عەفەرما شێخی

عبدالرحمن بامەرنی

ئەز بخوە نەشێخم و من گەلەك تشت ل سەر شێخان ژی نڤیسینە، لێ ژبەركو ناڤێ من یێ درێژە و تا دكەڤیتە سەر ئەزمانێ زارۆكان زورێ ب زەحمەتە، هندەك هەڤال دبێژنە من شێخ و هندەك جاران من بخوە ژی پێخوشە هەر ناڤەك بیت، بتنێ ناڤێ من یێ درێژ نەبیت، ئەوێ بابێ من ل سەر من دانای و باوەرناكەم كەسێ ژمە چ گلەیی ل سەر ناڤێ خوە هەبیت، وەك رێزگرتن بۆ حەزا بابێن مە و هەلبژارتنا وان.

دا ڤەگەرمە سەر بابەتێ خوە، وێ رۆژێ من كارەك ل رێڤەبەریەكێ هەبوو بێی ناڤێ وێ بینم و من دەمژمێرەك بۆ ڤی كارێ دانابوو و نزانم ژ بەدبەختیا منە یان دەم ژی بخو یاریكێن خو ب هەستێن مروڤی دكەت! من یا كریە جەربە، چەند جارەكێ‌ یێ‌ بلەز بامە یان ژی كارەك ل بەر سینگا من بایە یان ژی من ژڤانەك هەبایە، هەر ترافیكا ئەز دگەهمێ‌ سور دبیت. هەر چاوا بیت، ئەز چوومە جهێ دەست نیشانكری و من كاغەزێن خوە دانە سەر مێزا سكرتێرێ رێڤەبەری و من ئیمزایەكا رێڤەبەری دڤیا، وی ژی گوتە من روینە خارێ‌ و كومبونە. هەر چەندە من بتنێ مولەتا ئێك دەمژمێر ژ كارێ‌ خوە هەبوو و دڤیابا ڤەگەریابام، من دوبارە گوتە سكرتێری و گوتە من راوەستە. ئەڤ راوەستیانا هەنێ‌ گوتە سێ‌ كەسێن دی ژی، ئەو ژی وەك من روینشتنە خارێ‌. شوكور چایچی قەهوەك بۆ سكرتێری ئینا و دیارە لدویڤ داخازیا وی بوو، گوتە من تو ژی ئێكێ‌ ناڤەخوی؟ من گوتێ‌ بەلێ‌، ژ جوامێرینیا خو بۆ من ژی چایەك ئینا و دبەر چاڤەخارنێ را، پت پتا من بوو و دبیت ئەڤ نڤیسینا نوكە هوین دخوینن بڤی رەنگی نەبایە و من ناڤێ‌ رێڤەبەریێ‌ ژی ئینابا، چنكو بهزرا من دڤێت رێڤەبەر كومبونا خوە سپێدێ‌ زوی بكەت یان ژی ببەتە پشتی دەوامێ‌، بەلێ‌ رێڤەبەر دەركەت یێ‌ مافدار! روونشتنا من نەبونە 10 خولەكان نەكێشا، كومبون بدوماهی هات و كاغەزا من ژی هاتە ئیمزاكرن، بتنێ‌ یا بمن مای بێژم: (عەفەرم بۆ تە رێڤەبەر، تە عەفەرما شێخی بدەست خو ڤە ئینا و تە كومبونا خو زوی بدوماهی ئینا...).