێ چەند دكان د ڤەكریبوون و رێكا وی كەتە بەردەرێ بارەگایەكێ بەعسییا و سەربازەك د خالا حەرەسیێ دا یێ روونشتی بوو و ھێشتا ژێ دەرباز نەبووی، ب (تەعال تەعال)ێ گازیكرێ و سەرەرای كو عەرەبیێ باش نزانیت، لێ خوە زارۆك ژی دزانن (تەعال) یانكو وەرە.

ب نەچاری بەر ب سەربازی ڤەچوو، ھەوی ژێ داخازكر و ھەویا خوە كرە ددەستیدا. دلێ وی خوە ل سەر سەدو بیستێ دقوتا، لێ یێ ژخوە پشت راست بوو كو ھێشتا سالەك بۆ عەسكەریا وییا ب زورەملێ یا مای، لێ كەلەخێ وی ئەو نەدگوت ئەڤا ل سەر ھەوییا وی نڤیسی و ھندی گوتێ چێلێن من ل مەیدانكێ ب ستینكێ ڤەدگرێداینە؟ لێ چێلان مییەك ژ وژدانا سەربازی نە لڤاند و چنگلێ وی د دەستەكیدا و دەستێ دی ھەوی تێدا و ل بەر دەرێ ژوورەكێ، پێ خوە یێ راستێ بلندكر و ھندی خودێ ھێز دایێ، ئەو پێ ل عەردی دا و گوت: رەفیقی ئەڤە مە گەنجەك بۆ (جەیشولشەعبی) گرت و ھێشتا ئەو یێ بەحسا چێلان و ستینكێ دكەت و لاڤەلاڤێن وینە ددەستێ ھەردووكاندا، دەنگێ كلیل و قفلدانا دەرگەھی چاڤێن وی ل نەھـ دەھـ مرۆڤێن دی، گەنج و زەلامان ڤەكرن.

ب شەڤێ ھەمی ل ھیڤییا سوبەھیەكا دێ چارەنڤیسێ وان چلێھێت نڤستن و بتنێ ئەو نەبیت، دڤیا تشتەكی ژ چێلێن خوە و گولكێ بزانیت و دەما دەرگەھـ ل سەر ڤەكرین. زیلەكا عەسكەری ل بەر دەرێ بارەگایی لھیڤیا وان بوو، ھێشتا ئەو یێ دھزرا گولكی و چێلاندا، ب قونتاغێ راحەشاندنە پشتا زیلێ و شوفێری ھینگێ پێ ل ئستوپی كر، تا ل سەربازگەھا كەركیكێ راوەستاندین.

ژ زیلێ ئینانە خار و ئێكسەر بەرێ وان دانە ناڤ جەمەلونەكێ و ل رۆژا پاشترێ دەما ژخەوا گران رابووی، كەس لبن جەمەلونێ نەدیت و ل (ساحەت عەرەزات)، عەریفی ب (زمال) گازی كرێ و ب ئاماژا، سیاجێ سەربازگەھێ نیشاندا و گوتێ (ھەروێل). ل رەخێ دیێ سیاجی، سەیێن موعەسكەری بەردا دویڤڤە و ئەوێ دكەتە غار، ب دوو پێن خوە و دوویێن دی ژی نزا ژ كیڤە قەركرن، خوە بێھن ھلمایی لبەر سینگێ عەریفی دیت و چوو دناڤ فەسیلێدا.

ئەفسەرێ سێ ستێرك ل سەر ملی ھاتە بەرامبەری وان و ئەو ترسا وان بۆ عەریفی ھەی، عەریفی دووجار ھند بۆ وی ھەبوو و بۆ سەید سەیدییا وی. ئەفسەرێ دێمێ خوە ژ دێمێ حەمشایەكا رەش وەرگرتین، ب كورێن من دگەل وان د ئاخفت، ھین ئەڤرو یێ د ئەركێ بەرەڤانییا وەلاتیدا و وەلات پێدڤی مە ھەمیانە.

دێ بێژی ئەڤ ئەفسەرە یێ ل بەر دەستێ مەلا نوری فێربوویە ئاخفتنێ و مەلا نوری چەند ناڤێ خودێ و پێغەمبەران دوبارە دكر، ئەو ھند یێ ناڤێ قادسیێ و سەیدلرەئیسی دوبارە دكەت.

بەری ئەفسەر دوو رۆژان ئیجازێ بدەتێ و بچنە مالێن خوە و ڤەگەرن ھەمان سەربازگەھـ بۆ ئەركدارییا خوە د (جەیشولشەعبی)دا، عەریفی چاڤێن خوە لێ كرنە گرێ و گوت: بدەنگێ بلند بێژن (یەعیش سەدولرەئیس).گەھشتە مال و دەیكا وی خوە تێوەركر، گوتێ سەرێ تە ساخ بیت و چێل و گولك ژی گوری كوردینیێ.

سەرھلدان چێبوو، حكومەت و پەرلەمان چێبوون و چێل و گولك ژی ھێشتا یێ دچن و دەما من گوتیێ ئەگەر ئەڤ سوحبەتە من كرە چیرۆك، چ ناڤ لێدانم؟ ھێشتا ئاخفتن دناڤ دەڤێ مندا، گوت ناڤێ وێ بكە (چێل و گولگ)، ژبەركو ھێشتا ئەز خەونان ب ڤەگەراندنا وانڤە دبینم.

ـ درۆژناما ئەڤرو ژمارە 3351 ل رۆژا 18/6/2023ێ دا بلاڤبوویە.